म. टा. वृत्तसेवा, धुळे
अक्कलपाडा प्रकल्पातून मेहरगाव ते देवभाने या २९ किलोमीटर लांबीच्या कालव्यासाठी जलसंपदा मंत्री गिरीश महाजन यांनी १२ कोटी रुपयांचा निधी मंजूर केला आहे. लवकरच या कामाला सुरुवात होणार असून, या कालव्यामुळे तालुक्यातील मेहरगाव, देवभाने, कावठी, निमडाळे, गोंदूर, वलवाडी, चिचगाव, ढंढाणे, वडेल या गावातील पिण्याच्या पाण्यासह सिंचनाचा प्रश्न कायमस्वरूपी मार्गी लागणार आहे, अशी माहिती आमदार अनिल गोटे यांनी सोमवारी (दि. ७) आयोजित पत्रकार परिषदेत दिली.
अक्कलपाडा धरणातील अतिरिक्त पाणी डाव्या कालव्यातून सोडावे, यासाठी गेल्यावर्षी किरण पाटील व त्यांच्या सहकाऱ्यांसमवेत मेहरगाव, चिचगाव, ढढाणे, वलवाडी, भोकर, निमडाळे या परिसरातील शेतकऱ्यांनी जिल्हाधिकारी कार्यालयावर हल्लाबोल आंदोलन केले होते. या आंदोलनाचे पडसाद जिल्ह्यासह राज्यभर उमटले होते. त्याची दखल घेत जलसंपदा मंत्री गिरीश महाजन यांनी घटनास्थळाची पाहणी करून कालव्याचे काम पूर्ण करण्याचे आश्वासन दिले होते. त्या अनुषंगाने याबाबत पाठपुरावा करून प्रकल्पाचे सर्वेक्षण करून घेण्यात आले, अशी माहितीही आमदार गोटे यांनी दिली.
यासाठी जिल्हा नियोजन मंडळाने १० लाख रुपये उपलब्ध करून दिले असून, मेहरगाव ते देवभान्यापर्यंत २९ किलोमीटर लांबीच्या कालव्यासाठी २०१६-१७ च्या डीएसआरनुसार १० कोटी २४ लाख रूपये खर्च अपेक्षित असताना २०१७-१८ या वर्षांतील डीएसआर गृहित धरून नदीजोड प्रकल्प जलसंपदा विभागाकडून १२ कोटी रूपये मंजूर करण्यात आले आहेत. एक्स्प्रेस कॅनॉलच्या धर्तीवर या कालव्याची निर्मिती होणार असून, याद्वारे अक्कलपाडा धरणातील अतिरिक्त पाणी देवभाने धरणापर्यंत नैसर्गिक उताराने पोहचणार आहे. देवभाने धरण भात नदीवर असून या कालव्यात पाणी सोडल्यानंतर ते पाणी भात नदीत जाईल.
या गावांना फायदा
या कालव्यामुळे मेहरगाव, देवभाणे, कावठी, निमडाळे, गोंदूर, वलवाडी, चिचगाव, ढंढाणे, वडेल, देवभाने या गावांचा पिण्याच्या पाण्याचा प्रश्न कायमस्वरूपी मार्गी लागेल. बारमाही पिकांसाठीही पाण्याचा उपयोग होऊ शकेल. हे काम येत्या नोव्हेंबर महिन्यात सुरू करून मार्चपर्यंत पूर्ण करण्याचे आदेश मंत्री गिरीश महाजन यांनी दिले आहेत, अशी माहिती आमदार गोटे यांनी यावेळी दिली. शहरातील गुलमोहर शासकीय विश्रामगृहात झालेल्या या पत्रकार परिषदेला आमदार अनिल गोटे यांच्यासह भिमसिंग राजपूत, सुनील नेरकर, भारती माळी, तेजस गोटे, माजी नगरसेवक दिलीप सांळुखे आदींसह पदाधिकारी, कार्यकर्ते उपस्थित होते.
पोलिस प्रशासनावर विश्वास नाही
आमदार गोटे यांना गुड्ड्या खूनप्रकरणी विचारले असता या प्रकरणात पोलिस विभागाचा मोठा घोळ असल्याने माझा पोलिस प्रशासनावरच विश्वास राहिलेला नाही, असे सांगितले. या खूनप्रकरणाचा तपास आता मुंबई क्राइम ब्रँचकडे तपास देण्यात आला असून, या विभागातील तीन कर्मचारी धुळे शहरात गेल्या आठवड्यापासून दाखल झाले आहेत. जिल्हा पोलिस दलातील आरोपींना साथ देणाऱ्या पोलिस अधिकारी व कर्मचाऱ्यांवरदेखील कारवाई करण्यात येणार असल्याची माहिती त्यांनी यावेळी दिली. लवकरच काय ते समोर स्पष्ट होईल असे गोटेंनी यावेळी सांगितले.
मोबाइल अॅप डाउनलोड करा आणि राहा अपडेट
