मालेगाव स्टॅण्ड येथील दारू दुकाने बंद करण्यासाठी परिसरातील नागरिकांनी रविवारी जनआंदोलन केले. महिला, मुलांनी गांधीगिरी करीत दुकानमालकास दुकान बंद करण्याविषयीचे पोस्टर, पुष्पगुच्छ, शाल भेट दिली. परिसरातील मुला-मुलींच्या भविष्यासाठी व महिलांच्या संरक्षणासाठी ही दुकाने कायमस्वरुपी बंद करावीत, अशी विनंती यावेळी करण्यात आली.
पंचवटीतील बरीचशी दारू दुकाने महामार्गालत असल्यामुळे ती बंद झाली. मात्र, जुना मुंबई-आग्रा महामार्गावर असलेल्या मालेगाव स्टॅण्ड येथे दोन देशी दारू दुकान, एक वाइन शॉप आणि एक बिअर बार यांना अभय मिळाले. इतर सर्व दारू दुकाने बंद असल्यामुळे येथील दुकानांवर गर्दी वाढली. या गर्दीचा त्रास येथील नागरिकांना होऊ लागला आहे. त्यासंदर्भात येथील नागरिकांनी जिल्हाधिकारी, पोलिस आयुक्त आणि उत्पादन शुल्क विभागाला निवेदन देऊन ही दुकाने बंद करण्याची मागणी केली होती. मागणी करून पंधरा दिवसांचा कालावधी झाला तरी त्याबाबत विचार झालेला दिसला नसल्याने हे आंदोलन करण्यात आले.
येथील दारू दुकानांमुळे महिला व मुले असुरक्षित झाली आहेत. गुंडांचा आणि चोरांचा वावर वाढला आहे. स्थानिकांवर त्यांची दादागिरी वाढली असून, अपघातांचे प्रमाणही वाढले आहे. सायंकाळच्या वेळी महिलांना घरातून बाहेर पडणे मुश्किल झाले आहे. या त्रासांना येथील रहिवासी वैतागले असल्याचे मालेगाव स्टॅण्ड मित्रमंडळाचे म्हणणे आहे. त्यामुळे ही दुकाने बंद करण्याची मागणी करण्यात आली. सुमारे तासभर चाललेले हे जनआंदोलन शांततेत करण्यात आले. दारू दुकाने हटलीच पाहिजेत अशा घोषणा देण्यात आल्या.
येथील अशोक ब्रदर्स आणि हिरामण पवार यांची दुकाने बंद होती. न्यू पंजाब रेस्टॉरंट अॅण्ड बिअर बार व एस. पी. लोणारी ही दोन दुकाने सुरू होती. त्या दुकानदारांचा सत्कार करून त्यांना दुकाने बंद करण्याची विनंती करण्यात आली. माजी मंत्री डॉ. शोभा बच्छाव, नगरसेवक कमलेश बोडके, गुरुमित बग्गा, विमल पाटील, नंदिनी बोडके, दारूबंदी जनआंदोलन समितीच्या महानगरप्रमुख दीप्ती गायकवाड, लक्ष्मी शिरसाठ डॉ. दिनेश बच्छाव, खंडू बोडके आदी या आंदोलनाप्रसंगी उपस्थित होते.
जेलरोडला निदर्शने
नाशिकरोड ः जेलरोडच्या दसक येथील मामाज् बार अॅण्ड वाइन शॉप बंद करण्याच्या मागणीसाठी जिल्हा काँग्रेस समितीतर्फे दुकानासमोर नुकतीच निदर्शने करण्यात आली. यावेळी समितीचे ग्रामीण जिल्हाध्यक्ष शालीग्राम बनसोडे, महिला जिल्हाध्यक्षा मंदाकिनी गायकवाड, रावसाहेब गायकवाड, शाम क्षत्रिय, मुक्तार शेख, शाहीदखान पठाण आदी उपस्थित होते.
मोबाइल अॅप डाउनलोड करा आणि राहा अपडेट