म. टा. वृत्तसेवा, सिन्नर फाटा
स्वतःच्या घरी संपत्ती अन् समृद्धी सर्व काही पुरेसे असूनही केवळ रक्ताच्या नात्यांनीच अव्हेरल्याने ‘मातोश्री’ वृद्धाश्रमाच्या आश्रयाला असलेल्या ६५ ज्येष्ठ नागरिकांच्या जीवनात सोमवारी ‘खुशी’ फुलली. जागतिक कुटूंब दिनाच्या दिवशी नाशिकच्या ‘मानव उत्थान मंच’ ने ‘खुशी’ प्रकल्पाचा श्रीगणेशा केल्याने या ज्येष्ठांची कौटूंबिक स्नेह व प्रेमाची उणीव भरुन निघाली.
नाशिकच्या ‘मानव उत्थान मंच’च्या वतीने सामनगाव येथील मातोश्री वृद्धाश्रमात जागतिक कुटूंब दिनी ‘खुशी’ प्रकल्पाची सुरुवात झाली. माधवी घुमसाना, मानसी राका, ज्युलिएस ठकोरिया, अजिंक्य जाधव या आर्किटेक्चर कॉलेजच्या विद्यार्थ्यांच्या व चंदर नरसिंघानी या लॉ कॉलेजच्या विद्यार्थ्यांच्या संकल्पनेतून ‘खुशी’ हा प्रकल्प आकाराला आला आहे. सोमवारी या प्रकल्पाच्या लोगोचे पेंटिंग करुन या प्रकल्पाचे उद्घाटन करण्यात आले. यावेळी उपस्थित सर्व ज्येष्ठ नागरिकांना मानव उत्थान मंचच्या कार्यकर्त्यांनी नाश्‍ता दिला. ज्येष्ठ महिलांच्या हातावर मेहेंदी काढली.
विविध सोयी सुविधा उभारणार
‘खुशी’ प्रकल्पाद्वारे ‘मातोश्री’ वृद्धाश्रमात वास्तव्यास असणाऱ्या ज्येष्ठांसाठी या ठिकाणी विविध सोयी सुविधा उभारल्या जाणार आहेत. या कामासाठी घोटी येथील जिंदाल कंपनीतील कामगारांसह दिल्ली व दुबई येथील नागरिकांनी आर्थिक मदत केली आहे. ‘खुशी’च्या पहिल्या टप्प्यात या वृद्धाश्रमातील इमारतींच्या रंगरंगोटीसह आकर्षक गार्डन उभारले जाणार आहे. याशिवाय प्रत्येक इमारतीभोवती वृक्षांची लागवड केली जाणार आहे. ज्येष्ठांच्या करमणुकीसाठी एक अॅक्ट‌िव्ह‌िटी सेंटरही उभारले जाणार आहे. त्यासाठी आवश्यक साहित्यही सोमवारी ‘मानव उत्थान‘मंच’ने वृद्धाश्रमाला दिले. ‘खुशी’च्या दुसऱ्या टप्प्यात या वृद्धाश्रमातील सर्व ज्येष्ठांची महिन्यातून एकदा सहल, जेवण, वैद्यकीय तपासणी व औषधोपचार केले जाणार असल्याची माहिती जसवीर सिंग यांनी दिली.
‘खुशी’साठी यांनी दिला निधी
‘मदर्स डे’ निमित्ताने हिना पटेल, सीमा चौधरी, दक्षा भामरे, अफशा ताहेरी, दीप्ती चिटणीस, सुजाता खत्री, नीती चौहाण, अर्चना गुप्ता, पिंकी शर्मा, मीना बिस्ट, सरोज ज्याला, मंजू गोयल, ज्योती शर्मा, रीना ग्रोव्हर, बिन्नी शानी, लक्ष्मी मेहरा, अंजली गोस्वामी, शुभम गांजरे, रिचा शिंदे, नीरज कदम आदींनी ‘खुशी’ साठी स्वखुशीने निधी दिला. याप्रसंगी जगबीरसिंग, सचिन पाटील, निर्मल गोदा अभियानचे नितीन शुक्ला, नितीन राऊत, जितेंद्र भावे, ‘आवास’च्या भारती जाधव, सुनंदा जाधव, नेहा राऊत, पंकज जोशी, सौरभ चव्हाण, राजू बेहरा आदींनीही या उपक्रमात सहभागी होऊन ज्येष्ठांच्या जीवनात ‘खुशी’ निर्माण करण्याचा प्रयत्न केला.
वृद्धाश्रमातील ज्येष्ठांचे जगणे सुखकर नसल्याचे बघून वाईट वाटे. त्यांची एकटेपणाची जाणीव दूर व्हावी व ते खूश रहावेत यासाठी ‘खुशी’ उपक्रमाचे नियोजन केले.
-मानसी राका, आर्किटेक्चर विद्यार्थिनी
वृद्धाश्रमातील नागरिकांची परिस्थिती अत्यंत हलाखीची आहे. उच्च शिक्षणातून मिळालेल्या ज्ञानाचा वापर या ज्येष्ठांच्या जीवनात ‘खुशी’ भरण्यासाठी करणार आहे.
-माधवी घुमसाना, आर्किटेक्चर विद्यार्थिनी
मोबाइल अॅप डाउनलोड करा आणि राहा अपडेट
