म. टा. खास प्रतिनिधी, नाशिक
सन २०३० पर्यंत नाशिकला विजेची कमतरता पडू नये यासाठी आराखडा करा. जिल्ह्यातील ७७६ ग्रामपंचातीमध्ये विद्युत व्यवस्थापकाची महिनभरात नेमणूक करा, असे आदेश राज्याचे ऊर्जामंत्री चंद्रशेखर बावनकुळे यांनी इच्छामणी लॉन्स येथे घेतलेल्या जनता दरबारात दिले. तसेच ग्राहकांचा मेळावा ३० तारखेला झालाच पाहिजे व जिल्ह्यातील नळ पाणीपुरवठा योजना, जिल्हा परिषद शाळा व अंगणवाडी सौरउर्जेवर करा अशा सूचनाही केली.
इच्छामणी मंगल कार्यालयात आयोजित १० वीज उपकेंद्राचे लोकार्पण व सात वीज उपकेंद्राच्या भूमिपूजन प्रसंगी ते बोलत होते. ग्रामविकास राज्यमंत्री दादा भुसे, महापौर रंजना भानसी, जिल्हा परिषद अध्यक्ष शितल सांगळे, आमदार बाळासाहेब सानप, जयंतराव जाधव, अपूर्व हिरे, सीमा हिरे, उपमहापौर एस. जी. गीते, सभापती शिवाजी गांगुर्डे, महावितरणच्या कोकण प्रादेशिक विभागाचे संचालकसतीश करपे, मुख्य अभियंता दीपक कुमठेकर, अधीक्षक अभियंता सुनील पावडे उपस्थित होते.
ग्राहक संवाद वाढविण्याच्या सूचना
शासनाने दिलेल्या निधीतून सुरू असलेली कामे तपासणे व जनतेशी संवाद साधण्यासाठी आपण येथे आलो आहोत. प्रत्येक महिन्याच्या ठरलेल्या व जाहीर केलेल्या तारखेला शाखा अभियंत्यांनी ग्राहक मेळावा घेऊन ग्राहकांच्या तक्रारी सोडवाव्यात. ग्राहकांचे मोबाइल क्रमांक शंभर टक्के नोंदवून त्यांच्याशी संवाद वाढवा, अशा सूचना ऊर्जामंत्र्यांनी दिल्या.
वीज अपघातातून मुक्तता
नाशिक शहरातील अपघाताचा धोका ओळखून हे टाळण्यासाठी सरकारने योजना आखली आहे. त्यामुळे शहर वीज अपघातातून मुक्त होणार असल्याचे त्यांनी सांगितले. शेतकऱ्यांना शाश्वत व दिवसा वीज देण्यासाठी मुख्यमंत्री सौर कृषी वाहिनीच्या माध्यमातून राज्यातील ४० लाख शेतकरी सौर ऊर्जेशी जोडण्यात येत आहेत. नाशिक जिल्ह्यातील ४०० ते ५०० शेतकऱ्यांचा त्यात समावेश असणार आहे.
यंत्रणा सक्षमीकरणावर भर
ग्रामविद्युत व्यवस्थापकामुळे ग्रामीण भागातील लाइनमनची अडचण दूर होणार आहे. विद्युत व्यवस्थापकाच्या नियुक्तीतून शाखा अभियंत्यांचे काम सोपे होणार असून, शाखा अभियंत्यांनी त्यांच्या नियुक्तीसाठी जबाबदारीने काम करावे. नाशिक जिल्ह्यातील विजेची ५५० कोटींची कामे मार्च २०१८ पर्यंत पूर्ण होणार आहेत. आगामी काळात २०३० पर्यंत नाशिकची विजेची गरज लक्षात घेऊन ती पूर्ण करण्यासाठी शासन आराखडा बनवत आहे. भविष्यात जवळपास ४० हजार मेगाव्हॅट विजेचे पारेषण राज्यात करावे लागणार आहे. त्यादृष्टीने सर्व यंत्रणा सक्षम व अद्ययावत करण्यात येत आहे.
सहकार्याचे आवाहन
ग्राहकांनी वीज कंपनीच्या अडचणी समजून घेऊन सहकार्य करावे. जादूच्या कांडीप्रमाणे कामे होत नाही. तर काही चांगल्या कामांसाठी दीर्घ काळही लागतो. प्रत्येक अभियंत्यांच्या कामाचे मूल्यमापन होणार असून, ग्राहकांना कोणताही त्रास होणार नाही याची आमची भूमिका आहे. ग्राहकांनी महावितरणला सहकार्य करण्याचे आवाहनही त्यांनी केले.
लोकार्पण व भूमिपूजन
जिल्ह्यातील वडझिरे, इगतपुरी, करंजाळी, उंबरठाण, कोऱ्हाटे, जानोरी, जळगाव निघोज, कुपखेडा, मालदे आणि साकोरा याठिकाणच्या ३३/११ केव्ही वीज उपकेंद्राचे लोकार्पण तर डहाळेवाडी, वडनेर वीराने, सावरगाव यासह विजयनगर, शरदवाडी रोड (ता. सिन्नर), सायने टेक्सटाईल पार्क आणि सायने म्हाडा (ता. मालेगाव) येथील ३३/११ उपकेंद्राचे भूमिपूजन ऊर्जामंत्र्यांच्या हस्ते करण्यात आले.
५५० कोटींची कामे
नाशिक शहर व जिल्ह्यातील वीज समस्या सोडविणे व नवीन यंत्रणा बसविणे आदी कामांसाठी शासनाने ५५० कोटी रुपये दिले आहेत. जनतेसह उद्योगांनाही वीज कमी पडणार नाही, यासाठी प्रयत्न सुरू आहेत. महावितरण देशातील सर्वाधिक वीज वितरण करणारी कंपनी ठरली आहे. गेल्या ३० मार्चला २४ हजार ४०० मेगावॅट विजेचे यशस्वी पारेषण व वितरण करणारे महाराष्ट्र हे एकमेव राज्य ठरले असून नवीन वीज वितरणातील नवीन विक्रम घडला असल्याचे बावनकुळे म्हणाले.
मोबाइल अॅप डाउनलोड करा आणि राहा अपडेट
