म. टा. खास प्रतिनिधी, नाशिक
स्वातंत्र्यवीर सावरकरांच्या देशभक्तीवर शंका उपस्थित करणारे आणि अंदमानच्या कारागृहातून सावरकरांच्या नावाची पट्टी काढणारे काँग्रेसचे तत्कालीन नालायक मंत्री हेच खरे देशद्रोही आहेत, अशी घणाघाती टीका मुख्यमंत्री देवेंद्र फडणवीस यांनी केली. दहा दिवस तरी काळ्या पाण्याची शिक्षा भोगवून दाखवावी, असे आवाहन फडणवीस यांनी तत्कालीन मंत्री मणिशंकर अय्यर यांना दिले.
सावरकरांच्या जन्मोत्सवानिमित्त त्यांचे जन्मगाव भगूर येथे विशेष कार्यक्रमात ते बोलत होते. मुख्यमंत्री फडणवीस यांनी सावरकर वाड्याला भेट देऊन अभिवादन केले. यावेळी पालकमंत्री गिरीश महाजन, खासदार हरिश्चंद्र चव्हाण, आमदार बाळासाहेब सानप, देवयानी फरांदे, सीमा हिरे, महापौर रंजना भानसी, स्वातंत्र्यवीर सावरकर जन्मोत्सव समितीचे निमंत्रक प्रसाद लाड, मुख्यमंत्र्यांचे प्रधान सचिव मिलिंद म्हैसकर, नगरविकास विभागाच्या प्रधान सचिव मनीषा म्हैसकर, विभागीय आयुक्त महेश झगडे, जिल्हाधिकारी राधाकृष्णन बी., मुख्य कार्यकारी अधिकारी दीपककुमार मीना, सहायक जिल्हाधिकारी अमोल एडके, भगूरच्या नगराध्यक्षा अनिता करंजकर आदींसह मान्यवर उपस्थित होते. तत्पूर्वी, मुख्यमंत्र्यांनी भगूर येथील स्वातंत्र्यवीर सावरकरांच्या स्मारकाला भेट देत पाहणी केली. त्यानंतर स्मारकामधील त्यांच्या पुतळ्यास पुष्पहार अर्पण करून अभिवादन केले.
स्वातंत्र्यवीर सावरकरांनी समाजातील जातीभेद, विषमता याबरोबरच रुढी, परंपरा नष्ट करण्यासाठी प्रयत्न केले. सावरकरांसारखा दुसरा स्वातंत्र्य सैनिक होणे नाही. देशभक्त, कवी, समाजसुधारक असलेल्या सावरकर यांच्यासारख्या भारतमातेच्या तेजस्वी सुपुत्राच्या घराचे दर्शन मंदिराच्या दर्शनापेक्षा जास्त पवित्र असल्याची भावना मुख्यमंत्री फडणवीस यांनी व्यक्त केली.
भारतभूमीला इंग्रजांच्या जोखडातून मुक्त करण्यासाठी सावरकरांनी आपले जीवन मातृभूमीला अर्पण केले. ते क्रांतिकारकांचे प्रेरणास्त्रोत होते. त्यांच्या तेजाने क्रांतिकारकांची पिढी निर्माण करण्याचे कार्य केले. अनेकदा अपमान आणि अन्याय सहन करून ही देशसेवेचा विचार सावरकरांनी कधीच ढळू दिला नाही. हे त्यांच्या जीवनातील मोठेपण होते. अंदमान येथे काळ्यापाण्याची शिक्षा भोगतांना भारतमातेच्या उज्ज्वल भवितव्यासाठी सावरकर सतत कार्यरत राहिले. इंग्रजांनी क्रांतिकारकांमध्ये दहशत निर्माण करण्यासाठी अनेकदा त्यांचा तेजोभंग करण्याचा प्रयत्न केला. मात्र, त्यांनी परिस्थितीला शरण न जाता तरुण पिढीत देशभक्तीचे स्फूल्लिंग चेतविले. त्यांच्या तेजाने क्रांतिकारकांची वसाहत निर्माण करण्याचे कार्य केले. अंदमानच्या कारागृहातही त्यांनी कैदांना एकत्र करून देशभक्तीचे धडे दिले. देशात जातीव्यवस्था, रुढी व परंपरा आहे तोपर्यंत भारत गुलाम राहील, याची त्यांना जाणीव होती. त्यामुळे त्यांनी या परंपरा तोडण्यासाठी प्रयत्न केले. त्यांच्या विचारांपासून प्रेरणा घेऊन त्यांना अभिप्रेत असलेले विचार अनुसरण्याचा प्रयत्न सर्वांनी करावा, असे आवाहन मुख्यमंत्र्यांनी केले. सावरकरांच्या साहित्य क्षेत्रातील योगदानाचा उल्लेख करून त्यांनी मराठी भाषेला समृद्ध करण्याचा प्रयत्न केला. स्वातंत्र्यप्राप्तीनंतरही सावरकरांच्या महान कार्याची दखल पाहिजे, तशी घेतली गेली नाही, अशी खंतही मुख्यमंत्र्यांनी यावेळी व्यक्त केली.
यावेळी पालकमंत्री महाजन म्हणाले, की सावरकरांनी त्याग, देशप्रेम व सहनशिलतेची शिकवण दिली. त्यांचा जीवनलेख सुवर्णाक्षरांनी लिहिण्यासारखा आहे. सावरकारांसारखे राष्ट्रप्रेमी भगूरच्या मातीतून घडले याचा जिल्हावासीयांना अभिमान आहे. त्याग आणि सहनशीलतेची शिकवण देणाऱ्या सावरकरांच्या स्मारकाचे जतन करण्यासाठी मुख्यमंत्र्यांनी यापूर्वीच ६५ लाखांचा निधी उपलब्ध करून दिल्याची माहिती त्यांनी दिली.
काँग्रेसचे मंत्री देशद्रोही
काँग्रेसने सावरकरांना कधीही स्वीकारले नाही. सावरकर यांच्यावर कायम अन्याय झाला. १९४७ च्या आधी ब्रिटिशांनी अन्याय केला. त्यानंतर राजकारण्यांनी अन्याय केला. त्या कालच्या राज्यकर्त्यांना सावरकर यांच्या प्रतिभेतून आपण झाकोळून जाऊ ही भीती होती. म्हणूनच त्यांनी सावरकरांना कधी मोठे होऊ दिले नाही. त्यांच्या काव्यपंक्ती तर एका तत्कालीन नालायक मंत्र्याने काढून टाकल्या. एसी गाड्यातून फिरणाऱ्या या मंत्र्यांनी दहा दिवस तरी अंदमानला जाऊन राहावे, असे खुले आव्हान देत मुख्यमंत्र्यांनी नाव न घेता काँगेस आणि मणीशंकर अय्यर यांच्यावर टीका केली.
संग्रहालयासाठी मदत
स्वातंत्र्यवीर सावरकरांचे जन्मस्थान असलेल्या भगूरमध्ये देश-विदेशातील पर्यटकांना आकर्षित करण्यासाठी संग्रहालय उभारण्याची मागणी पालकमंत्री गिरीश महाजन यांनी मुख्यमंत्र्याकडे केली. मुख्यमंत्र्यांनीही त्यांच्या मागणीला प्रतिसाद दिला संग्रहालय झाले पाहिजे असे सांगत, संग्रहालयाची संकल्पना तयार करा, सरकार आपल्या पाठीशी असल्याचे सांगून योग्य ती मदत दिली जाईल, असे आश्वासन यावेळी दिले.
मंदिरापेक्षा पवित्र स्थळ
सिन्नर फाटा : स्मारकस्थळी अभिप्राय नोंदवहीत मुख्यमंत्र्यांनी अभिप्राय नोंदविला. तेजस्विता, तपस्विता आणि त्यागाचे मूर्तीमंत उदाहरण असलेले स्वातंत्र्यवीर सावरकर लक्षावधी क्रांतिकारकांचे प्रेरणास्त्रोत होते. बारा वर्षांपेक्षा अधिक काळ अंदमानच्या शिक्षेची तमा न बाळगता प्रखर तेजाने इंग्रजी साम्राज्याविरोधातील मशाल तेवत ठेवणारे देशभक्त, कवी, समाजसुधारक असलेल्या सावरकर यांच्यासारख्या भारतमातेच्या तेजस्वी सुपुत्राच्या घराचे दर्शन मंदिराच्या दर्शनापेक्षा जास्त पवित्र आहे, असे मुख्यमंत्र्यांनी आपल्या अभिप्रायात म्हटले आहे.
शिवसेना खासदार-आमदारांची दांडी
भगूरमध्ये झालेल्या या विशेष सोहळ्यास शिवसेनेचे खासदार हेमंत गोडसे तसेच नाशिकरोड-देवळाली कॅम्पचे आमदार योगेश घोलप तसेच भगूरवासीय व शिवसेनेचे जिल्हाप्रमुख विजय करंजकर यांची अनुपस्थिती दिसून आली. याबाबत खासदार गोडसे यांच्याशी संपर्क साधला असता त्यांनी भूगरमध्ये मुख्यमंत्र्यांच्या उपस्थितीत झालेला कार्यक्रम सरकारचा नव्हे तर भाजपचा वैयक्तिक कार्यक्रम होता. शिवसेना पदाधिकाऱ्यांनी मुख्यमंत्र्यांच्या आगमनापूर्वीच सावरकरांच्या प्रतिमेला त्यांच्या जन्मस्थळी जाऊन अभिवादन केल्याचेही त्यांनी सांगितले. दरम्यान, भाजप किंवा जिल्हा प्रशासनाकडून शिवसेनेच्या कोणत्याही पदाधिकाऱ्यांना कार्यक्रमाचे निमंत्रण देण्यात आले नसल्याची उपस्थितांमध्ये चर्चा रंगली होती.
जिल्हा बँकेला मदत देणार
नाशिक : जिल्हा बँक आर्थिक संकटात सापडली आहे. या बँकेला आर्थिक मदतीसंदर्भात विचारले असता, मुख्यमंत्र्यानी बँकेला आर्थिक मदती संदर्भात निश्चित मार्ग काढू, असे आश्वासन दिले आहे. ‘एसएलडीसी’ या योजनेंतर्गत जिल्हा बँकेला आर्थिक मदत मिळवून देण्यासाठी प्रयत्नशील आहे. शेतकऱ्यांना वेळे‌त पिककर्ज मिळवून देणार असल्याचे त्यांनी यावेळी सांगितले.
कळीच्या प्रश्नाला बगल
नाशिक : दाऊदच्या नातेवाइकाच्या लग्नाला हजेरी लावणाऱ्या पालकमंत्री महाजन यांच्यासह भाजप पदाधिकाऱ्यांच्या हजेरीवर मुख्यमंत्र्यानी चुप्पी साधली. भाजप नेत्यांची हजेरी आणि भाजप नगरसेवकाच्या अटकेवर प्रश्न विचारल्यावर मुख्यमंत्र्यानी त्या प्रश्नांवर बगल दिली.
मुख्यमंत्री उवाच...
मंदिरात गेल्यावर येते त्यापेक्षा पवित्र भावना मला सावरकर वाड्यात गेल्यावर जाणवली
सावरकर व्यक्ती नव्हे संस्था होते
सशस्त्र क्रांतीच्या लढ्याला सर्वोतोपरी मदत सावरकरांची
सावरकर तेज पुरुष होते, क्रांतिकारकांची वसाहत तयार केली
रोटी बंदी, बेटी बंदी, परदेश बंदी सावरकरांनी उठवली
१८५७ चा लढा सैनिकांच बंड नाही स्वतंत्र युद्ध होत हे सावरकरांनी सर्वप्रथम समाजाला सांगितले
मराठीतले अनेक शब्द सावरकरांची देणगी
१९४७ पूर्वी इंग्रजांनी आणि नंतर स्वकियांनी सावरकरांवर अन्याय केले
सावरकरांना देशद्रोही ठरवणारे अनेक वर्षे सत्तेत मंत्री होते, लोकांनी त्यांना आता घालवले
मोबाइल अॅप डाउनलोड करा आणि राहा अपडेट
