मोठ्या माणसांची कल्पनाशक्ती जेथे संपते अशा ठिकाणी लहान मुलांची सुरू होते, असे म्हटले जाते. ‘महाराष्ट्र टाइम्स’तर्फे सोमवारी तीन गटांत झालेल्या चित्रकला स्पर्धेत बच्चेकंपनीने आपल्या कल्पनेतील स्मार्ट सिटी चितारून या उक्तीचा प्रत्यय आणून दिला. स्पर्धेसाठी असलेल्या स्मार्ट सिटीसंदर्भातील विषयाला अनुसरून चिमुकल्यांनी आपल्या स्मार्ट कल्पनाशक्तीची चुणूकच जणू दाखवून दिली.
‘महाराष्ट्र टाइम्स’च्या नाशिक आवृत्तीच्या सहाव्या वर्धापन दिन सोहळ्यानिमित्त बच्चेकंपनीला खास स्थान देण्याच्या उद्देशाने चित्रकला स्पर्धेचे आयोजन करण्यात आले होते. नाशिकला वा. गो. कुलकर्णींपासून ते शिवाजीराव तुपे आदींपर्यंत प्रसिद्ध व दिग्गज चित्रकारांची परंपरा आहे. या परंपरेला सलाम करून शहरात चित्रकलेचा प्रचार व प्रसार व्हावा आणि लहानग्या कलाकारांच्या प्रतिभेला वाव मिळावा, यासाठी या स्पर्धेचे आयोजन करण्यात आले होते. ही स्पर्धा सोमवारी सकाळी ९ ते ११ या वेळेत मते लॉन्स, सावरकरनगर येथे झाली. स्पर्धेत शहरातील शाळांचे शेकडो विद्यार्थी सहभागी झाले होते. या स्पर्धेसाठी नंदनवन लॉन्स हे व्हेन्यू पार्टनर होते.
स्पर्धेची सुरुवात नाशिक जिल्हा शैक्षणिक कलाशिक्षक संघाचे अध्यक्ष द. वा. मुळे यांच्या मार्गदर्शनाने झाली. विद्यार्थ्यांना संबोधित करताना ते म्हणाले, की स्पर्धेत तुम्हाला पारितोषिक मिळाले नाही तरी चालेल, तुमचा सहभाग महत्त्वाचा आहे. चित्रे रेखाटण्याविषयीदेखील त्यांनी मार्गदर्शन केले. स्पर्धेचे परीक्षक म्हणून मुळे यांच्यासह अशोक धिवरे, राहुल मुळे, सुनील गवळी, विनोद जांभोरे, मिलिंद टिळे आदींनी काम पाहिले. स्पर्धा यशस्वीतेसाठी कलाध्यापक संघाचे पदाधिकारी महादेव जगताप, चेतना बैरागी आदींनी प्रयत्न केले.
स्वच्छ-हरित नाशिकवर भर
‘आपल्या स्वप्नातले नाशिक कसे असावे? स्मार्ट सिटी म्हणजे काय?’ असा विषय देण्यात आला होता. सहभागी विद्यार्थी चित्रकारांनी स्वच्छ नाशिक व हरित नाशिक या विषयावर चित्रे रेखाटली. आम्हाला स्मार्ट सिटी आवश्यक आहे. परंतु, आमचे गावपण टिकू द्या, असा संदेशही अनेकांनी आपल्या चित्रांद्वारे दिला. केवळ भौतिक विकास नको, तर हरित नाशिकचा विकास झाला पाहिजे, असेही अनेक विद्यार्थ्यांनी सांगितले. ज्याप्रमाणे अमृताचे थेंब नाशिकमध्ये पडले, त्यामुळे येथे कुंभमेळा सुरू झाला असे म्हणतात, त्याचप्रमाणे विकासाचे थेंब नाशिकमध्ये पडू द्या व नाशिकची भरभराट होऊ द्या, हरित नाशिक, स्वच्छ नाशिक, स्वच्छ व चांगले रस्ते, उद्योगनगरी, रिंगरोड, पर्यावरण संतुलन आदी गोष्टींची नाशिकला आवश्यकता आहे, असे चित्राद्वारे विद्यार्थ्यांनी सांगितले.
विजेते जाहीर, आज पारितोषिक वितरण
पाचवी व सहावी (एक गट), सातवी व आठवी (दुसरा गट), नववी व दहावी (तिसरा गट) अशा तीन गटांत झालेल्या या चित्रकला स्पर्धेतील विजेते जाहीर करण्यात आले आहेत. प्रत्येक गटातल्या पहिल्या तीन विद्यार्थ्यांना ट्रॉफी देण्यात येणार आहे. उत्तेजनार्थसाठी सहभाग प्रमाणपत्र देण्यात येईल. पारितोषिक वितरण आज, मंगळवारी (दि. १३) दुपारी २ वाजता महाराष्ट् टाइम्सच्या ऑफिसमध्ये होईल. पत्ता : महाराष्ट्र टाइम्स, सेमिनार हॉल, चौथा मजला, डिसुझा कॉलनी, कॉलेजरोड.
स्पर्धेचे विजेते असे
पहिला गट (पाचवी ते सहावी) ः
प्रथम- सिद्धी साहेबराव गुंजाळ, सहावी, मराठा हायस्कूल, द्वितीय- सुजल सुनील धोत्रे, पाचवी, तृतीय- हिमानी विजय माळी, सहावी, सेंट फ्रान्सिस हायस्कूल, उत्तेजनार्थ - पूर्वा महाजन, पाचवी, आत्मजा भालचंद्र पवार, सहावी, होरायझन अॅकॅडमी
---
दुसरा गट (सातवी ते आठवी) ः
प्रथम- भूषण वसंत गायकवाड, आठवी, गुरू गोविंद सिंग हायस्कूल,
द्वितीय- कृष्णा दीपक गिरमे, आठवी, न्यू इरा इंग्लिश स्कूल,
तृतीय- सृष्टी नरेंद्र नेरकर, आठवी, रचना विद्यालय, उत्तेजनार्थ- रिद्धी अतुल कुकेकर, आठवी, अनुष्का रविकुमार गोसावी, निर्मला कॉन्व्हेंट हायस्कूल.
---
तिसरा गट (नववी ते दहावी) ः
प्रथम - श्रुती संजय बागूल, नववी, केंद्रीय विद्यालय, आयएसपी, नाशिकरोड, द्वितीय- अदिती अशोक फोफलिया, नववी, बॉइज टाउन पब्लिक स्कूल, तृतीय- प्रियंका दत्तात्रय कोठुळे, दहावी, श्रीराम विद्यालय, उत्तेजनार्थ- ऋषिकेश पाटील, दहावी, पिंपळगाव हायस्कूल, पिंपळगाव बसवंत, अंकिता देवीदास बाविस्कर, दहावी.
मोबाइल अॅप डाउनलोड करा आणि राहा अपडेट
