--
नाशिक शहरात नव्याने स्थापन झालेल्या नाशिक जिल्हा बुद्धिबळ संघटनेबद्दल जुन्या बुद्धिबळ संघटनेने आक्षेप घेतला आहे. नव्याने स्थापन झालेली बुद्धिबळ संघटना ही खेळाडू व पालकांची दिशाभूल करीत असल्याचा आरोप जुन्या बुद्धिबळ संघटनेचे अध्यक्ष धनंजय बेळे यांनी केला आहे. पुनरुज्जीवित केलेल्या संस्थेचे सेक्रेटरी मिलिंद कुलकर्णी यांनी बेळे यांच्या आरोपांचे खंडण केले असून, आम्हीच त्यांच्यावर फौजदारी कारवाई करणार असल्याचा दावा केला आहे.
--
नवीन जिल्हा बुद्धिबळ संघटना बोगस
नाशिक जिल्हा बुद्धिबळ संघटना ही २५ वर्षांची गौरवशाली परंपरा असलेली जिल्ह्यातील अत्यंत नामांकित संस्था असून, या संस्थेद्वारे तत्कालीन सर्व पदाधिकाऱ्यांनी वेळोवेळी स्पर्धा प्रशिक्षण शिबिरे व इतर आयोजनातून संस्थेचे कार्य व नाव भारतभर पोहोचविल्याचे सर्वांना ज्ञात आहे. संस्थेच्या घटना व नियमावलीनुसार झालेल्या नियुक्तीप्रमाणे नाशिक जिल्हा बुद्धिबळ संघटनेचा गेल्या काही वर्षांपासून आपण अध्यक्ष व संतोष मंडलेचा सचिव आहेत. त्यांच्या मार्गदर्शनाखाली संस्थेने जिल्हा पातळी, राज्य पातळी व आंतरराष्ट्रीय पातळीवरील स्पर्धांचे यशस्वी आयोजन केले आहे. जिल्ह्यात आंतरराष्ट्रीय मानांकित खेळाडू तयार करण्यासाठी, तसेच हा खेळ ग्रामीण भागात नेण्यासाठी या नेतृत्वाखाली संस्था सतत प्रयत्नशील आहे. मात्र, गेल्या काही दिवसांपासून नाशिक जिल्हा बुद्धिबळ संघटनेसंदर्भात खेळाडू, पालक आणि जनतेमध्ये चुकीच्या व भ्रामक बातम्या वर्तमानपत्रे व सोशल मीडियाच्या माध्यमातून पसरवून संभ्रमाचे वातावरण निर्माण करण्याचा प्रयत्न अनिल देवधर, मिलिंद कुलकर्णी व सुधीर पगार आणि त्यांचे सहकारी आपल्या वैयक्तिक स्वार्थापोटी करीत असल्याचे आढळून आले आहे. संस्थेद्वारे कुठलीही अधिकृत नियुक्ती झालेली नसताना, तसेच घटनेप्रमाणे अधिकृतरीत्या नियुक्ती झालेली नसतानाही तसे झाल्याचे भासवून आपण पदाधिकारी झाल्याचे खोटे सांगून खेळांकडून संस्थेची वार्षिक नोंदणीची रक्कम उकळण्याचे उद्योग तत्सम लोकांनी सुरू केले आहेत. या बनावट व्यक्तींनी सोशल मीडियाचा आधार घेऊन स्वतः संस्थेचे नवनिर्वाचित पदाधिकारी असल्याचे खेळाडू, पालक व जनतेला सातत्याने बिंबवून दिशाभूल चालवली आहे, तसेच संस्थेचे विद्यमान अध्यक्ष व पदाधिकारी यांची बदनामी चालविली आहे. संस्थेच्या नावाचा उल्लेख करून अनधिकृतरीत्या स्पर्धा आयोजनाचा घाट घालून या स्वयंघोषित अध्यक्ष, सचिव व बोगस पदाधिकाऱ्यांनी खेळाडू, पालक, संस्थाचालक व जनतेकडून पैसे जमा करून फसवणूक करण्याचा धंदा सुरू केला आहे. अधिकृत संस्थेतर्फे ए. पी. देवधर, मिलिंद कुलकर्णी, सुधीर पगार, हेमंत फडणीस, संदीप नागरे, ओंकार जाधव, नीलेश बहाळकर यांच्यावर कायदेशीर कारवाई सुरू केली आहे. त्यामुळे ती संबंधित संस्था बोगस आहे. लवकरच खऱ्या संस्थेच्या वतीने स्पर्धा जाहीर करण्यात येणार असून, त्यांची तारीख जाहीर करण्यात येईल.
-धनंजय बेळे, अध्यक्ष, नाशिक जिल्हा बुद्धिबळ संघटना
--
संबंधितांवर फौजदारी गुन्हे दाखल करणार
नाशिक जिल्हा बुद्धिबळ संघटना १६ सप्टेंबर १९७४ रोजी स्थापन झाली. या संस्थेत त्यावेळच्या नियमाप्रमाणे चार सभासद होते. त्याच्या काही वर्षांनंतर धनंजय बेळे स्वयंघोषित अध्यक्ष म्हणून मिरवू लागले. मात्र, कोणताही चेंज रिपोर्ट सादर न करता नाशिक जिल्हा बुद्धिबळ संघटनेवर बेळे अध्यक्ष कसे काय असू शकतात? अध्यक्ष अनिल देवधर, सचिव मिलिंद कुलकर्णी यांनी ३ फेब्रुवारी २०१७ रोजी नाशिक जिल्हा बुद्धिबळ संघटनेचा चेंज रिपोर्ट सादर केलेला आहे. स्थापनेनंतर सादर होणारा हा दुसरा चेंज रिपोर्ट आहे, ज्यावर धनंजय बेळे, मंगेश गंभिरे यांनी हरकत घेतली आहे. बेळेंना हरकत का घ्यावी लागली? काही महिन्यांपूर्वी तुषार गोसावी यांनी आपण सचिव नसल्याचा अधिकृत पत्रकाद्वारे खुलासा केला आहे. ‘एमसीए’ने संलग्नता देण्यासाठी चेंज रिपोर्टसह अनेक कागदपत्रे मागितली होती. ही कागदपत्रे ते न देऊ शकल्याने अखेरीस ‘एमसीए’ने २० एप्रिल २०१५ रोजी नाशिक डिस्ट्रिक्ट चेस असोसिएशनची मान्यता काढून घेतली. नाशिकमध्ये पहिली रेटिंग टुर्नामेंट ‘एआयसीएफ’ व ‘एमसीए’च्या मान्यतेने दि. २५ ते २९ जुलै २०१५ दरम्यान व दुसरी ‘एआयसीएफ’ व ‘एमसीए’च्या मान्यतेने दि. १७ मे ते २३ मे २०१६ दरम्यान घेण्यात आली होती. नाशिकमधील माॅर्फी चेस अॅकॅडमीनेसुद्धा तिसरी रेटिंग टुर्नामेंट घेतली. या सर्व स्पर्धा नाशिक जिल्हा बुद्धिबळ संघटनेशिवाय झाल्या. मग तेव्हा बेळे अध्यक्षपदाचा दावा करीत पुढे का आले नाहीत? मुलांकडून फी घेऊनही ती न भरल्याने बेळे यांच्यावर आता महाराष्ट्र बुद्धिबळ संघटना लवकरच फौजदारी कारवाई करण्याच्या विचारात आहे. ‘एमसीए’ची संलग्नता अखिल भारतीय बुद्धिबळ महासंघ (एआयसीएफ) यांनी ५ जानेवारी २०१७ रोजी काढून घेतली आहे. त्यामुळेच ‘एआयसीएफ’ने महाराष्ट्रात हंगामी समिती नियुक्त केली होती. त्यानंतर १ एप्रिल २०१७ रोजी ‘एआयसीएफ’ने ऑल मराठी बुद्धिबळ संघटना हिला संलग्नता दिली आहे. त्यांनी सर्वांना खोट्या भूलथापा देऊन, तसेच नाशिकमधील खेळाडूंना वेठीस धरण्याचा प्रयत्न केला आहे. तसे पुरावे आमच्याकडे आहेत व खेळाडूंनी टुर्नामेंट खेळू नये, असे पत्रक काढून एकप्रकारची दहशत निर्माण केलेली आहे. त्यांच्यावर ५२ हजार २९५ रुपये हडपल्याचा व नाशिकमधील खेळाडूंचे अतोनात नुकसान केल्याबद्दल, तसेच आमची मानहानी केल्याबद्दल क्रिमिनल दावा दाखल करणार आहोत.
-मिलिंद कुलकर्णी, सेक्रेटरी, नाशिक जिल्हा बुद्धिबळ संघटना
मोबाइल अॅप डाउनलोड करा आणि राहा अपडेट
