म. टा. वृत्तसेवा, निफाड
शाश्वत सत्य असलेला मृत्यूनंतर मानवाची राख होते. ती राख विधिपूर्वक गंगेत विसर्जन करण्याची परंपरा आहे. मात्र तालुक्यातील रौळसकरांनी आप्तांच्या मृत्यूपश्चात स्मृती जपण्यासाठी या राखेचे विसर्जन न करता वृक्षारोपणासाठी खोदलेल्या खड्ड्यात ही राख ठेवून त्यावर आप्तांच्या स्मृतिप्रित्यर्थ वृक्षारोपण करण्याचा आदर्श उपक्रम सुरू केला आहे. यामुळे आप्तांची एक आठवणीसह पर्यावरणाचेही जतन होत आहे.
रौळस येथील गंगुबाई गवळे या वृद्ध स्त्र‌ीचा दीड महिन्यापूर्वी मृत्यू झाला. अंत्यविधीसमयी त्यांना अखेरचे वस्त्र देण्यासाठी नातेवाईकांनी भरपूर लुगडे आणले होते. सामाजिक कार्यकर्ते तथा पिंपळगाव बाजार समितीचे माजी संचालक माणिकराव शिंदे यांच्यासह सहकाऱ्यांनी हे कपडे गरिबांसह गरजुंना देण्याचा विचार मांडला. त्यास गवळे परिवार व नातेवाईकांनी संमती दिली. दुसऱ्या दिवशी राखेचा कार्यक्रम झाल्यानंतर त्यांच्या अस्थी गोदावरीत विसर्जित करण्याऐवजी त्यांच्या शेतात पुरण्यात येऊन त्यावरच गंगुबाईंच्या स्मरणार्थ एक झाड लावण्यात आले.
याच प्रसंगातून प्रेरणा घेत गावातील आदर्श शेतकरी बहुउद्देशीय कृषी विकास गट व वसुंधरा बहुउद्देशीय कृषी विकास गटातील तरुणांनी गंगुबाई गवळेंच्या दशक्रियाच्या दिवशी गाव परिसरात साडेआठशे रोपे लावण्याचा निश्चय केला. गावातील सर्व मंदिरे, सार्वजनिक जागा, स्मशानभूमी, घरे, शेती, वाडी आदी परिसरात रेन ट्री, शिसव, खैर, गुलमोहर, कांचन, जांभुळ, आंबा, चिंच आकाशिया आदी प्रकारच्या वृक्षांचे रोपण करत आले.
स्मशानभूमीचे नूतनीकरण
मित्रपरिवार आणि पोरजे परिवाराने दत्तात्रय यांच्या स्मरणार्थ चार लाख रुपये खर्च करून वृक्षारोपण केलेल्या झाडांना संरक्षक जाळ्या, स्मशानभूमीचे नूतनीकरण, अंत्यविधीसाठी ओटे बांधकाम, पाण्याची टाकी, स्मशानभूमी परिसरात पेव्हर ब्लॉक आदी समाज उपयोगी कार्य हाती घेत ते पूर्ण केले आहे. या कामात माणिकराव शिंदे, तुकाराम कर्डेल, सुजीत जाधव, सोमनाथ कुंदे, सुनील शिंदे, विकास जाधव आदींसह रौळस ग्रामस्थांचे सहकार्य लाभले.
प्रत्येकाच्या घरासमोर झाडे लावली आहेत. पडिक जागा तसेच शेतीवाडी बांधावर झाडे लावत हा स्मृती जतन करण्याचा उपक्रम राबविला आहे. नदीत होणारे प्रदूषणही टळणार आहे.- माणिकराव शिंदे, माजी सरपंच,
दिवंगत दत्तात्रय पोरजे हे माझे मित्र होते. या उपक्रमात सहभागी होत स्मशानभूमी परिसर सुशोभित व नुतनीकरण करणेसाठी पोरजे परिवार व मित्रपरिवाराने योगदान दिले. पोरजेंच्या स्मृती यानिमित्ताने चिरकाल राहतील.
- तुकाराम कर्डेल, सापुतारा
झाडांचे संगोपन करण्यासाठी पाणी देण्याची व्यवस्था बचत गटाच्या तरुणांसह स्वयंसेवकांवर आहे. दर पंधरा दिवसांतून ही जबाबदारी पार पाडली जाते. - सचिन पोरजे, रौळस
मोबाइल अॅप डाउनलोड करा आणि राहा अपडेट
