पुणे-मुंबईच्या धर्तीवर राज्य परिवहन महामंडळाची शहर बससेवा नाशिक मनपामार्फत चालविण्यास पालिका प्रशासन टाळाटाळ करीत असल्याने, राज्य परिवहन महामंडळ व पालिका प्रशासनात सुप्त संघर्ष निर्माण झाला आहे. या संघर्षाचे शहरातील नागरिक, कामगार व विद्यार्थी नाहक बळी ठरले असल्याचे चित्र सध्या शहरात दिसून येत आहे. पालिका आयुक्तांना धडा शिकविण्यासाठी राज्य परिवहन महामंडळाचे स्थानिक अधिकारी इरेला पेटले असून, त्यासाठी शहर बससेवेच्या फेऱ्या घटविण्यात आल्याची धक्कादायक माहिती समोर आली आहे.
गेल्या काही वर्षांपासून शहर बससेवा तोट्यात सुरू आहे. मुंबई-पुणे शहराच्या धर्तीवर नाशिक शहर बससेवा राज्य परिवहन महामंडळाकडून नाशिक पालिकेकडे चालविण्यासाठी वर्ग करण्याचा विषय गेल्या काही वर्षांपासून रेंगाळला आहे. वसंत गिते, उत्तमराव ढिकले व बाळासाहेब सानप या महापौरांच्या काळातही या विषयला हिरवा कंदील मिळू शकला नव्हता. त्यानंतर मनसेचे राज ठाकरे यांनी या विषयात रस घेतला. त्यासाठी नेमलेल्या समितीनेही रेड सिग्नल दाखविला. मध्यंतरी पुन्हा मुख्यमंत्र्यांनीही या विषयावर एक समिती नेमली. या समितीनेही नकारघंटा कायम ठेवली. त्यामुळे शहर बससेवा पालिकेकडे वर्ग करण्याचा विषय अद्याप रेंगाळत आहे.
आयुक्त नकारात्मक म्हणून..
पालिकेचे आयुक्तच या विषयावर नकारात्मक असल्याने त्यांना धडा शिकविण्यासाठी शहर बससेवेच्या शेकडो फेऱ्या परिवहन महामंडळाच्या स्थानिक अधिकाऱ्यांनी बंद केल्याची माहिती परिवहन महामंडळाच्या एका अधिकाऱ्याने नाव न सांगण्याच्या अटीवर दिली आहे. याचा अर्थ पालिका आयुक्त व राज्य परिवहन महामंडळाचे स्थानिक अधिकारी यांच्यात गेल्या काही वर्षांपासून सुप्त संघर्ष सुरू असल्याचे उघड झाले आहे. अनुकूल वातावरण असतानाही शहर बससेवा पालिकेकडे वर्ग करण्यास पालिका आयुक्तांचीच नकारघंटा असल्याचे ठाम मत राज्य परिवहन महामंडळाच्या अधिकाऱ्यांचे आहे. कमी उत्पन्न व शालेय सुट्यांचे कारण पुढे करुन बंद करण्यात आलेल्या बसफेऱ्या सुट्या संपून तीन महिने उलटले तरी सुरू करण्यात आलेल्या नाहीत.
प्रवासी वेठीला
शहर बससेवा पालिकेकडे वर्ग करण्याच्या मुद्द्यावर पालिका आयुक्त आणि राज्य परिवहन महामंडळातील अधिकाऱ्यांतील सुप्त संघर्षामुळे लाखो प्रवासी वेठीस धरले गेले आहेत. शहर बससेवेच्या आजवर दररोज १९० ड्यूटी असत. त्यापैकी सध्या ७० ड्यूटी बंद झालेल्या आहेत. एका ड्युटीच्या ८ फेऱ्यांप्रमाणे एकूण ५६० बसफेऱ्या बंद करण्यात आलेल्या आहेत. त्यामुळे नागरिक, कामगार, विद्यार्थ्यांना बसथांब्यावर तासन तास बससाठी प्रतीक्षा करावी लागत आहे. सुरू असलेल्या बसेसलाही तुफान गर्दी होत असल्याने प्रवाशांना जीव मुठीत धरुन प्रवास करावा लागत असल्याचे चित्र सध्या शहरात दिसून येत आहे. प्रवाशांवर खासगी प्रवाशी सेवेचा नाईलाजास्तव वापर करण्याही नामुष्की ओढवली आहे.
ब्रेक डाऊनचे प्रमाण वाढले
शहर बससेवेची धुरा सध्या २०६ बसेसच्या खांद्यावर आहे.त्यासाठी ४५० वाहक, ४५० चालक व ३०० इतर असे सुमारे १२०० कर्मचारी राबत आहेत. मात्र, ७० ड्युटी घटविण्यात आल्याने काही कर्मचारी केवळ हजेरी लावत आहेत. या २०६ बसेसपैकी १८ बसेस ब्रेक डाऊन झाल्या आहेत. या बसेसच्या दुरुस्तीसाठी आवश्यक असणारे स्पेअर पार्ट खरेदी करण्याची ऑर्डर देण्यासही महामंडळाचे वरिष्ठ अधिकारी चालढकल करीत आहेत. परिणामी बसेसची संख्याही घटली आहे. या सर्व प्रकाराला महामंडळ अधिकारी व पालिका आयुक्त असा सुप्त संघर्षच कारणीभूत ठरला आहे.
मोबाइल अॅप डाउनलोड करा आणि राहा अपडेट
