म. टा. खास प्रतिनिधी, नाशिक
सार्वजनिक वाचनालयातील आर्थिक गैरव्यवहार बाहेर काढणारे ज्येष्ठ सभासद आणि माजी पदाधिकारी रमेश जुन्नरे यांचे सभासदत्व निलंबित करण्याच्या ठरावावरून सावाना पदाधिकाऱ्यांमध्ये गुरुवारी झालेल्या सभेत ठिणगी पडली. जुन्नरे यांच्या सभासदत्व निलंबनाचा ठराव गुरुवारी झालेल्या सभेमध्ये स्थगित करण्यात आला.
संस्थेची बदनामी करण्याचा ठपका ठेवून रमेश जुन्नरे यांचे सभासदत्त्व निलंबित करण्यात येणार होते. विषयपत्रिकेमध्ये तसा विषयदेखील ठरविण्यात आला होता. मात्र, उपस्थित १२ पदाधिकाऱ्यांपैकी आठ जणांनी या ठरावाला विरोध दर्शविल्याने ठराव तर रद्द झालाच, परंतु त्यामुळे पदाधिकाऱ्यांमध्येच वादाची ठिणगी पडली आहे. या सभेला तीन जण अनुपस्थित होते.
जुन्नरे यांनी वसंत व्याख्यानमालेच्या कारभारावर आक्षेप घेतला असून, सावानाचे प्रमुख कार्यवाह श्रीकांत बेणी हेच वसंत व्याख्यानमालेचे अध्यक्ष आहेत. त्यामुळे त्यांचे सभासदत्व रद्द करीत असल्याची प्रतिक्रिया काही पदाधिकाऱ्यांनी सभेमध्ये दिली. त्यामुळे हा विषय तेथेच स्थगित करण्यात आला. याउलट सावाना अध्यक्षांनी वाचनालयाला पत्र दिले असून, ते याबाबतीत समजू्त घालणार असल्याचे जुन्नरे यांनी सांगितले.
सभांचे इतिवृत्तच नाही
कार्यकारी मंडळाच्या सभेचे इतिवृत्त वाचून मंजूर करणे आणि त्यानंतरच पुढील सभा सुरू करणे असा नियम असतानाही मागील चार सभांचे इतिवृत्त मंजूरच करण्यात आलेले नाही, अशी माहिती जुन्नरे यांनी दिली. इतिवृत्त मंजूरच नाही, तर पुढील सभेत झालेले सर्व निर्णय बेकायदेशीर ठरतात, असेही जुन्नरे म्हणाले. २० जून, ३० जून, १३ जुलै व १८ जुलै अशा चार सभांचे इतिवृत्त पेंडिंग का ठेवण्यात आले, असा सवालही त्यांनी केला आहे.
एजन्सीद्वारे भरती का?
सावानात कर्मचारी भरती करावयाची आहे, त्यासाठी येथून मागे पारंपरिक मुलाखती घेण्याचा प्रघात होता. मात्र, आता एजन्सी नेमण्याची नवीनच प्रथा का काढण्यात आली, असा सवाल जुन्नरे यांनी केला आहे. पारंपरिक मुलाखती घेऊन कर्मचारी नेमण्याची पद्धत अस्तित्वात असताना आता मात्र एजन्सी नेमून तिला ३० हजार रुपये देण्यात आले, ही पैशाची उधळपट्टी कशासाठी सुरू आहे, असा प्रश्नही त्यांनी उपस्थित केला आहे.
गेल्या पन्नास वर्षांपासून संस्थेच्या कारभारात लक्ष घालत आहे. माझ्यावर कोणताही गुन्हा, दोषारोप नाहीत. मात्र, ज्यांच्यावर गुन्हे आहेत तेच माझ्यावर आरोप करीत आहेत. माझ्याविरोधात असे घटक अॅक्शन घेऊ पाहत आहेत. मी आजपर्यंत संस्थेची बदनामी केलेली नाही, यापुढेही करणार नाही. परंतु, जे गैरव्यवहार करणारे आहेत, त्यांना मात्र धारेवर धरणार आहे.
- रमेश जुन्नरे, ज्येष्ठ सभासद
---
शिक्षक गौरव समिती बळकावली
म. टा. खास प्रतिनिधी, नाशिक
नागरिक शिक्षक गौरव समितीचा नवीन अध्यक्ष निवडला जात नाही, तोपर्यंत मागील अध्यक्षच त्यांच्या पदावर कायम असतात. त्या नात्याने प्राचार्य रा. शां. गोऱ्हे हेच समितीचे अध्यक्ष असताना व त्यांनीच नवीन वर्षाची समितीची सर्वसाधारण सभा बोलावणे गरजेचे असताना समितीच्या अध्यक्षांच्या सहीने नाशकातील शाळा, महाविद्यालयांना पत्रे पाठविणे आवश्यक होते. मात्र, तसे न होता प्रमुख कार्यवाहांच्या सहीने शाळांना पत्रे गेली असून, आदर्श शिक्षकांचा बायोडाटा मागविण्याचे काम जोरात सुरू झाले आहे.
कविवर्य तात्यासाहेब शिरवाडकर यांनी शिक्षक गौरव समारंभाची संकल्पना मांडली होती. या समारंभात सुयोग्य अशा शिक्षकांचा गौरव करावा आणि तोही समाजमान्य मान्यवरांच्या हस्ते, असेही तात्यासाहेबांच्या मनात होते. त्यासाठी एक नागरिक शिक्षक गौरव समिती स्थापन करून त्या समितीने गौरवार्थी शिक्षकांची निवड करून त्यांचा सत्कार करावा असे ठरले होते. मात्र, आता नागरिक शिक्षक गौरव समितीच्या अध्यक्षांना म्हणजेच पर्यायाने समितीलाच संपूर्णपणे धाब्यावर बसवून एकट्या सावानाच्या कार्यवाहांच्या सहीने पत्रे पाठविण्यात आली. ही पत्रेसुद्धा शाळा, महाविद्यालयांना पाठविण्यात आली नसून, सरळ संस्थाचालकांनाच पाठविण्यात आली असल्याचे समजते. कार्यवाहच पत्रे पाठवू लागल्याने समिती सावानाची बटिक बनण्याची चिन्हे स्पष्ट दिसू लागली आहेत.
---
प्रमुख कार्यवाहांना पदावरून हटवावे
म. टा. खास प्रतिनिधी, नाशिक
सार्वजनिक वाचनालयाचे प्रमुख कार्यवाह श्रीकांत बेणी यांच्यावर केसेस सुरू असून, त्यांना कोर्टाचे समन्सदेखील बजावण्यात आले आहे. अशावेळी त्यांनी पदावर राहू नये, अशा आशयाचे पत्र सावानाचे माजी नाट्यगृह सचिव सुरेश गायधनी यांनी सावानाचे अध्यक्ष प्रा. विलास औरंगाबादकर यांना दिले आहे.
पत्रात गायधनी यांनी नमूद केले आहे, की सन २०१० च्या सुमारास आपणच सध्याचे प्रमुख कार्यवाह श्रीकांत बेणी यांच्याविरुद्ध न्यायालयात व धर्मादाय आयुक्त यांच्याकडे विविध प्रकारच्या तक्रारी दाखल केल्या होत्या. कोर्टाच्या आदेशाने भद्रकाली पोलिसांनी सार्वजनिक वाचनालय नाशिकसंदर्भात श्रीकांत बेणी यांच्याविरुद्ध केस दाखल केलेली आहे. आपल्यासह अनेकांनी त्यावर आपापले जबाब नोंदविले आहेत. या सर्व जबाबांची शहानिशा करून व पुरावे तपासून भद्रकाली पोलिसांनी न्यायालयात अहवाल सादर केले आहेत. त्यानुसार श्रीकांत बेणी यांच्याविरुद्ध समन्स बजावण्यात आले असून, त्याची सुनावणी न्यायाधीशांसमोर होणार आहे. सावानाचे सात लाख रुपये यापूर्वी बेणी यांनी खर्च केले, त्यासंदर्भात ही फौजदारी केस असल्याने बेणी यांना नैतिकदृष्ट्या सावानाच्या प्रमुख कार्यवाहपदावर राहण्याचा अधिकार नाही, तरीही ते आजपर्यंत पदावर आहेत. केस असल्याने त्यांनी या पदावर राहणे म्हणजे सावानाचा अवमान आहे हे कोणाच्याच अद्याप लक्षात येऊ नये हे विशेष. ते या पदावर राहून सावानाच्या कागदपत्रांत किंवा आर्थिक व्यवहारांत फेरफार अथवा बदल करू शकतात. गंभीर स्वरूपाचे आरोप बेणींवर असूनही त्यांनी पद सोडलेले नाही. त्यामुळे आपणच त्यांच्या कारभारास स्थगिती द्यावी.
सुरेश गायधनी यांनी वरील आशयाचे पत्र लिहिलेले असून उपायुक्त, धर्मादाय आयुक्त व सावानाच्या कार्याध्यक्षांसह अर्थसचिवांना याची प्रत देण्यात आली आहे. गायधनी यांच्या या पत्रप्रपंचामुळे सावानाच्या वर्तुळात चर्चा रंगली असून, अनेकांचे याकडे लक्ष लागले आहे.
मोबाइल अॅप डाउनलोड करा आणि राहा अपडेट
