राज्यातील सहायक पोलिस आयुक्त (एसीपी) आणि पोलिस उपअधीक्षक (डीवायएसपी) दर्जाच्या ९६ अधिकाऱ्यांच्या बदलीचे आदेश रविवारी निघाले. शहरातील दोन एसीपींसह महाराष्ट्र पोलिस अकादमीतील आठ आणि नाशिक ग्रामीणमधील एका डीवायएसपीची बदली करण्यात आली आहे.
परिमंडळ दोनचे एसीपी अतुल झेंडे यांची नाशिक ग्रामीणमध्ये डीवायएसपी म्हणून बदली झाली आहे. वाहतूक शाखेचे एसीपी जयंत बजबळे यांची पालघर विरार येथे डीवायएसपी म्हणून बदली करण्यात आली आहे. महाराष्ट्र पोलिस अकादमीमध्ये कार्यरत कुंडलिक निगडे यांची पुण्यात, तर नम्रता अलकनुरे (राज्य गुप्त वार्ता, मुंबई), शकुंतला मैत्री, मिलिंद खेतले (मुंबई), मेघा कमलाकर (रायगड), अनिलकुमार लंभाते (खंडाळा पोलिस प्रशिक्षण केंद्र), राजेंद्रकुमार शेंडे (कोल्हापूर), दत्तात्रय निघोट (मुरबाड, ठाणे ग्रामीण) यांचा बदली झालेल्या अधिकाऱ्यांत समावेश आहे. नाशिक ग्रामीणमधील गजानन राजमाने यांची उस्मानाबाद येथे बदली झाली आहे. नाशिक पोलिस आयुक्तालयात संगमनेरचे डीवायएसपी अजय देवरे बदलून येणार आहेत.
बुरडेंच्या जागी कोण?
महाराष्ट्र पोलिस अकादमीचे संचालक म्हणून नियुक्ती जाहीर झालेल्या प्रशांत बुरडे यांची आता मुंबईचे सहआयुक्त म्हणून बदली करण्यात आल्याचे समजते. महाराष्ट्र पोलिस अकादमीचे संचालक नवल बजाज यांची कोकण परिक्षेत्राचे विशेष पोलिस महानिरीक्षक म्हणून तर, कोकणचे विशेष पोलिस महानिरीक्षक प्रशांत बुरडे यांची अकादमीचे संचालक म्हणून नियुक्ती जाहीर झाली होती. मात्र बुरडे यांची आता मुंबईच्या सहआयुक्तपदी बदली केल्याचे समजते. त्यामुळे महाराष्ट्र पोलिस अकादमीत संचालक म्हणून कोण येणार याकडे लक्ष लागले आहे.
मोबाइल अॅप डाउनलोड करा आणि राहा अपडेट