टीम मटा ः १५ सप्टेंबर ते २ ऑक्टोबर दरम्यान राबविण्यात येणाऱ्या ‘स्वच्छता हीच सेवा’ या मोहिमेत जिल्हाभरात विविध उपक्रमांद्वारे स्वच्छता करण्यात आली. त्र्यंबकेश्वर येथे गोदापात्राची स्चच्छता, येवल्यात राष्ट्रपुरुषांचे शिल्प अन् त्यांचा परिसर स्वच्छ करण्यात आला. देवळा, कळवणमध्येही स्वच्छता मोहीम राबविण्यात आली. तर निफाड तालुक्यातील नैताळे येथे मात्र या मोहिमेचा निषेध करीत पेट्रोल दरवाढीवर गांधीगिरी आंदोलन करण्यात आले.
येवला बाजार समिती आवाराची साफसफाई
येवला ः केंद्र सरकारच्या स्वच्छ भारत अभियानांतर्गत केंद्रीय कृषी, पणन व शेतकरी कल्याण मंत्रालयाच्या वतीने देण्यात आलेल्या निर्देशानुसार येवला कृषी उत्पन्न बाजार समितीचे सर्व पदाधिकारी, अधिकारी अन् कर्मचाऱ्यांनी रविवारी हाती झाडू घेत बाजार समिती आवारात स्वच्छता मोहीम राबवली.
रविवारी सकाळी येवला बाजार समितीत ही मोहीम राबविण्यात आली. सभापती उषाताई शिंदे, उपसभापती गणपत कांदळकर यांच्यासह समितीतील सर्वच अधिकारी व कर्मचाऱ्यांनी हाती झाडू घेतला. केंद्रीय विपणन अधिकारी एस. एम. शुक्ला व महाराष्ट्र राज्य कृषी पणन मंडळाचे अधिकारी यांनी यावेळी येवला बाजार समितीस भेट देवून स्वच्छता अभियानाची पाहणी केली.
गोदापात्र स्वच्छतेला त्र्यंबकेश्वरमध्ये सुरुवात
म. टा. वृत्तसेवा, त्र्यंबकेश्वर
गोदापात्राची स्वच्छता करत स्वच्छता हिच सेवा या अभियानाला पालकमंत्री गिरीष महाजन यांच्या उपस्थितीत त्र्यंबकेश्वर येथे शुभारंभ करण्यात आला. त्र्यंबक नगरपालिकेच्या स्वच्छता मोहिमेत महामंडलेश्वर सोमेश्वरानंद महाराज, डॉ. बिंदू महाराज या साधुमहंतांसोबत जिल्हाधिकारी राधाकृष्णन बी., पोलिस अधीक्षक संजय दराडे आदींसह महसूल अधिकारी सहभागी झाले. बेझे येथील श्री राम शक्ती पिठाचे भक्त आणि संदीप फाउंडेशन, आर्कीड, ब्रह्माव्हॅली आदी महाविद्यालयांतील विद्यार्थ्यांनी या अभियानात सहभाग नोंदवला.
त्र्यंबकेश्वर मंदिरासमोर पालकमंत्री महाजन यांनी सर्वांना स्वच्छतेची शपथ दिली. व्यासपीठावर जिल्हाधिकारी राधाकृष्णन बी. यांच्यासमवेत नगराध्यक्षा तृप्ती धारणे, भाजप शहराध्यक्ष शामराव गंगापुत्र, उपनगराध्यक्ष अभिजीत काण्णव, मुख्याधिकारी डॉ. चेतना केरूरे आदींसह अधिकारी पदाधिकारी उपस्थित होते. स्वच्छतेची शपथ घेतल्यानंतर नियोजनाप्रमाणे शहराच्या विविध भागात स्वयंसेवक स्वच्छतेसाठी रवाना झाले. दरम्यान पालकमंत्री महाजन आणि महामंडलेश्वर सोमेश्वरानंद महाराज यांच्यासह नगराध्यक्षा धारणे व नगरसेवक नदीपात्रात उतरले आणि स्वच्छता केली.
कळवणच्या विद्यार्थ्यांचा मोहिमेत सहभाग
कळवण ः कळवण नगर पंचायत व आर. के. एम. उच्चमाध्यमिक विद्यालय यांच्या संयुक्त विद्यमाने स्वच्छता हीच सेवा या मोहिमे अंर्तगत कळवण शहरातील विविध भागात स्वच्छता मोहीम राबविण्यात आली.
१५ सप्टेंबर ते २ ऑक्टोबर या कालावधीत शासनाच्या आदेशानुसार स्वच्छता हीच सेवा ही मोहीम राबविण्यात येत आहे. याचाच एक भाग म्हणूण सोमवारी कळवण नगर पंचायत व कळवण एज्युकेशन संचालित आर. के. एम. उच्चमाध्यमिक विद्यालय, कळवण यांच्या संयुक्त विद्यमाने कळवण बस स्थानक परिसर, नवीन कोर्ट आवार, गांधी चौक, मेनरोड या भागात स्वच्छता मोहीम राबविण्यात आली.
यावेळी कळवणचे तहसीलदार कैलास चावडे, नगराध्यक्षा सुनिता पगार, शिवसेनेचे उपनगराध्यक्ष साहेबराव पगार, गटनेते कौतिक पगार, नगरसेवक अनुराधा पगार, भाग्यश्री पगार, मुख्याधिकारी सचिनकुमार पटेल, विद्यालयाचे प्राचार्य एच. के. शिंदे, उपप्राचार्य सी. आर. गांगुर्डे यांच्यासह विद्यार्थी यावेळी उपस्थित होते.
चांदवडला फेरी
मनमाड ः चांदवड नगरपालिकेतर्फे सोमवारी शहरातून स्वच्छता फेरी काढण्यात आली. विविध सरकारी कार्यालये, अधिकारी कर्मचारी विविध विद्यालयातील शिक्षक कर्मचारी विद्यार्थ्यांनी सात सहभाग घेतला. आमदार राहुल आहेर, उपविभागीय अधिकारी सिद्धार्थ भंडारे यांच्या हस्ते रॅलीचा शुभारंभ झाला. नगराध्यक्ष भूषण कासलीवाल यांनी या अभियानात नागरिकांनी सहभाग घ्यावा, असे आवाहन केले.
निफाडला मोहीम
निफाड ः निफाड नगरपंचायत अंतर्गत शहरातील वैनतेय विद्यालय, कर्मवीर ग. दा. मोरे महाविद्यालयाचे विद्यार्थी व सामाजिक संस्था यांच्यासह निफाड नगरपंचायतीने शहरात स्वच्छता मोहीम राबविली. निफाड गावातील विविध रस्ते, चौक, तसेच खुल्या भूखंडावर ही मोहीम राबविण्यात आली. यावेळी निफाड नगरपंचायतचे नगराध्यक्ष मुकुंद होळकर मुख्याधिकारी किशोर चव्हाण नगरसेवक देवदत्त कापसे, नगरसेविका सुनीता कुंदे, वि. दा. व्यवहारे, नवनाथ पवार, उपस्थित होते. याप्रसंगी सर्वांना स्वच्छतेची शपथ देण्यात आली.
मोबाइल अॅप डाउनलोड करा आणि राहा अपडेट
