म. टा. खास प्रतिनिधी, नाशिक
पंढरपूरच्या वारीमध्ये सर्वांत देखणा सोहळा कोणता असेल, तर तो रिंगणाचा. हजारो वारकरी एकत्र येऊन वारीमध्ये रिंगण घालतात. नाचू कीर्तनाचे रंगी म्हणत विठोबा-रखुमाईचा गजर करीत वारकरी हा सोहळा अनुभवतात. पारंपरिक चालत आलेले रिंगण डोळे भरून पाहण्याच्या या सुखद सोहळ्याचा आनंद यंदा द्विगुणित होणार असून, नाशिक सायकलिस्टतर्फे वारीमध्ये सायकल रिंगण घालण्यात येणार आहे.
नाशिक सायकलिस्ट फाउंडेशनतर्फे सालाबादप्रमाणे यंदाच्या वर्षीही आषाढी एकादशीनिमित्त पंढरपूरपर्यंत सायकलवारीचे आयोजन करण्यात आले आहे. या सायकलवारीच्या नावनोंदणीकरिता नाशिकमधील सायकलप्रेमींचा चांगला प्रतिसाद मिळत आहे. यावर्षीच्या वारीमध्ये खेडकलेकर महाराज मैदानावर सायकलचे रिंगण घालण्यात येणार असून, असा प्रयोग पहिल्यांदाच होणार आहे. पंढरपूरपासून अलीकडे दोन किलोमीटर असलेल्या या ठिकाणचे हे सर्व क्षण अनुभवण्यासाठी वारीमध्ये सहभागी होणाऱ्या सायकलिस्टमध्ये कुतूहलाचे वातावरण निर्माण झाले आहे.
शुक्रवार, दि. २३ जून रोजी सकाळी ६ वाजता गोल्फ क्लब ग्राउंड येथून पंढरपूर सायकलवारीला प्रारंभ होणार आहे. झीरो प्लास्टिक, झीरो वेस्टेज या घोषवाक्याने वारी सुरू होणार असून, मुंबईहून वाल्मीक पाटील, नीलेश धोटे, कन्हय्या थोरात, रवींद्र क्षीरसागर हे पोलिस अधिकारी सहभागी होणार अाहेत. नाशिकहून अंबडचे पीआय मधुकर कड सहभागी होणार आहेत. ज्यांना महिनाभर पायी चालणे शक्य नाही अशांसाठी ही सायकलवारी आहे. वारीत सिन्नर, औरंगाबाद, जळगाव, तसेच मालेगावहूनही सायकलिस्ट सहभागी होणार आहेत. पंढरपूर सायकलवारीचे हे सहावे वर्ष असून, यंदाच्या वर्षी सायकलवारीसाठी ५०० हून अधिक सायकलिस्ट सहभागी होणार आहेत. वारीच्या एक आठवडा आधी २७५ जणांची नोंदणी झाली असून, मागील वर्षीच्या तुलनेत हा आकडा दुप्पट आहे.
यंदा गतवर्षीपेक्षा अनेक सुविधा सुधारित स्वरूपात देण्याचा प्रयत्न करण्यात आला असून, संपूर्ण वारीदरम्यान दोन अॅम्ब्युलन्स, ४ डॉक्टर्स आपत्कालीन परिस्थितीत सेवेसाठी सज्ज राहणार आहेत. जास्तीत जास्त सायकलप्रेमींनी या सायकलवारीत सहभागी होऊन वारीचा एक वेगळ्या प्रकारे आनंद लुटावा, असे आवाहन नाशिक सायकलिस्टतर्फे करण्यात आले आहे. पत्रकार परिषदेला जसपालसिंग बिदी, मिलिंद धोपावकर, श्रीकांत जोशी, तुकाराम नवले, सोफिया कपाडिया, शैलेश राजहंस, कविता नारंग, किशोर काळे, योगेश्वर कोठावदे, योगेश शिंदे उपस्थित होते.
--
येथे करावी नावनोंदणी
जुना गंगापूर नाका येथील शिवशक्ती सायकल्स, लुथरा एजन्सी, गंगापूररोड, भांड सायकल्स, इंदिरानगर या ठिकाणी नाशिक सायकलिस्टतर्फे पंढरपूर सायकलवारीसाठी नावनोंदणी अर्ज उपलब्ध आहेत. वारीसाठी नावनोंदणी करणाऱ्या सायकलप्रेमींना वॉटर बॉटल, सरप्राइज गिफ्ट, सायकलचे पंक्चर किट अशी वेगवेगळी बक्षिसे देण्यात येणार आहेत.
--
असा असेल सायकलवारीचा मार्ग
सायकलवारीचा मार्ग नाशिक- सिन्नर-नांदूरशिंगोटे-तळेगाव दिघी-नानज-कोल्हार-राहुरी-अहमदनगर-रुईछत्तीसी-चापडगाव- माही जळगाव-करमाळा-टेंभुर्णी-पंढरपूर असा राहणार आहे. पहिल्या दिवशी म्हणजेच २३ जून रोजी सकाळी ६ वाजता पालखी निघून सायंकाळपर्यंत अहमदनगर शहरात पोहोचणार आहे. नगर शहरात मुक्कामी राहून दुसऱ्या दिवशी २४ जून रोजी टेंभुर्णी येथे मुक्काम करण्यात येणार आहे. तिसऱ्या दिवशी २५ जून रविवारी सकाळी विठुरायाचे दर्शन घेण्यात येईल.
मोबाइल अॅप डाउनलोड करा आणि राहा अपडेट
