नवनाथ वाघचौरे, सिन्नर फाटा
बंद असलेल्या नाशिक सहकारी साखर कारखान्याचा (नासाका) बॉयलर येत्या गळीत हंगामात सुरू होण्याची ऊस उत्पादक शेतकऱ्यांना आशा आहे. मात्र, कारखान्याच्या आर्थिक मदतीच्या मुद्द्यावर नियोजनासाठी पालकमंत्र्यांना वेळ मिळत नसल्याने आणि दुसरीकडे स्थानिक शिवसेना आमदारांनी या प्रश्नावर मौन धारण केल्याने ‘आई खाऊ घालिना अन् बाप जेऊ देईना’ अशी काहिशी अवस्था प्राधिकृत संचालक मंडळाची झाली आहे.
चार वर्षांपासून बंद असलेला नासाका सुरू व्हावा, यासाठी भाजपाचे आमदार बाळासाहेब सानप यांनी पाठपुरावा सुरू केले आहेत. राज्यसरकारच्या माध्यमातून या कारखान्यावर प्राधिकृत संचालक मंडळाची नेमणूक गेल्या वर्षी नोव्हेंबर महिन्यातच करण्यात आमदार बाळासाहेब सानप यांना यश मिळाले. त्यानंतर सहकार मंत्री सुभाष देशमुख यांच्या समवेत आजवर काही बैठकाही झाल्या असल्या तरी थेट मदतीवर ठोस निर्णय अद्यापही झालेला नाही. गेल्या आठवड्यात सहकार मंत्री व राज्य सहकारी बँकेच्या अधिकाऱ्यांसमवेत मंत्रालयात झालेल्या बैठकीत संचालक मंडळाने कर्जाच्या परतफेडीच्या हमीवर राज्य सहकारी बँकेने नासाकास आर्थिक मदत करण्यास तयारी दर्शविली होती.
शिवसेनाही चार हात दूर
शिवसेनेचे खासदार हेमंत गोडसे व आमदार योगेश घोलप यांच्या मतदारसंघातील नासाका कारखाना आहे. मात्र, या कारखान्याला जीवदान मिळावे, यासाठी आमदार गोडसे व आमदार घोलप अद्याप एका बैठकीचा अपवाद वगळता दूरच राहिलेले आहेत. शिवसेनेच्या लोकप्रतिनिधीच्या या भूमिकेमुळे व भाजपच्या लोकप्रतिनिधींनाही हा प्रश्न महत्त्वाचा वाटत नसल्याने नासाका सुरू होणे आता केवळ मृगजळ ठरू नये, अशी शेतकऱ्यांची भावना आहे.
पालकमंत्री खूपच बिझी
नासाकाच्या आर्थिक मदतीप्रश्नी संचालक मंडळाच्या हमीबाबत निश्चित नियोजन होणे बाकी आहे. जिल्ह्याचे पालकमंत्री गिरिश महाजन याच्या मार्गदर्शनाखाली याविषयावरचे नियोजनाला अंतिम स्वरुप प्राप्त होणार आहे. त्यामुळे आमदार सानप पालकमंत्र्यांना याविषयावर बैठक घेण्यास इच्छुक आहेत. यासाठी पालकमंत्री मुंबईत शनिवारी बैठक घेण्याची शक्यता होती. मात्र, राष्ट्रपती निवडणुकीची व्यूहरचना ठरविण्यात बिझी असलेल्या पालकमंत्र्यांची आमदार सानप यांना वेळ उपलब्ध होऊ शकला नाही.
संचालक मंडळ तोंडघशी?
नासाका सुरू होणार अशा जाहीर प्रचार प्राधिकृत संचालक मंडळाने यापूर्वीच गावोगावी ऊस उत्पादकांच्या बैठकांमधून सांगितले. त्यामुळे शेतकऱ्यांनीही ऊस लागवड केली आहे. तर कित्येक शेतकऱ्यांनी आपल्याकडील ऊस इतर कारखान्यांना न देण्याचे ठरविले आहे. मात्र, या प्रश्नावर निर्णय घेण्यास सत्ताधारी भाजपच्या मंत्र्यांना वेळ नसल्याने व शिवसेनेच्या लोकप्रतिनिधींना ‘नासाका’चे काहीही सोयरसूतक नसल्याने संचालक मंडळ तोंडघशी पडण्याची शक्यता वर्तविली जात आहे.
‘नासाका’ची व्याप्ती
गेल्या चार वर्षांपासून नासाका बंद
चार वर्षांपूर्वी ८४ कोटींचे कर्ज
कर्जाचा बोजा सुमारे ११० कोटी झाल्याची शक्यता
इगतपुरी, त्र्यंबक, सिन्नर व नाशिक ही चार तालुके कार्यक्षेत्र
सुमारे २ लाख टन ऊस कार्यक्षेत्रात उपलब्ध
१२५० मेट्रिक टन प्रतिदिन गाळप क्षमता
१७ हजार सभासद
मोबाइल अॅप डाउनलोड करा आणि राहा अपडेट
