चार पोलिसांना थेट बडतर्फीच्या नोटीस दिल्याने आणि आणखी काही कामचुकारांना पोलिस आयुक्तांनी रडारवर घेतल्याचे समोर आल्याने शहर पोलिस दलात खळबळ उडाली आहे. याबाबत दिवसभर पोलिस वर्तुळात दबक्या आवाजात चर्चा सुरू होती. विशेषतः गुन्हेगारांना पाठीशी घालणाऱ्या काही पोलिस निरीक्षकाचे धाबे दणाणले असून, पोलिस आयुक्तांच्या पुढील आदेशाकडे सर्वांचे लक्ष लागले आहे.
शहरात अवैध व्यवसाय करणाऱ्यांशी घनिष्ठ संबंध ठेवल्याप्रकरणी बडतर्फ का करू नये? अशा आशयाची नोटीस पोलिस आयुक्त डॉ. रवींद्र सिंगल यांनी चार कर्मचाऱ्यांना बजावली आहे. या कर्मचाऱ्यांवरील आरोपांमध्ये तथ्य असल्याची खात्री पटल्यामुळे ही नोटीस बजावण्यात आली असून, खुलासा करण्यासाठी कर्मचाऱ्यांना आठ दिवसांची मुदत देण्यात आली आहे. पोलिस आयुक्तांच्या या कठोर कारवाईमुळे शहर पोलिस दलामध्ये खळबळ उडाली आहे. काही महिन्यात शहरात स्ट्रीट क्राइममध्ये वाढ झाली. विशेषतः मालमत्तेच्या घटनांमुळे सर्वसामन्यांना दणका बसला. गुन्हे घडत असताना झालेल्या गुन्ह्यांचा शोध मात्र लागत नाही.
गुन्हेच उघडकीस येत नसल्याने चोरटे सतत आपली ‘कमाल’ दाखवू लागले. त्यातच गुन्हे शोध पथकातील बहुतांश कर्मचाऱ्यांच्या बदल्या झाल्यात. क्राइम ब्रँचचे अस्तित्व कागदावर असून, वरिष्ठ अधिकारी कामाकडे सपशेल दुर्लक्ष करीत आहे. या पार्श्वभूमीवर पोलिस आयुक्त डॉ. सिंगल यांनीच सूत्रे हातात घेतल्याचे मानले जात आहे.
या चार विभागातील ‘ते’ कर्मचारी
चोरट्याशी सलगी ठेवणाऱ्या काही पोलिसांची आयुक्त डॉ. सिंगल यांनी सखोल चौकशी केली. यात, चौघा जणांविरोधात पक्के पुरावे समोर आले. यात क्राइम ब्रँच, मोटर ट्रान्सपोर्ट सेक्शन तसेच अंबड आणि उपनगर पोलिस स्टेशनच्या प्रत्येकी एका कर्मचाऱ्याचा समावेश आहे.
गुन्हेगारीला बसणार आळा?
यापूर्वी, चोरट्याशी किंवा अवैध काम करणाऱ्या व्यक्तींशी संबंध ठेवल्याच्या कारणाहून दोघा जणांची जिल्हाबाहेर बदली करण्यात आली होती. आता बडतर्फची नोटीस बजावण्यात आला असून, याबाबत पोलिस दलात खमंग चर्चा सुरू आहे. सरळ काम करणाऱ्या कर्मचाऱ्यांकडून पोलिस आयुक्तांच्या निर्णयाचे स्वागत होत असून, याच कारवाईतून गुन्हेगारीला आळा बसू शकतो, असा विश्वास व्यक्त केला जात आहे.
मोबाइल अॅप डाउनलोड करा आणि राहा अपडेट