राज्यव्यापी शेतकरी संपाला पाठिंबा देण्यासाठी रविवार (दि. ४) देवळा येथील आठवडे बाजार बंद ठेवण्याचा निर्णय घेण्यात आला आहे. तसेच रविवारी सकाळी १० वाजता देवळा नगरपंचायतीच्या सभागृहात निषेध सभा होणार असल्याचे किसान क्रांती मोर्चाच्या वतीने सांगण्यात आले.
याबाबत देवळा नगरपंचायतीच्या सभागृहात शनिवारी बैठक घेण्यात आली. संपूर्ण राज्यातील शेतकरी एक जूनपासून संपावर गेले आहेत. त्यातच शनिवारी सकाळी शेतकरी संप माघे घेण्यात आल्याचे वृत्त सोशल मीडियात आल्याने शेतकऱ्यांमध्ये संभ्रम निर्माण झाला. मात्र राज्यातील शेतकऱ्यांना विश्वासात न घेता ठराविक व्यक्तींना हाताशी धरून शेतकरी संपात फूट पाडण्याचा प्रयत्न करण्यात येत असल्याचा आरोप या बैठकीत करण्यात आला. जोपर्यंत शेतकऱ्यांना कर्जमाफी देण्याचा तसेच शेतमालाला उत्पादन खर्चावर आधारित भाव देण्याचा निर्णय होत नाही तोपर्यंत संप सुरूच राहणार असल्याचा निर्णय घेण्यात आला. शेतकरी संपाला पाठिंबा देण्यासाठी रविवारचा आठवडे बाजार बंद ठेवण्यात येऊन निषेध सभेचे आयोजन करण्यात आले आहे. तालुक्यातील शेतकऱ्यांनी या सभेला उपस्थित राहावे, असे आवाहन शेतकरी पंकज अहिरराव यांनी केले. बैठकीस देवळा नगरपंचायतीचे उपनगराध्यक्ष लक्ष्मीकांत आहेर, गटनेते जितेंद्र आहेर, उमेश आहेर, न्यू शिवराजे मित्रमंडळाचे अध्यक्ष सचिन पाटील, हिरालाल शेवाळे, शशिकांत शेवाळे, सतीश बागुल, अमोल बागुल, किशोर बागुल आदींसह शेतकरी व कार्यकर्ते उपस्थित होते.
मोबाइल अॅप डाउनलोड करा आणि राहा अपडेट