पावसाळ्याच्या तोंडावर खोदकाम

May 31, 2017, 3:30 pm

म. टा. वृत्तसेवा, सिडको

नाशिक महापालिकेच्या सिडकोत विभागातील पवननगर येथील रस्त्यांचे काँक्रिटीकरण सुरू करण्यात आले असले तरी हा रस्ता पूर्णपणे दोन्ही बाजूने खोदून ठेवण्यात आला आहे. पंधरा दिवसांनी पावसाळा सुरू असतांनाही प्रशासनाने हा रस्ता का खोदला, असा प्रश्न परिसरातील नागरिकांनी उपस्थित केला आहे. पावसाळ्यापर्यंत या रस्त्याचे काम होणे आता अशक्य असून, झाले तरी ते योग्य त्या दर्जाचे होईल का, असाही प्रश्न उपस्थित होत आहे. बांधकाम विभागाने घेतलेल्या या निर्णयामुळे आता पावसाळ्यात पवननगर रस्त्यावर चिखलाचे साम्राज्य होणार हे मात्र निश्चितच आहे.

सिडकोतील दुर्गानगर ते रायगड चौकापर्यंतचा रस्ता मागीलवर्षीच काँक्रिटीकरण करण्यात आला आहे. त्यानंतर रायगड चौकापासून पुढील रस्त्याचे काम काँक्रिटीकरण करण्यास सुरुवात करण्यात आली. मात्र हे काम करताना रस्ता एकाबाजूने खोदणे अपेक्षित होते, मात्र संबंधित ठेकेदाराने हा रस्ता दोन्ही बाजूने खोदून ठेवलेला आहे. त्यामुळे या भागातील व्यापाऱ्यांबरोबर वाहनचालकांचे अतोनात हाल होत असल्याचे दिसत आहे. मागील आठवड्यात तर या रस्त्याच्या कामाप्रंसगी थेट मुख्य पाइपलाइन फुटून लाखो लिटर पाणी वाया गेले होते. यावेळी तर या रस्त्याला अक्षरशः तळ्याचे स्वरुप प्राप्त झाले होते. आताही हा रस्ता दोन्ही बाजूने खोदून ठेवल्याने वाहतुकीस खुपच अडथळा होत असून, वाहतुकीचा होणारा खोळंबा लक्षात घेऊन रस्त्याच्या एकाबाजूचे काँक्रिटीकरण सुरू केले आहे. तरी वाहतुकीचा प्रश्न अद्यापही मिटलेला नाही. या भागातून वाहने चालविणे जिकरीचे झाले असून, या भागातील व्यापाऱ्यांच्या व्यवसायावरही मोठा परिणाम झाला आहे. ऐन पावसाळ्यात या रस्त्याचे काम पूर्ण झाले नाही तर याठिकाणी चिखलाचे साम्राज्य निर्माण होऊन या रस्त्याने ये-जा करणेसुद्धा अवघड होणार आहे. बांधकाम विभागाने या रस्त्याचे काम सुरू करण्यापूर्वी याबाबतचे नियोजन केले नव्हते का, असा प्रश्न नागरिकांनी उपस्थित केला आहे. पावसाळ्यापूर्वी रस्त्यांची, पावसाळी गटारी व नाल्यांची सफाई होणे अपेक्षित असताना पवननगरच्या या रस्त्याचे काम सुरू करून प्रशासनाने काय साध्य केले, असा प्रश्नही उपस्थित होत आहे.

Latest Images