सध्याचे राज्यकर्ते शेती व शेतकऱ्यांना देशोधडीला लावत आहेत. शेतीमालास मातीमोल बाजारभाव मिळत आहे. उत्पादन खर्च वाढल्याने शेतकऱ्यांची आर्थिक स्थिती खालावली आहे. मुलांचे शिक्षण, घरखर्चही करणे शक्य होत नसल्याने तो स्वतःला संपवित आहे. हे दुष्टचक्र संपविण्यासाठी शेतकऱ्यांनी एकत्रितपणे करायचे आहे, शेतकऱ्यांनी गट-तट सोडून एक व्हावे, असे आवाहन भारतीय किसान सभेचे राज्य अध्यक्ष मधुकर पाटील यांनी केले.
गिरणारे येथील ग्रामसंस्कार केंद्रात अखिल भारतीय किसान सभेच्या वतीने शेतकरी मेळावा झाला. यावेळी ते बोलत होते. मेळाव्यास प्रा. राजू देसले, वारकरी संप्रदायाचे पुंडलिक थेटे, नगर येथील कारभारी उगले, व्ही. डी. धनवटे, जिल्हाध्यक्ष भास्कर शिंदे, कामगार नेत्या ज्योती नटराजन, दत्तू तुपे, विजय दराडे आदी उपस्थित होते.
यावेळी प्रा. देसले म्हणाले, की शेतकऱ्यांशी संवाद साधताना शेतकरी देशाचा आर्थिक कणा असताना या सध्याच्या राज्यकर्त्यांना विजय मल्ल्याची काळजी आहे. काळा पैसा आणून १५ लाख प्रत्येकाच्या जनधन खात्यात टाकू, असे सांगत फसविणाऱ्या पंतप्रधान नरेंद्र मोदी यांनी नोटबंदी केली. सामान्यांना महागाईत ढकलले. राज्य सरकारने कर्जमाफीत शेतकरी रांगेत उभे केले, हे लिंक करा, ते लिंक करा असा जाच येथील सामान्य माणसाला करणारे हे सत्ताधीश मात्र भांडवलदार लुटारूंना मोकळे रान देत आहे. सहकार संपला, जळगाव जिल्ह्यातील उपसा जलसिंचन योजनेला कर्जमुक्त करून त्यांना पुन्हा कोट्यवधी अनुदान देणारे सरकारने नाशिक जिल्ह्यातील उपसा जलसिंचन योजनेला कर्जात खितपत ठेवले. इथले आमदारही यावर गप्प बसतात, हे दुर्दैव. हा दुजाभाव फोडा, एक व्हा, असे आवाहन त्यांनी केले.
शेतकरी वाचवा अभियानचे संस्थापक राम खुर्दळ यांनी प्रास्ताविक केले. पुंडलिकराव थेटे यांनी आभार मानले. मेळाव्यास निवृत्ती कसबे, रामभाऊ थेटे, निवृत्ती बंदावणे, लुखाभाऊ थेटे, संपत थेटे, वाळू पाटील कसबे, दत्तू कांडेकर, मदन पवार, ज्ञानेश्वर गायकर, सिद्धार्थ मोरे, विजय पोटींड, सुरेश उगले आदी शेतकरी उपस्थित होते.
मोबाइल अॅप डाउनलोड करा आणि राहा अपडेट
