‘महाराष्ट्र टाइम्स’च्या हेल्पलाइन उपक्रमाला व्यक्तिगत प्रतिसाद तर मिळतो आहेच, परंतु आता या विद्यार्थ्यांना मदत करण्यासाठी संस्थाही सरसावल्या आहेत. अनेक संस्थांनी मदतीचा हात पुढे केला आहे. संस्थांसोबतच जॉगर्स क्लब, ज्येष्ठ नागरिक संघटना यादेखील मागे राहिल्या नसून, त्यांचेही चेक येत आहेत.
नांदूर नाक्यावरील श्री गुरुदत्त नागरी सहकारी पतसंस्थेतर्फे ‘मटा हेल्पलाइन’च्या दहाही मुलांना मदत करण्यात आली असून, कळवण येथील एका पतसंस्थेतर्फे भरघोस मदत करण्यात आली आहे. जिल्हाभरातून मदतीचे धनादेश येत आहेत. शहरातील जॉगर्स पार्कवर गप्पा रंगवणारे वृद्ध आपल्या थरथरत्या हातांनी चेक लिहितात आणि मदत करतात. सोबत आशीर्वादाचे चार शब्दही लिहितात. तेव्हा या मुलांच्या श्रीमंतपणाची जाणीव होते. ‘मटा हेल्पलाइन’ची मुले आर्थिकदृष्ट्या कमजोर आहेत; परंतु त्यांच्या डोक्यावर सरस्वतीमातेने वरदहस्त ठेवलेला आहे. त्यामुळे प्रत्येकाला ९० टक्क्यांपेक्षा अधिक गुण आहेत. त्यांची स्वप्नेही फार मोठी आहेत. कुणाला देशसेवा करायचीय, तर कुणाला सीए व्हायचेय. ग्रेड वनचे अधिकारी बनून कुणाला आईवडिलांना खूप सुखात ठेवायचे आहे. या त्यांच्या कथा वाचून धनादेश येत आहेत. संस्था मदतीला सरसावल्या आहेत. त्यामुळे या विद्यार्थ्यांचे स्वप्न नक्की साकार होणार, यात शंका नाही.
मोबाइल अॅप डाउनलोड करा आणि राहा अपडेट
