जिल्हाभरातील विविध शैक्षणिक व सामाजिक संस्थांतर्फे योगासनांच्या प्रात्यक्षिकांसह विविध उपक्रमांद्वारे आंतरराष्ट्रीय योग दिन साजरा करण्यात आला. त्यामुळे शैक्षणिक संस्थांसह अन्य ठिकाणीही चैतन्यमय वातावरण निर्माण झाल्याचे दिसून आले.
मनमाड परिसर
छत्रे विद्यालयातर्फे महर्षी वाल्मीक क्रीडांगणावर प्रात्यक्षिके झाली. संस्थेचे पदाधिकारी दिनेश धारवाडकर, प्रसाद पंचवाघ, नाना कुलकर्णी, मुख्याध्यापिका के. एस. लांबोळे, उपमुख्याध्यापक आर. एन. थोरात, एस. व्ही. देशपांडे प्राथमिकच्या मुख्याध्यापिका उज्ज्वला जोशी आदींच्या प्रमुख उपस्थितीत योग प्रशिक्षक सुनील ढमाले यांनी हजारो विद्यार्थी व शिक्षकांना योगाचे धडे दिले. परिसरात अन्य संस्थांतर्फेही विविध उपक्रम झाले.
मालेगाव परिसर
मालेगाव ः मालेगाव शहर व परिसरात प्रात्यक्षिकांसह विविध उपक्रम झाले. पतंजली योग समितीतर्फे राधाकृष्ण मंदिर, टीव्ही सेंटर, मालेगाव कॅम्प येथे तीन दिवसीय योग शिबिर झाले. आम्ही मालेगावकर विधायक संघर्ष समिती, लायन्स क्लबच्या महिला सदस्या, आश्रमशाळा, शासकीय तंत्रनिकेतन महाविद्यालय, बालविद्यानिकेतन शाळेचे विद्यार्थी, ज्येष्ठ नागरिक संस्था, स्वामी विवेकानंद केंद्र, राष्ट्रीय स्वयंसेवक संघ सेविका, योग विद्याधाम, क्रीडाभारती, योग्य साधक यांनी उपक्रमात सहभाग घेतला. अपर जिल्हाधिकारी दिलीप स्वामी, पोलिस उपअधीक्षक गजानन राजमाने, वन परिक्षेत्र अधिकारी कांबळे, विक्रीकर निरीक्षक मुळे उपस्थित होते. येथील र. वी. शाह विद्यालय, उज्ज्वल प्राथमिक विद्यालय व शिशुविहार, औषधनिर्माणशास्त्र महाविद्यालय, लिटल एंजल स्कूल, काकाणी विद्यालय, ल. रा. काबरा विद्यालय, गो. य. पाटील विद्यालय आदी शाळा, संस्थांमध्ये विविध उपक्रम झाले.
सटाणा, चांदवड, नांदगावला उत्साह
सटाणा ः येथील कर्मवीर आबासाहेब तथा ना. म. सोनवणे कला, वाणिज्य व विज्ञान महाविद्यालयात राष्ट्रीय छात्र सेनेतर्फे योग प्रात्यक्षिके सादर झाली. प्राचार्य डॉ. दिलीप धोंडगे यांनी योगाचे महत्त्व विशद केले. राष्ट्रीय छात्रसेना अधिकारी प्रा. तुषार खैरनार, डी. बी. ह्याळीज, सुभेदार नामदेव गुरव आदी उपस्थित होते. सटाणा परिसरात अन्य संस्थांतर्फेही विविध उपक्रम झाले.
चांदवड ः नेमिनाथ जैन संस्थेचे के. बी. जैन अभियांत्रिकी महाविद्यालय व राष्ट्रीय सेवा योजनेतर्फे योगशिक्षक ए. बी. येवला यांनी योगासन प्रात्यक्षिके सादर केली. प्राचार्य डॉ महादेव कोकाटे यांनी मार्गदर्शन केले. भारतीय योग विद्या धाम चांदवड शाखा व स्वामी समर्थ अाध्यात्मिक केंद्रातर्फेही कार्यक्रम झाला. चांदवड परिसरातील नागरिकांना मोफत योग प्रशिक्षण देण्यात आले.
नांदगाव ः मविप्रच्या कला, वाणिज्य व विज्ञान महाविद्यालयात क्रीडाशिक्षक प्रा. दिनेश उकिर्डे व प्रा. बी. पी. शिंदे यांनी योगाविषयी मार्गदर्शन केले. प्राचार्य डॉ. एस. आय. पटेल, उपप्राचार्य प्रा. संंजय मराठे, कनिष्ठ महाविद्यालयाचे प्रा. आर. टी. देवरे आणि सर्व प्राध्यापक व शिक्षकेतर कर्मचारी उपस्थित होते
महादेवपूर शाळा
येथील जिल्हा परिषद शाळेत योग दिनानिमित्त विशेष कार्यक्र झाला. सध्याच्या बदलत्या जीवनशैलीत योगाचे अनन्यसाधारण महत्त्व असल्यामुळे मुलांना लहानपणीच योगाभ्यासाचा सराव व्हावा, या उद्देशाने मान्यवरांनी मार्गदर्शनपर माहिती विशद केली.
जि. प. शाळा, शिगवे बहुला
देवळाली कॅम्प ः शिगवे बहुला येथील जिल्हा परिषद प्राथमिक शाळेत झालेल्या योग प्रात्यक्षिकांत विद्यार्थ्यांनी उत्स्फूर्त सहभाग नोंदवला. प्रारंभी शाळेचे क्रीडाशिक्षक संजय बोरसे यांनी मार्गदर्शन करीत विद्यार्थ्यांना योगाची प्रात्यक्षिके करून दाखविली. मुख्याध्यापिका कल्पना साळवे, बाळासाहेब टोचे, कैलास शेवाळे, माधवी साळुंखे, रत्नमाला बैरागी, संजय बोरसे आदी शिक्षकांनी कार्यक्रम यशस्वीतेसाठी प्रयत्न केले.
मोबाइल अॅप डाउनलोड करा आणि राहा अपडेट
