शहरात पोलिसांबरोबरच महापालिकेनेही आपल्या प्रमुख शासकीय कार्यालयांसह जलशुद्धीकरण केंद्र, जलकुंभ, उद्याने आणि विविध प्रकल्प सीसीटीव्ही कॅमेऱ्याच्या टप्प्यात आणण्याचा निर्णय घेतला आहे. यासाठी शहरात सुमारे ३०० सीसीटीव्ही कॅमेरे लावले जाणार आहेत. त्याचा कंट्रोल रुम नव्या पंचवटी विभागीय कार्यालयांमध्ये उभारण्याचा निर्णय घेण्यात आला आहे. महाआयटीच्या मदतीने पोलिसांसोबतच सीसीटीव्ही कॅमेऱ्यांचे नियंत्रण महापालिका कार्यालयांमध्ये असेल. त्यामुळे शहरात सीसीटीव्ही कॅमेऱ्यांचे दोन नियंत्रण कक्ष राहणार आहेत.
वाढती गुन्हेगारी नियंत्रणात आणण्यासह कायदा व सुव्यवस्था सुरक्षित राखण्यासाठी शहरात सीसीटीव्ही कॅमेरे लावण्यात येणार आहे. त्यासाठीच्या प्रस्तावालाही सरकारने मंजुरी दिली आहे. पोलिस व महापालिका यांच्या वतीने सयुंक्तरित्या हे सीसीटीव्ही लावले जाणार आहेत. कायदा व सुव्यवस्थेच्या दृष्टीने शहरात सीसीटीव्ही कॅमेरे लावले प्रस्तावित असताना आता महापालिकेने आपल्या मालमत्तांच्या सुरक्षेसाठी सीसीटीव्ही कॅमेरे लावण्याचा निर्णय घेतला आहे. महापालिका मुख्यालय, सहा विभागीय कार्यालये, शंभर जलकुंभ, जलशुद्धीकरण प्रकल्प, पंपिग स्टेशन, तरणतलाव, प्रमुख उद्याने, गंगापूर पंपिग स्टेशन, खत प्रकल्प अशा महत्त्वाच्या ठिकाणी सीसीटीव्ही असतील. या कार्यालयांच्या गेटवर कॅमेऱ्याची नजर असेल.
शहरातील सीसीटीव्ही कॅमेऱ्यांसाठी पोलिसांचे स्वतंत्र नियंत्रण कक्ष असणार आहे. त्याच धर्तीवर महापालिकाही शहरातील सीसीटीव्ही कॅमेऱ्यांचे कमांड अॅण्ड कंट्रोलिंग सेंटर आपल्याकडे ठेवणार आहे. त्यासाठी स्व. पंडितराव खैरे पंचवटी विभागीय कार्यालयाच्या तिसऱ्या मजल्यावरील जागा निश्चित करण्यात आली आहे. महापालिका आयुक्त अभिषेक कृष्णा आणि शहर अभियंता यू. बी. पवार यांनी शुक्रवारी पंचवटी येथील विभागीय कार्यालयाची पाहणी केली. या ठिकाणी स्वतंत्र जागा असल्याने नियंत्रण कक्ष उभारले जाणार आहे. येथूनच महापालिकेच्या मिळकतींसह अन्य ठिकाणी सीसीटीव्हीद्वारे नियंत्रण ठेवले जाणार आहे. महापालिकेच्या कार्यालयासह मिळकतींची सुरक्षेच्या दृष्टीने हे सीसीटीव्ही उभारले जाणार आहे. त्यामुळे कार्यालये व मिळकती सुरक्षित राहणार आहे.
महाआयटीची मदत
स्मार्ट सिटी अंतर्गत शहरात ऑप्टिकल फायबरचे स्वतंत्र जाळे निर्माण केले जाणार आहे. सर्व शासकीय कार्यालयांना व खासगी कंपन्याना हे ऑप्टिकल फायबरचे जाळे वापरता येणार आहे. त्यासाठी राज्य सरकारचे महाआयटी विभाग महापालिकेला मदत करणार आहे. शहरातील सीसीटीव्ही या ऑप्टिकल फायबर जाळ्याला जोडले जाणार असून त्याचा महापालिकेला फायदा होणार आहे. या ऑप्टिकल फायबरचे कंमाडिंग केंद्रही याच कार्यालयात असणार आहे.
स्मार्ट कार्यालय पंचवटीत
स्मार्ट सिटी कंपनीचे कार्यालय अधिक स्मार्ट दिसावे, यासाठी त्याची जागा बदलली जाणार आहे. कंपनीच्या बैठकीत पश्चिम विभागीय कार्यालयात जागा शोधण्यात आली होती. परंतु, तेथे पार्किंगसह इतर सुविधा कमी असल्याने स्मार्ट सिटी कंपनीचे कार्यालयही पंचवटी विभागीय कार्यालयात सुरू केले जाणार आहे. पंचवटी विभागीय कार्यालयाची इमारत नवी असून मध्यवर्ती ठिकाणी आणि स्मार्ट कार्यालय आहे. त्यामुळे या नव्या इमारतीतच स्मार्ट सिटीचे कार्यालय असावे ही आयुक्तांची इच्छा आहे. त्यामुळे तिसऱ्या मजल्यावरील रिक्त जागेवर स्मार्ट सिटीचे कार्यालय उभे केले जाणार असून इथेच बैठकीसाठी मिटिंग हॉलही तयार केला जाणार आहे.
मोबाइल अॅप डाउनलोड करा आणि राहा अपडेट
