प्रगत शैक्षणिक महाराष्ट्र उपक्रमाअंतर्गत राज्यातील तंत्रस्नेही शिक्षकांनी विविध अॅप्स निर्मित्तीच्या माध्यमातून शिक्षणाची गोडी वाढवण्यासाठी प्रयत्न सुरू केले आहेत. मात्र शिक्षकांच्या समवेत विद्यार्थीदेखील तंत्रस्नेही झाला पाहिजे, या प्रेरणेतून तालुक्यातील माळीनगर जिल्हा परिषद शाळेतील विद्यार्थी देखील अॅप्स निर्मितीचे धडे गिरवीत आहेत. या शाळेतील इयत्ता दुसरीची विद्यार्थिनीने दहा शैक्षणिक अॅप्स तयार केले आहेत.
माळीनगर शाळेतील मुख्याध्यापक राजेंद्र भदाण व तंत्रस्नेही शिक्षक भरत पाटील यांनी विद्यार्थी तंत्रस्नेही व्हावा, या उद्देशाने मुलांना हे अॅप्स निर्मितीचे तंत्र शिकवले आहे. दुसरीतील मानसी बागुल या विद्यार्थिनीने अॅप्स गिझर संकेतस्थळाच्या माध्यमातून आजवर दहापेक्षा अधिक शैक्षणिक अॅप्स तयार केले आहेत. या शाळेतील सर्वच विद्यार्थी टॅब, संगणकाचा अगदी सहज उपयोग करायला शिकले आहेत. मानसीची त्यातील रुची लक्षात घेत शिक्षक पाटील यांनी तिला मार्गदर्शन केले.
शिक्षक संमेलनात गौरव
कोकमठाण येथे झालेल्या दुसऱ्या राज्यस्तरीय कृतीशील शिक्षक संमेलनात एन. सी. आर. टी. च्या पदाधिकारी पवन सुधीर यांनी या विद्यार्थ्यांच्या अॅप्स निर्मितीचे कौतुक केले होते. तसेच तेथे त्यांचा सत्कारही केला होता.
असे करा अॅप डाउनलोड
माळीनगर शाळेचे शिक्षक भरत पाटील यांनी शाळेचा ज्ञानज्योती हा ब्लॉग तयार केला असून https://dnyanjoti.blogspot.in/?m=0 या लिंकद्वारे मानसीने
तयार केलेले अॅप्स डाउनलोड करता येवू शकतात. सध्या ती क्विझ टेक्स या अॅप्सवर काम करीत असून, शिक्षकांच्या मदतीने इयत्तानुसार विषयानुरूप विद्यार्थीसाठी शैक्षणिक अॅप तयार करण्याचा तिचा मानस आहे. सध्या ब्लॉगवर उपलब्ध असलेले हे अॅप लवकरच गुगल प्ले स्टोरवर उपलब्ध होाणार आहे.
हे अॅप बनविले
दुसरीतील मानसीने वर्ड सर्च, क्रॉस वर्ड, पझल्स, नंबर चॅलेंज असे अॅप तयार केले आहे. तसेच भाषा, गणित, इंग्रजी विषयांचा अभ्यास गमतीशीर करणारे अॅप्सही तिने तयार केले आहेत. आता तिचे वर्गमित्र हर्षल रौंदळ व निशा रौंदळ हे देखील अॅप्स निर्मितीचे धडे गिरवीत आहेत.
मोबाइल अॅप डाउनलोड करा आणि राहा अपडेट