म. टा. प्रतिनिधी, नाशिक
नाशिककरांच्या चर्चेत असलेला ‘हॅप्पी स्ट्रीट्स’ उपक्रम यंदा पुन्हा नाशिकरोडकरांना अनुभवायला मिळणार आहे. रॉक बॅण्ड, गिटार, पोलिस बॅण्‍डसह विविध खेळ, पेंटिंग अशा धम्माल मौजमस्तीची मेजवानी नागरिकांना मिळणार आहे.
बिटको चौक ते कोठारी कन्या शाळा या मार्गावर १४ मे रोजी सकाळी ७ ते ९.३० या वेळेत ‘हॅप्पी स्ट्रीट सीझन ३’ ला सुरुवात होईल. सुरुवातीला झुंबा आणि विविध प्रकार सादर होतील. या उपक्रमात सहभागी होण्यासाठी कोणत्याही प्रकारचे रजिस्ट्रेशन करण्याची गरज नाही. केवळ धमाल करायची आहे. ही धमाल करण्यासाठी कुठलीही वयोमर्यादा नाही. आजी-आजोबांनी आपल्या सुना-मुलं आणि नातवांसह हजेरी लावली तरी चालणार आहे. आपल्या प्रतिभेला चालना देण्यासाठी हा उपक्रम निश्चित महत्वाचा ठरणार आहे.
जेलरोडला होणाऱ्या हॅप्पी स्ट्रीट्समध्ये राजू दाणी आणि ग्रुपतर्फे, नेल आर्ट, मेहंदी, फेस पेंटिंग, कॅनव्हास पेंटिंग, शॉपिंग बॅग मेकिंग, स्केच आर्ट, अॅबस्ट्रॅक्ट पेंटिंग इत्यादी प्रकार सादर केले जाणार आहेत. यावेळी उपस्थितांना हे प्रकार करून घेता येतील. यावेळी नाशिकरोडकरांसाठी खास रॉक बॅण्ड शोचे आयोजन करण्यात आले आहे. यावेळी इंडियन क्लासिकल व वेस्टर्न क्लासिकल गीतांचे प्रकार सादर केले जाणार आहेत. कॅलिग्राफी सादर करण्यासाठी प्रख्यात सुलेखनकार चिंतामण पगार व नीलेश गायधनी हे नागरिकांना यातील बारकावे समजावून सांगणार आहेत. त्याचप्रमाणे ते कसे करायचे व त्यासाठी कोणकोणत्या साधनांचा वापर करायचा, याची माहिती देणार आहेत. मोहन उपासनी व रवींद्र जोशी हे बासरी वादन करणार आहेत. प्रतीक हिंगम‌िरे आणि अर्चना पेखळे हे झुम्बाचे प्रात्यक्षिक दाखवून नागरिकांकडून करुन घेणार आहेत. मंदार यांचे फोटो एक्झिब‌िशन होणार असून, अनिकेत जाधव रॉक बॅण्ड शो सादर करणार आहे. हर्षल शिंदे हे ग्राफोलॉजिस्ट हा प्रकार नाशिककरांना दाखवणार आहे. नरेंद्र पुली आणि त्यांचा शिष्यगण यावेळीही गिटार वादन करणार असून यावेळी जुन्या आणि नव्या गाण्यांच्या संगीताचा नजराणा पेश करणार आहेत. सौरभ हे टॅटू आर्टिस्ट उपस्थितांना टेम्पररी टॅटू काढून देणार आहेत. त्याचप्रमाणे विविध शाळांचे विद्यार्थी व विद्यार्थिनी स्ट्रीट पेंटिंग करणार आहेत. तसेच विविध ग्रुपद्वारे ग्रुप डान्स सादर करण्यात येणार असून, यावेळी वेस्टर्न व बॉलीवूड डान्समधील नवीन प्रकार हे आकर्षणाचे केंद्रबिंदू ठरणार आहेत. प्रेमदा दांडेकर या उपस्थितांना रांगोळीचे विविध प्रकार दाखवणार आहेत. विजयराज हे जादूचे प्रयोग, हरीश- कॅरीकेचर, उमेश मार्शल आर्टस, दंडे ज्वेल्सचे संचालक मिं‌लिंद दंडे यांच्यातर्फे महिलांचे ढोल पथक आपली कला पेश करणार आहे. ‘मटा’च्या उपक्रमाला नाशिककर वाचकांनी नेहमीच भरभरुन प्रतिसाद दिला आहे. यावेळीदेखील असाच प्रतिसाद द्यावा, असे आवाहन मटातर्फे करण्यात आले आहे.
कलाकारांनी येथे संपर्क साधावा
या उपक्रमात ज्यांना आपली कला सादर करायची इच्छा आहे, अशा कलावंतांनी कमलेश घरटे, महाराष्ट्र टाइम्स, अल्फा स्क्वेअर, डीसुझा कॉलनी, कॉलेजरोड येथे ०२५३- ६६३७९८७ या क्रमांकावर किंवा ७०४०७६२२५४ या मोबाइलवर अथवा प्रत्यक्ष संपर्क साधावा. योग्य कलाकृती असल्यास प्राधान्य देण्यात येईल.
मोबाइल अॅप डाउनलोड करा आणि राहा अपडेट
