म. टा. वृत्तसेवा, पिंपळगाव बसवंत
पिंपळगाव बसवंत शहर परिसर गेल्या काही दिवसांपासून खून, दरोडा, चोरी आदी घटनांमुळे चांगलाच हादरला आहे. त्यातच सोवारी घडलेल्या दोन घटनांमध्ये तिघांचा खून, एकाची आत्महत्या यामुळे संपूर्ण शहरासह परिसरावर दहशतीचे सावट निर्माण झाले आहे. सातत्याने घडणाऱ्या गुन्हेगारीमुळे पोलिसांच्या कार्यक्षमतेवरच प्रश्नचिन्ह निर्माण झाले असून, पोलिस यंत्रणा याविरुद्ध कठोर भूमिका कधी घेणार, असा सवाल आता नागरिकांनी उपस्थित केला आहे.
गेल्या आठवड्यात शहरातील चिंचखेड रोड भागात आठ दहा दरोडेखोरांनी दरोडा टाकून घरातील दोघांना निर्दयीपणे मारहाण केली. काही घरांवर दगडफेक केली. हजारोंचा चोरून नेला. या घटनेला चार पाच दिवस उलटले तरीही पोलिसांच्या हातात अद्याप कोणताच पुरावा हाती आलेला नाही. दरोड्याच्या घटनेमुळे नागरिक दहशतीखाली असतानाच सोमवारी मध्यरात्री पिंपळगाव शहरात तीन खून झाले. यात दोन निष्पाप लहान मुलांचे बळी गेले. या घटना पिंपळगाव शहराला काळिमा फासणाऱ्या आहेत. शिवाय पोलिसांच्या कार्यक्षमेवरही प्रश्नचिन्ह उपस्थित करीत आहेत. लागोपाट खून दरोडा सारख्या घटना शहरात घडत असल्यामुळे कायदा सुव्यवस्थेचे धिंडवडे निघाले आहे. गुन्हेगारांना पोलिसांचा धाकच राहिला नसल्याचे चित्र पिंपळगाव शहरात निर्माण झाले आहे.
पिंपळगाव बसवंत सुस्कंकृत, शांतताप्रीय शहर आहे. येथे विविध धर्माचे नागरिक गुण्यागोविंदाने राहतात. त्यामुळेच देशभरातील अनेक नागरिक व्यवसाय नोकरीनिमित्ताने येथे स्थायीक झाले आहेत. शहराची व्याप्ती वाढली. नवीन उपनगरे उद्यास आली आहेत.
मात्र गेल्या काही दिवसांपासून शहरातील शांतता सुव्यवस्था धोक्यात आली आहे. मोबाइल चोरी, चेन स्नॅचिंग, महिलांची छेडछाड असे प्रकार नित्याचे झाले आहेत. त्यातच आता खून, दरोड्यांसारखे गंभीर गुन्हे वारंवार घडत आहेत. आर्थिकदृष्ट्या सधन असलेल्या पिंपळगाव शहरासाठी हे प्रकार धोक्याची घंटा आहेत. परिसरात अनेक सधन शेतकरी मळ्यात, वस्तीवर राहतात. या घटनांमुळे मळ्यातील नागरिक चांगलेच धास्तावले आहेत. शहरातील शांतता सुव्यवस्था लक्षात घेऊन पोलिसांनी आपले कर्तव्य चोखपणे पार पाडावे, अशीच रास्त अपेक्षा आता नागरिक व्यक्त करीत आहेत.
पोलिसांचे हातावर हात
शहरात अवैध व्यवसाय राजरोसपणे सुरू आहेत. बेकायदेशीर मद्य विक्री करणाऱ्यांचे पोलिसांशी साटेलोटे असल्यामुळे हा प्रकार सुरू आहे. या व्यावसायिकांकडून पोलिसांना मिळणाऱ्या हप्त्यांमुळे पोलिसांचेही हात बांधले गेले आहेत, अशी उघडउघड प्रतिक्रिया येथील नागरिक देत आहेत. पिंपळगाव बसवंत येथे बदली मिळावी म्हणून पोलिस निरिक्षकांची अक्षरश: स्पर्धा चालते, असेही काही पोलिस खासगीत सांगतात.
शहरात चोऱ्या सुरुच…
रवींद्र मोरे यांच्या घरावर दरोडा टाकून चार दिवस ऊलटत नाही तोच परिसरातील बंद घराचा फायदा घेत सोमवारी दिवसा घरफोडी करण्यात आली. उंबरखेड रोडवरील भिडे नगरातील गोरख सुभाष खैरनार सप्तशृंगी देवीच्या दर्शनासाठी गेले असता, दुपारी घराचे कुलूप तोडून चोरट्यांनी साठ हजार रुपये लंपास केले. याच रोडवरील साईकृपा अपार्टमेंट मधील संजय शार्दुल यांच्या बंद घरातून तेरा हजार रुपये, दागिने चोरून नेले. तसेच दाते कुटूंब नोकरी निमित्ताने रोज बाहेर पडते. त्यांच्या घरातूनही पाच हजार रुपये व मोबाइलची चोरी केली आहे. तर रात्री मोहम्मद अमिर सिद्दगी यांचे तीनशे पत्रे व इतर सामानाची चोरी झाली.
मोबाइल अॅप डाउनलोड करा आणि राहा अपडेट
