कॉलेज क्लब रिपोर्टर
शहर पोलिसांकडून गणेशोत्सवात अनेक जनजागृतिपर उपक्रम राबविले जात असून, ‘उत्सव मांगल्याचा नाशिकच्या अभिमानाचा’ ही संकल्पना यंदा शहरात रुजविली जात आहे. या संकल्पनेंतर्गत इको फ्रेंडली व पर्यावरणपूरक गणेशोत्सवासाठी थेट बाप्पांमार्फतच भक्तांशी संवाद साधला जात आहे.
‘भक्त असाल, तर शिस्त पाळा’ असे म्हणत व्हिडीओरुपातून गणपती बाप्पा आपल्या मागण्या नाशिककरांपुढे मांडत आहेत. असा समाजप्रबोधनपर व्हिडीओ नाशिक पोलिसांनी सोशल मीडियावर पोस्ट केला आहे. यंदाचा गणेशोत्सव पर्यावरणपूरक व इको फ्रेंडली साजरा करण्यावर पोलिस यंत्रणेने भर दिला आहे. त्यासाठी सोशल मीडियाचा वापर मोठ्या प्रमाणावर केला जात आहे. नाशिकच्या इको फ्रेंडली गणेशोत्सवाच्या जनजागृतीसाठी नाशिक पोलिस व जनस्थान संस्थेने हा व्हिडीओ तयार केला आहे.
पोलिस आयुक्त डॉ. रवींद्रकुमार सिंगल यांच्या संकल्पनेतून साकारलेल्या या व्हिडीओद्वारे गणपती बाप्पा भक्तांना सूचना करीत असल्याचे दाखविण्यात आले आहे. या व्हिडीओची शहरात चर्चा असून, नाशिककर इको फ्रेंडली गणेशोत्सवासाठी सरसावत असल्याचे दिसून येत आहे.
व्हिडीओच्या शेवटी पोलिस आयुक्तांचा गणेशोत्सवासंदर्भातील प्रबोधनपर संदेश जोडण्यात आला आहे. व्हॉट्सअ‍ॅप, फेसबुक, ट्विटरवर हा व्हिडीओ शेअर केला जात आहे. या व्हिडीओसाठी दिग्दर्शन सचिन शिंदे, लेखन सदानंद जोशी, संकलन लक्ष्मण कोकणे, लोगो डिझाइन नंदू गवांदे, संगीत धनंजय धुमाळ, गीत मिलिंद गांधी, गायन आनंद अत्रे यांचे सहकार्य लाभले आहे. व्हिडीओतील बाप्पा साहिल आम्रपाली हे असून, निवदेन कैवल्य जोशी यांनी केले आहे. या व्हिडीओसाठी संयोजन अभय ओझरकर यांनी केले आहे.
हे आहे बाप्पांचे सांगणे
‘मला नमस्कार करण्यापूर्वी काही गोष्टींत सुधारणा करा. तुम्ही केलेल्या या सुधारणाच माझा नमस्कार असणार आहे. माझी मूर्ती शाडू मातीचीच वापरा. पीओपीने आपल्या पर्यावरणाला हानी पोहोचते. शिवाय केमिकलच्या रंगांमुळे आपलेच आरोग्य धोक्यात येते. माझी मूर्ती पुठ्ठा, कागद, फुले यातून साकारा. माझ्या मूर्तीची आरास करताना थर्माकोल वापरू नका. पर्यावरणरक्षणासाठी भक्तांनो आता सजग व्हा. माझ्या मिरवणुकीला डीजे वाजवू नका. डीजेच्या मोठ्या आवाजाचा मलाही त्रास होतो. माझ्या दहा दिवसांच्या उत्सवात आपली सर्वांची रक्षा करणाऱ्या पोलिसांना सहकार्य करा. गणेश मंडळांचे देखावे बघायला गेल्यावर वाहने पार्किंग व्यवस्थित करा. माझ्या मिरवणुकीत गुलाल वापरू नका. फुलांनी मिरवणुकीत रंग भरा. जमा झालेले निर्माल्य पालिकेच्या निर्माल्य कलशातच टाका. मला विसर्जित करून गोदामाईला प्रदूषित करू नका. यापेक्षा मला पालिका, पोलिस प्रशासन यांच्या सहकारी संस्थांकडे दान करा. माझे भक्त असाल, तर या शिस्त पाळा!’ असा संदेश या व्हिडीओतून खुद्द बाप्पांमार्फतच देण्यात आला आहे.
मोबाइल अॅप डाउनलोड करा आणि राहा अपडेट
