मॉडेल आयटीआय म्हणून महाराष्ट्रातून एकमेव नाशिकच्या आयटीआयचे नाव यादीत घेण्यास आठवडाही उलटला नसताना याच आयटीआयमध्ये अप्रेंटिसशिप करणाऱ्या सुमारे ७०० विद्यार्थ्यांच्या पदरात प्रॅक्टीकलमध्ये शून्य गुण मिळाल्याचे धक्कादायक वृत्त शनिवारी उघड झाले. एप्रिल २०१७ मध्ये झालेल्या अंतिम परीक्षेचा निकाल शुक्रवारी लागला. तब्बल पाच महिने लागलेल्या या निकालात पारदर्शकता नसल्याचा व ही पेपर तपासणी सदोष असल्याचा आरोप करत शेकडो विद्यार्थ्यांनी सातपूर आयटीआयमध्ये शनिवारी दुपारी निदर्शने केली.
आयटीआयच्या विविध ट्रेड्ससाठी ऑगस्ट २०१६ मध्ये वार्षिक परीक्षा नियोजित होती. परीक्षेच्या स्वरूपातील बदलांमुळे ही परीक्षा तब्बल ७ महिने उशिरा म्हणजे एप्रिल २०१७ मध्ये घेण्यात आली. यानंतर परीक्षेचा निकाल ४५ दिवसांत लावणे बंधनकारक असताना तब्बल पाच महिने उशिरा म्हणजे सप्टेंबर २०१७ मध्ये हा निकाल जाहीर झाला आहे. निकाल जाहीर झाल्यानंतर शनिवारी दुपारी मोठ्या संख्येने विद्यार्थ्यांनी आयटीआय संस्थेच्या आवारात गर्दी करीत प्रशासनाला निकालातील गोंधळाबाबत जाब विचारला. मात्र, रिचेकिंग आणि रीपिटर्स परीक्षेचे अर्ज भरा, अशा अजब सूचना त्यांना संस्थेच्या वतीने देण्यात आल्या. या उत्तराने सदोष निकाल असल्याच्या आरोपाचे समाधान न झाल्याच्या विद्यार्थ्यांच्या प्रतिक्रिया आहेत.
या निकालात ड्राफ्ट्समन अँड मेकॅनिकल या ट्रेंडचेच सर्वाधिक विद्यार्थी भरडले गेले आहेत. २२०० विद्यार्थ्यांनी अप्रेंटिस परीक्षा दिली होती. पैकी तब्बल ११०२ विद्यार्थी यात नापास असल्याची माहिती आहे, तर यातील ७०० विद्यार्थ्यांना प्रॅक्टीकल विषयात थेट शून्य गुण टेकविण्यात आल्याने विद्यार्थ्यांच्या आरोपाला पुष्टी मिळाली आहे. काही विद्यार्थ्यांनी तर थिअरीचे पेपर व्यवस्थित देऊनसुद्धा त्यांना चक्क अॅब्सेंट दाखविण्यात आले आहे.
रिचेकिंगचा अर्ज कसा भरू?
या निकालाने अन्यायाची भावना झालेल्या एका विद्यार्थ्याने नाव न जाहीर करण्याच्या अटीवर भावना मांडल्या. तो म्हणाला, ‘‘गुणांमध्ये तफावतीची शक्यता असल्यास रिचेकिंगचा पर्याय वापरला जातो. जर प्रॅक्टीकल परीक्षेतच शून्य गुण शेकडो विद्यार्थ्यांना टेकविण्यात आले असतील तर रिचेकिंगचा अर्ज भरण्याचा अजब सल्ला संस्था प्रशासन देतेच कसे? असा अर्ज भरून नेमके काय फलित मिळणार आहे.’’
..अन् वाया गेली दोन वर्षे
आयटीआय परीक्षेच्या स्वरूपातील बदलांमुळे ऑगस्ट २०१६ मध्ये नियोजित असणारी ही परीक्षा चक्क एप्रिल २०१७ मध्ये घेण्यात आली. यात विद्यार्थ्यांचे सात महिने परीक्षेस उशीर झाल्याने वाया गेले. त्यात एप्रिल २०१७ मध्ये परीक्षा झाल्यानंतर जून महिन्याच्या पहिल्या पंधरवड्यात निकाल लागणे अपेक्षित होते. हा निकाल सप्टेंबरच्या मध्यावर जाहीर झाला आहे. निकालाच्या प्रतीक्षेत तीन महिने वाया गेले. असे विद्यार्थ्यांचे एकूण १० महिने वाया गेले आहेत, तर हाती पडलेला निकाल सदोष असल्याच्या भावनेमुळे नकळत दोन वर्षे वाया गेल्याची प्रतिक्रिया विद्यार्थ्यांमध्ये आहे.
आश्वासनांवर बोळवण
विद्यार्थ्यांनी निकालाच्या मुद्द्यावरून शनिवारी दुपारी गोंधळ घातल्यानंतर प्रशासनास जाग आली. अगोदर विद्यार्थ्यांना न जुमानणाऱ्या संस्थेने या प्रकारावर सोमवारी तोडगा काढण्याचे आश्वासन दिले. या प्रकारासंदर्भात नवीन सूचना असल्यास सोमवारी संस्थेच्या नोटीस बोर्डवर लावण्यात येईल, असेही संस्थेच्या वतीने सांगण्यात आले. संस्थेच्या या आश्वासनामुळे विद्यार्थ्यांचे लक्ष आता सोमवारकडे लागले आहे.
मोबाइल अॅप डाउनलोड करा आणि राहा अपडेट
