राज्यातील वाढत्या शेतकरी आत्महत्या आणि राज्य सरकारचे या आत्महत्येकडे होणाऱ्या दुर्लक्षामुळे शिवसेना आक्रमक झाली असून राज्यातील शेतकऱ्यांच्या प्रश्नाला वाचा फोडण्यासाठी पहिले कृषी अधिवेशन शुक्रवारी (दि. १९) नाशिकमध्ये होणार आहे.
अधिवेशानला पक्षप्रमुख उद्धव ठाकरेच उपस्थित राहणार असल्याने शिवसेनेने हे अधिवेशन यशस्वी करण्यासाठी सर्व शक्ती पणाला लावली आहे. उद्योगमंत्री सुभाष देसाई आणि खासदार संजय राऊत यांनी शिवसेना नेत्यांची बैठक घेत बुधवारी अधिवेशनाच्या तयारीचा आढावा घेतला. शिवसेनेचे शेतकऱ्यांसाठीचे अधिवेशन यशस्वी करा, असे आवाहन त्यांनी यावेळी नेत्यांनी पदाधिकारी व कार्यकर्त्यांना केले.
देसाई आणि राऊत यांनी बुधवारी पक्षाच्या उत्तर महाराष्ट्रातील प्रमुख पदाधिकाऱ्यांची बैठक घेतली. यावेळी संपर्कप्रमुख अजय चौधरी, जिल्हा प्रमुख विजय करंजकर, महानगरप्रमुख अजय बोरस्ते, जिल्हा परिषद अध्यक्षा शीतल सांगळे, आमदार राजाभाऊ वाजे यांच्यासह सर्व जिल्हांचे पदाधिकारी उपस्थित होते.
शेतकरी कर्जमुक्तीसाठी शिवसेनेने सरकारविरोधात आरपारची लढाई लढण्याचा निर्णय घेतला आहे. ‘मी कर्जमुक्त होणारचं, गर्जतो शेतकरी’ अशी गर्जना या अधिवेनात शिवसेनेच्या वतीने केली जाणार आहे. शेतकऱ्यांच्या प्रश्‍नांना एक वैचारिक अधिष्ठान लाभावे, यासाठी या अधिवेशनाचे आयोजन करण्यात आले आहे. यात स्वाभिमानी शेतकरी संघटनेचे नेते खासदार राजू शेट्टी, काँग्रेसचे विनायकदादा पाटील यांच्यासह शेतकऱ्यांचे प्रतिनिधीही सहभागी होणार आहेत.
अधिवेशनातून थेट सरकारलाच आव्हान दिले जाणार आहे. या अधिवेशनासाठी शिवसेनेच सर्व मंत्री, खासदार आणि आमदार सहभागी घेणार आहे. त्यामुळे या अधिवेशाच्या तयारीचा आढावाही यावेळ देसाई आणि राऊत यांनी घेतला आहे. यावेळी पदाधिकाऱ्यांना जबाबदारीचे वाटपही करण्यात आले असून कोणत्याही परिस्थितीत हे अधिवेशन यशस्वी करा, असे आवाहन यावेळी नेत्यांनी केले.
मोबाइल अॅप डाउनलोड करा आणि राहा अपडेट
