नाशिक लोकसभा मतदारसंघाच्या सर्वेक्षणासाठी भारतीय अवकाश संशोधन संस्था अर्थात ‘इस्त्रो’ची मदत घेण्यात येणार आहे. सोमवारी (दि.१४) इस्त्रोचे वैज्ञानिक नाशिकमध्ये येत असून, त्यांच्या उपस्थितीत सर्वेक्षणाबाबतची चर्चा होणार आहे. इस्त्रोमार्फत प्रथमच जिल्ह्यात असे सर्वेक्षण होत असून, त्यामुळे विकासाला वैज्ञानिक आधार मिळेल असा दावा खासदार हेमंत गोडसे यांनी केला.
जिल्हाधिकारी कार्यालयामध्ये ही बैठक होणार आहे. बैठकीला वैज्ञानिक सचिन देवकर, मुख्य व्यवस्थापक वैज्ञानिक कामेश्‍वर राव, तसेच दिल्ली, बेंगळुरू, हैद्राबाद आणि नागपूर येथून अधिकारी नाशिकमध्ये येणार आहेत. नाशिकसाठी जीआयएस अॅप्लिकेशन तयार करण्यात इस्‍त्रोने पुढाकार घेतला असून, मतदारसंघातील विविध विषयांची माहिती त्याद्वारे मिळेल.
तसेच नियोजनबद्ध विकासाला गती मिळू शकेल असा विश्वास गोडसे यांनी व्यक्त केला. याचा लाभ शैक्षणिक, वैद्यकीय, औद्योगिक विकास व शहरी तसेच ग्रामीण भागाला होऊ शकेल.
इंजिनीअरिंगच्या प्राध्यापकांना निमंत्रण
बैठकीला सर्व सरकारी यंत्रणांच्या प्रतिनिधींना निमंत्रित करण्यात आले आहे. यावेळी के. के. वाघ कॉलेज, गुरू गोविंदसिंग, जवाहर एज्युकेशन सोसायटी, संदीप फाऊंडेशन, सपकाळ कॉलेज, ब्रह्मा व्हॅली, आर. एच. सपट, मेट, सर विश्वेश्वरैया आदि इंजिनीअरिंग कॉलेजांचे प्राध्यापक उपस्थित राहणार आहेत.
मोबाइल अॅप डाउनलोड करा आणि राहा अपडेट
