शेतकऱ्याला इमारती बांधण्यासाठी कर्जमुक्ती नकोय. शाही थाटात लग्न लावण्यासाठी कर्जमुक्ती नकोय. आलिशान कार खरेदी करता यावी यासाठी कर्जमुक्ती नकोय. साहेब, लेकीच्या कन्यादानापर्यंत तिचा बाप टिकला पाहिजे म्हणून तरी शेतकऱ्याला कर्जमुक्ती द्या, अशी आर्त विनवणी प्रियंका जोशी या मुलीने शुक्रवारी शिवसेनेच्या पदाधिकाऱ्यांना केली. प्रियंकासह आणखी काही शेतकरी कुटुंबातील सदस्यांनी व्यक्त केलेल्या मनोगताने उपस्थितांच्या डोळ्यांच्या कडा ओलावल्या.
शिवसेनेच्या वतीने नाशिक येथे आयोजित कृषी अधिवेशनात राज्याच्या विविध भागातून आलेल्या शेतकऱ्यांनी भावनांना वाट मोकळी करून दिली. यावेळी प्रियंका जोशी या मुलीने शेतकऱ्यांच्या व्यथा पोटतिडकीने मांडल्या. ती म्हणाली, होय आम्ही मागतोय कर्जमुक्ती. परंतु, ही कर्जमुक्ती घेऊन शेतकऱ्याला इमारती बांधायच्या नाहीत. शाही लग्नसोहळे करायचे नाहीत. तर आमचा बाप आमच्या कन्यादानापर्यंत टिकला पाहिजे म्हणून आम्हाला कर्जमुक्ती हवी आहे. बाप रात्री अपरात्री बारे देण्यासाठी घरातून बाहेर पडतो. परंतु, तो पुन्हा घरी येईल की नाही याची खात्री आता राहिलेली नाही. संकटाच्या आझ्यामुळे तो आपली जीवनयात्रा संपवू शकतो. म्हणूनच सरकारने प्रत्येक शेतकऱ्याच्या गळ्याजवळ सीसीटीव्ही कॅमेरे बसवावेत अशी मागणी प्रियंका हिने केली. शेतकऱ्याने पिकविलेल्या मालास बाजारभाव दिला जात नाही. परंतु, या मालावर प्रक्रिया करणारे उद्योगपती गब्बर होत आहेत. असा उलटा न्याय का, असा सवाल प्रियंका हिने उपस्थित केला. हुंडा प्रत्येक क्षेत्रामध्ये घेतला जातो. पण आत्महत्या शेतकऱ्याचीच मुलगी करते, याकडेही तिने उपस्थितांचे लक्ष वेधले.
शेतकऱ्याला वेतन सुरू करा
सहकार राज्यमंत्री गुलाब पाटील यावेळी म्हणाले, ‘तरुण २१ व्या वर्षी नोकरीला लागतो. ५८ व्या वर्षी निवृत्त होतो. त्याला वेतन आणि पेन्शन मिळते. आमचा शेतकरी वयाच्या दहाव्या वर्षापासून मरेपर्यंत शेतात काम करतो. त्यालाही सरकारने वेतन द्यायला हवे, अशी मागणी पाटील यांनी केली. एक जूनपासून पेरणी सुरू होणार आहे. पण शेतकऱ्यांकडे पैसा नाही. ३५० कोटींच्या नोटा जिल्हा बँकांकडे पडून आहेत. राष्ट्र‌ियीकृत बँका कर्ज द्यायला तयार नाहीत. या प्रश्नावर तोडगा निघायला हवा, अशी अपेक्षा पाटील यांनी व्यक्त केली.
सर्वपक्षियांनी एकत्र यावे
निसर्ग, शासन, वित्तीय संस्था आणि बाजारपेठा या चौकटीत देशातील शेतकरी अडकला आहे. या चौकटीच्या मर्जीवरच शेतकऱ्याचा कारभार चालतो. त्यामुळे शेतकरी आता संकटात सापडला असून, त्याला शासनाची बदललेली धोरणेही जबाबदार असल्याचे वनाधिपती विनायकदादा पाटील यांनी स्पष्ट केले. शेतकऱ्यांचे प्रश्न हे दहा तोंडासारखे असून प्रत्येक तोंड वेगवेगळ्या आवाजात बोलत असल्याने गुंता वाढला आहे. कर्जमुक्तीवरून पाटील यांनी शेतकऱ्यांना खडे बोलही सुनावले. त्यामुळे शेतकऱ्यांनी पाटील यांच्या भाषणावेळी टाळ्या वाजवण्यास सुरुवात केली. त्यामुळे पाटील यांनी आपले भाषण आटोपते घेतले.
मोबाइल अॅप डाउनलोड करा आणि राहा अपडेट
