जमैकामध्ये झालेल्या मिस ग्लोबल इंटरनॅशनल स्पर्धेत नाशिकची भैरवी प्रदीपलाल बुरड हिने अंतिम फेरीत धडक मारत पहिल्या १० क्रमांकांत स्थान मिळविले. याच स्पर्धेत ती ‘मिस ग्लोबल एशिया २०१७’ या कॉन्टिनेंटल टायटलची विजेती ठरली. १५ सप्टेंबर २०१७ रोजी या स्पर्धेचा निकाल जाहीर झाला. भैरवी बुरड ही नाशिकमधील बीवायके महाविद्यालयात कॉमर्स शाखेत टीवायबीकॉमचे शिक्षण घेत आहे. भैरवीच्या यशाने प्रथमच नाशिकच्या शिरपेचात मानाचा तुरा खोवला गेला आहे.
नवी दिल्ली येथे ऑगस्ट २०१७ मध्ये झालेल्या स्पर्धेत भैरवीने मिस ग्लोबल इंटरनॅशनल इंडिया स्पर्धेचे विजेतेपद पटकावले होते. याच स्पर्धेत तिने बेस्ट रॅम्प, बेस्ट कंजुनिअॅलिटी हा किताब पटकावला. या कामगिरीमुळेच तिची जमैकातील मिस ग्लोबल इंटरनॅशनल स्पर्धेसाठी निवड झाली होती. सप्टेंबर २०१७ मध्ये तिने सेंट्रल अमेरिकेत झालेल्या सौंदर्य स्पर्धेत पहिल्या दहामध्ये स्थान मिळविले होते. मध्यमवर्गीय कौटुंबिक पार्श्वभूमी असलेल्या भैरवीची ही कामगिरी कौतुकास्पद ठरली आहे. मिस ग्लोबल इंटरनॅशनल स्पर्धेत ती ‘मिस ग्लोबल एशिया २०१७’च्या कॉन्टिनेन्टल टायटल्सची मानकरी ठरली.
नृत्याचीही आवड
भैरवीला बालपणापासून नृत्याची आवड आहे. तिने आतापर्यंत नृत्याच्या विविध स्थानिक स्पर्धांमध्ये बक्षिसे पटकावली आहेत. २०१६ मध्ये झालेल्या मिस टीजीपीसी (दि ग्रेट पॅजिअंट कम्युनिटी) या ऑनलाइन सौंदर्य स्पर्धेत भैरवी विजेती ठरलेली आहे. दिल्ली येथील दि उमराव येथे झालेल्या अब्राक्सस गॉडेस ऑफ ब्यूटी २०१७ या राष्ट्रीय स्तरावरील सौंदर्य स्पर्धेत भैरवीने विजेतेपद पटकावले होते.
‘मटा श्रावणक्वीन’चा फायदा
२०१५ मध्ये झालेल्या मटा श्रावणक्वीन स्पर्धेत भैरवीने सहभाग घेतला होता. त्यात तिची टॉप फाइव्हमध्ये निवड झाली होती. यात भैरवीला बेस्ट रॅम्पचे पारितोषिक मिळाले होते. या स्पर्धेमुळे मुंबई येथे दहा दिवसांच्या ट्रेनिंगमध्ये भैरवीची निवड झाली होती. त्याचा मला खूपच फायदा झाला असल्याचे भैरवी सांगते.
मोबाइल अॅप डाउनलोड करा आणि राहा अपडेट