विविध क्षेत्रांत भरारी घेणाऱ्या नाशिकच्या शिरपेचात आणखी एक मानाचा तुरा खोवला जाणार आहे. आतापर्यंत विविध राज्यांतील शासकीय व सामाजिक संस्थांमधील कर्मचारी व अधिकाऱ्यांना निरामय आरोग्याचे धडे देणारे डॉ. हेमंत ओस्तवाल यांना थेट राष्ट्रपती भवनातूनच आरोग्याचे धडे देण्यासाठी बोलावणे आले आहे. आज, शनिवारी (दि. २९) डॉ. ओस्तवाल राष्ट्रपती भवनात निरामय आरोग्य या विषयावर राष्ट्रपती भवनातील अधिकारी व कर्मचाऱ्यांसाठी पॉवरपॉइंट प्रेझेंटेशन करणार आहेत.
आपल्या वडिलांच्या अकाली निधनामुळे कुटुंबावर कोसळलेल्या संकटाचा यशस्वी सामना करणारे डॉ. ओस्तवाल रुग्ण आजारीच पडू नयेत यासाठी गेल्या ३२ वर्षांपासून प्रयत्नरत आहेत. बदलती जीवनशैली आणि ताणतणाव यामुळे जगात दर वर्षी एक कोटी ७३ लाख लोक मृत्युमुखी पडतात. त्यापैकी भारतात एक कोटी ११ लाख व्यक्ती दर वर्षी मृत्युमृखी पडतात. हृदयविकार, ब्लडप्रेशर आणि डायबिटिज या तीन आजारांचा यात प्रामुख्याने समावेश आहे. कॅन्सर, एड्स व अपघात या तिघांपेक्षाही जास्त व्यक्ती वरील तीन आजारांना बळी पडतात. वास्तविक आरोग्याची काळजी वेळीच घेतली तर या तीनही आजारांना अटकाव होऊन अकाली मृत्यू टळू शकतो. त्यामुळे डॉ. ओस्तवाल यांनी या तीन आजारांबाबत जनजागृती सुरू केली असून, निरामय आरोग्य या विषयावर त्यांनी दोन तासांचे पॉवरपॉइंट प्रेझेंटेशन तयार केले आहे.
स्वयंस्फूर्तीने कार्यरत
हृदयविकार, ब्लडप्रेशर आणि मधुमेह या तीन आजारांसदर्भात आधीपासूनच दक्षता घेतली, तर देशभरातील ८० टक्के अकाली मृत्यू हे टाळता येतील, असा डॉ. ओस्तवाल यांचा दावा आहे. जगप्रसिद्ध डॉक्टर, साहित्यिक व फिलॉसॉफर या तज्ज्ञांचा दाखला देत दैनंदिन जीवनात घडणाऱ्या घडामोंडीवर भाष्य करत ते जनजागृती करतात. विशेषतः स्वयंस्फूर्तीने ते शासकीय कार्यालये, स्वयंसेवी संस्था व खासगी कंपन्यांमध्ये कार्यरत असलेल्या अधिकारी व कर्मचाऱ्यांना आरोग्याचा मंत्र देतात. महाराष्ट्रासह विविध राज्ये, तसेच लष्करातील अधिकाऱ्यांनाही त्यांनी आरोग्याचे धडे दिले आहेत. आता राष्ट्रपती भवनातील अधिकारी व कर्मचाऱ्यांना ते आरोग्याचे धडे देणार आहेत.
आतापर्यंत मी ५७९ ठिकाणी निरामय आरोग्य या विषयावर सादरीकरण केले आहे. त्यामुळे राष्ट्रपती भवनाने माझ्या कार्याची दखल घेतली असून, शनिवारी (दि. २९) राष्ट्रपती भवनात माझे सादरीकरण होणार आहे.
-डॉ. हेमंत ओस्तवाल, नाशिक
मोबाइल अॅप डाउनलोड करा आणि राहा अपडेट