म. टा. वृत्तसेवा, सिन्नर फाटा
नाशिकरोड विभागात सहा प्रभागमिळून महापालिकेच्या मालकीची तब्बल १२२ उद्याने आहेत. मात्र, गेल्या अनेक वर्षांपासून या उद्यानांच्या देखभालीकडे उद्यान विभागाचे दुर्लक्ष झाल्याने सध्या बहुतांश उद्याने नावापुरतीच उरली आहेत. मोजकीच उद्याने काहीशी सुस्थितीत असून, शहरातील इतर उद्याने भकास झालेली आहेत. अशी कागदोपत्रीच शिल्लक राहिलेली शंभरावर उद्याने ती ‘जोपासण्यासाठी’ जनतेच्या पैशांचा मात्र खोऱ्याने वापर सुरू असल्याचा आरोप केला जात आहे.
नाशिकरोडला उद्यानांसाठी तब्बल ७० एकर जागा वापरण्यात आलेली आहे. या उद्यानांशिवाय एक नर्सरी, सर्व रोड डिव्हायडर्स व तीन वाहतूक बेटे यांच्या देखभालीची जबाबदारी उद्यान विभागाकडे आहे. २०१२ ते २०१७ या पाच वर्षांत यातील दोन-चार उद्यानांशिवाय एकाही उद्यानाची देखभाल महापालिकेने केलेली नाही.परिणामी ही सर्व उद्याने ट्री लेस झाली असून, ती उघडी-बोडकी बनली आहेत.
--
समस्यांचा संपेना फेरा
१२२ उद्यानांपैकी सुमारे १२० उद्याने हिरवळीअभावी पूर्णपणे भकास झाली आहेत. या उद्यानांत वाळलेले गवत, खुरटी झुडपे, कचऱ्याचे ढीग, दगड, उखडलेले पेव्हर ब्लॉक, ढासळलेल्या भिंती, तुटलेले गेट, तुटलेली खेळणी, सुकलेली झाडे, मद्यपींचा वाढलेला वावर असे चित्र सध्या बघायला मिळत आहे. स्थानिक नागरिकांकडून जनावरे बांधण्यासाठीही काही उद्यानांचा वापर होताना दिसून येतो. या उद्यानांतील पथदीपही बंद आहेत. त्यामुळे ही उद्याने असून, अडचण नसून खोळंबा ठरत आहेत.
--
खासगी ठेकेदाराचे दुर्लक्ष
नाशिकरोड प्रभागातील उद्यानांच्या दैनंदिन देखभालीचा ठेका पालिकेने अस्मिता मजूर बांधकाम सोसायटीला तीन वर्षांसाठी दिला आहे. हा ठेका जानेवारी २०१७ पासून दिला आहे. मात्र, या खासगी ठेकेदाराकडून या उद्यानांच्या दैनंदिन देखभालीकडे दुर्लक्ष केले जात आहे. कोणत्याही उद्यानाचे रुपडे पालटल्याचे अद्यापही दिसून आलेले नाही. परिसरातील मुक्तिधामजवळील सोमाणी गार्डन व लोकमान्य उद्यान या दोन उद्यानांचीच स्थिती बऱ्यापैकी आहे. सोमाणी उद्यानात नव्याने खेळणी बसविली आहेत. पण, ती अपुरी पडत आहेत. येथील स्टेज, बाके यांची दुरवस्था कायम आहे. लोकमान्य उद्यानाची देखभाल काही वर्षांपासून नगरसेवक संभाजी मोरुस्कर यांच्या पुढाकारातून होत असल्याने या उद्यानातील हिरवळ टिकून आहे. प्रवेशद्वारावरील नावाची अक्षरे मात्र निखळली आहेत.
--
अपुऱ्या मनुष्यबळाचा फटका
नाशिकरोड विभागाचे उद्यान निरीक्षक बी. टी. कटारे यांच्याकडे नाशिकरोडसह महापालिकेच्या सातपूर व नाशिक पूर्व या विभागांचीही जबाबदारी आहे. त्यामुळे अर्ध्या शहराचा कारभार त्यांना पाहावा लागत आहे. उद्यान व वृक्ष प्राधिकरण विभागाकडे सध्या केवळ २९ कर्मचारी कार्यरत आहेत. परिणामी अशा अपुऱ्या मनुष्यबळामुळे सर्व उद्याने भकास झाली आहे.
--
येथे होतेय दुर्लक्ष
परिसरातील नेहरू उद्यान, जय भवानीरोडवरील लवटेनगर उद्यान, चेहेडी गाव, अश्विनी कॉलनी, विद्याविहार, वडारवाडी उद्यान आदी उद्यानांत दररोज मद्यपींचा अड्डा जमलेला असतो. शिखरेवाडी उद्यानालाही मद्यपींचा विळखा पडलेला आहे. या व अन्य ठिकाणच्या उद्यानांचा वापर सर्रास कचरा टाकण्यासाठी केला जातो. परिणामी या उद्यानांना कचरा कुंडीचे स्वरूप आलेले आहे. मराठा कॉलनी, नेहरू उद्यान, सोमाणी उद्यानाला अतिक्रमणधारकांचा विळखा पडला आहे. काही उद्यानांत ग्रीन जिम बसविण्यात आल्याने उद्यानांच्या मूळ हेतूलाच हरताळ फासला गेला आहे. काही उद्यानांना वर्षभर टाळे लावलेले आढळून येते.
--
शहरातील बहुतांश उद्याने कचराकुंडी बनलेले आहेत. गवत, कचरा, झुडपे वाढली असून, महापालिकेने एकाही उद्यानाची काळजी घेतली नसल्याने उद्याने हरविली आहेत.
-विजय बिडवे, नागरिक
--
शहरातील उद्यानांच्या देखभालीसाठी खासगी ठेकेदार नेमले आहेत. काही उद्यानांच्या कामांच्या फायलींना मंजुरी दिली आहे. काही प्रतीक्षेत असल्याने लवकरच उद्यानांची स्थिती बदलेल.
-बी. यू. मोरे, उद्यान अधीक्षक, महापालिका
--
विभागातील चित्र असे
प्रभाग क्रमांक-उद्याने संख्या- एकूण क्षेत्रफळ (एकर)
१७ ३८ २०
१८ १७ ९.९
१९ ०५ ३.२
२० २६ १७
२१ २९ १६
२२ ०७ ०४
एकूण १२२ ७०
मोबाइल अॅप डाउनलोड करा आणि राहा अपडेट
