Quantcast
Channel: Maharashtra Times
Viewing all 49119 articles
Browse latest View live

बॉम्ब निकामी अन् दहशतवादी गजाआड

0
0

म. टा. प‍्रतिनिधी, नाशिक
‘हॅलो, तुमच्या कंपनीत बॉम्ब ठेवला आहे’, असा खळबळजनक निरोप देणारा निनावी खणखणतो अन क्षणार्धात कट होतो. हा फोन कॉल गांभीर्याने घेऊन यंत्रणा सतर्क होते. काही क्षणांतच दहशतवाद विरोधी कृती दल, बॉम्ब शोधक व नाशक पथकासारखी यंत्रणा एचपीसीएल कंपनीत पोहोचते. कंपनीतील कामगार आणि अधिकाऱ्यांना सुखरूप ठेवण्यात ही यंत्रणा यशस्वी ठरते.
सिन्नर एमआयडीसीमध्ये शुक्रवारी दुपारी हे नाट्य रंगले. एचपीसीएलचे प्लांट प्रमुख निकुंज कुमार शुक्ला यांना अज्ञात व्यक्तीचा फोन येतो. ही व्यक्ती जाणीवपूर्वक त्याचे नाव सांगत नाही. परंतु, कंपनीत दोन बॉम्ब ठेवले असल्याबाबत माहिती देते. या फोनमुळे सुरुवातीला एकच गोंधळ उडतो. पोलिस व त्यांच्याशी संबंधित वेगवेगळी पथके, अग्न‌िशमन विभाग. आपत्ती व्यवस्थापन विभागाच्या अधिकाऱ्यांना तातडीने पाचारण केले जाते. सर्वांची एकत्रितरित्या चर्चा होते. कृती आराखडा तयार करून जबाबदाऱ्या वाटून दिल्या जातात. त्यानुसार प्रत्यक्षात कार्यवाही सुरू होते. बॉम्ब शोधक व नाशक पथकाचे कर्मचारी कारखान्याचे ३३ एकर परिसरात मेटल डिटेक्टर व श्वानाच्या सहाय्याने शोध घेण्यास सुरुवात करतात. त्याचवेळी एका विभागात बॉम्बचा स्फोट होऊन आग पसरण्यास सुरुवात होते. कंपनीतील आग विझविण्याची स्वयंचलित यंत्रणा कार्यान्व‌ित होते. फायर ब्र‌िगेडचे अधिकारी आग विझविण्यासाठी शर्थीचे प्रयत्न सुरू करतात. बॉम्ब शोधण्याचे काम सुरू असतानाच तो ९० मेट्रिक टन क्षमतेच्या एलपीजी बुलेटखालील भागात असल्याचे निदर्शनास येते. अत्याधुनिक बॉम्बनाशक सामग्रीच्या सहाय्याने सुरक्षित ठिकाणी नेऊन या बॉम्बची विल्हेवाट लावली जाते. कंपनीतील एका जुन्या खोलीत संशयित व्यक्ती दबा धरून बसलेली असते. शीघ्र कृती दल आणि दहशतवाद विरोधी पथकातील अधिकारी आणि कर्मचारी सावधगिरी आणि अत्यंत चलाखीने त्या संशयित व्यक्तीस पकडतात. सुमारे दोन तास हे नाट्य सुरू असते. ही वास्तवातील घटना नसून मॉकड्रील असल्याचे प्रशासनाकडून सांगण्यात येते अन सर्वांचाच जीव भांड्यात पडतो. मॉकड्रील यशस्वी करण्यासाठी कंपनीचे अधिकारी सुजित रॉय, मयंक शर्मा, निकुंजकुमार, रवींद्र गायकवाड आदींनी परिश्रम घेतले.

मोबाइल अॅप डाउनलोड करा आणि राहा अपडेट


एटीएमच्या पैशांना फुटले पाय

0
0

म. टा. प्रतिनिधी, नाशिक
विविध बँकांच्या एटीएममध्ये रोकड भरणा करण्याची जबाबदारी असलेल्या एका खासगी संस्थेच्या वाहनातील तब्बल ५६ लाख रुपयांची रोकड गायब झाली. रोकड असलेली ट्रंक गहाळ झाल्याचा प्रकार शुक्रवारी (दि. २२) दुपारी एमजीरोडवरील रेड क्रॉस सिग्नल येथे घडला. यामुळे मोठी खळबळ उडाली असून, पोलिस रात्री उशिरापर्यंत सर्वच अंगाने घटनेची चौकशी करण्यात व्यस्त होते.
शहरातील विविध बँकांच्या एटीएम मशिनमध्ये रोकड पैशांचा भरणा करण्याची जबाबदारी वेगवेगळ्या खासगी संस्था पार पाडतात. त्यापैकी एक असलेल्या सिक्युअर एजन्सीची एक व्हॅन (एमएच १२, के. पी. ८८३४) सकाळी आपले कर्तव्य बजावण्यासाठी निघाली. वाहनात मोठी रोकड असल्याने चालकासह दोन सुरक्षारक्षक व दोन कर्मचारी सोबत होते. रविवार कारंजा परिसरातील एटीएममध्ये पैसे भरण्यासाठी सर्वांची लगभग होती. रविवार कारंजा तसेच दहीपूल या दोन ठिकाणी एटीएममध्ये रक्कम भरल्यानंतर हा ताफा रेड क्रॉस सिग्नल जवळील आयसीआयसीआय या बँकेच्या एटीएममध्ये पोहचला. येथे एटीएम मशिनमध्ये रक्कम भरण्याचे काम सुरू असतानाच सुरक्षारक्षकासह कर्मचाऱ्यांना त्यांच्या वाहनातील तब्बल ५६ लाख रुपये असलेला ट्रंक गायब झाल्याचे निदर्शनास आले. त्यांनी तात्काळ पोलिसांना घटनेची माहिती दिली.
याबाबत पोलिस उपायुक्त लक्ष्मीकांत पाटील यांनी सांगितले, की ही घटना गंभीर असून, त्यामुळे अनेक प्रश्न समोर आले आहेत. एवढ्या वर्दळीच्या ठिकाणी पैशांनी भरलेली बॅग गहाळ होण्याचा प्रकार उमगत नाही. तसेच संबंधितांनी खरोखर पैसे आणले होते का? हे ही तपासायला हवे. परिसरातील सर्व सीसीटीव्ही फुटेज तपासण्याचे काम हाती घेण्यात आले असून, सदर कर्मचाऱ्यांकडे वरिष्ठ पोलिस अधिकारी सातत्याने चौकशी करीत आहे. लवकरच या प्रकरणातील तथ्य समोर येण्याची शक्यता असून, त्यानुसार गुन्हा नोंदवण्यात येईल, असे पाटील यांनी स्पष्ट केले. या रक्कमेचा इन्शुरन्स असल्यानेही पोलिसांनी सावध पवित्रा घेतला आहे.

मोबाइल अॅप डाउनलोड करा आणि राहा अपडेट

गजानन शेलारांची जामिनावर मुक्तता

0
0

म. टा. प्रतिनिधी, नाशिक
राष्ट्रवादी काँग्रेसचे नगरसेवक तथा गटनेते गजानन शेलार यांना जिल्हा कोर्टाने शुक्रवारी जामीन मंजूर केला. पोलिसांच्या ताब्यात बुधवारपासून असलेल्या आणि दोन्ही गुन्ह्यात जामीन मिळाल्याने शेलारांना दिलासा मिळाला. सरकारवाडा पोलिसांनी त्यांना गुरूवारी अटक केली होती.
सार्वजनिक गणेश विसर्जन मिरवणुकीदरम्यान डीजे वाजवून ध्वनी प्रदूषण कायद्याचे उल्लंघन केल्याप्रकरणी दंडे हनुमान मंडळाचे संस्थापक अध्यक्ष तसेच नगरसेवक शेलार यांना गुरूवारी (दि. २१) सरकारवाडा पोलिसांनी अटक केली. याच दिवशी भद्रकाली पोलिस स्टेशनमध्ये दाखल असलेल्या गुन्ह्यात शेलारांना जामीन मिळाला होता. जिल्हा कोर्टासह हायकोर्टाने अटकपूर्व जामीन अर्ज फेटाळल्याने शेलार बुधवारी (दि. २०) भद्रकाली पोलिस स्टेशनला हजर झाले. भद्रकाली पाठापोठ सरकारवाडा पोलिस स्टेशनमध्ये दाखल गुन्ह्यात जामीन मिळाल्याने शेलारांपाठीमागे लागलेले डीजे प्रकरणाचे शुक्लकाष्ट काही दिवसांसाठी संपुष्टात आल्याची चर्चा सुरू आहे.

मोबाइल अॅप डाउनलोड करा आणि राहा अपडेट

मोहीम एकच; उद्‌घाटन दोनदा

0
0

म. टा. वृत्तसेवा ,सिडको

सिडको परिसरात एकाच स्वच्छता मोहिमेचे शुक्रवारी दोनवेळा उद्‌घाटन करण्यात आल्याचा अजब प्रकार घडला. पालकमंत्री गिरीश महाजन येईपर्यंत शिवसेनेचे नेते थांबण्यास तयार नव्हते. त्यांनी मोहिमेस प्रारंभ करून टाकला. पण पालकमंत्री आल्यानंतर याच मोहिमेचा पुन्हा शुभारंभ करण्यात आला. या प्रकारामुळे शिवसेना व भाजपमधील वाद पुन्हा समोर आला.

स्वच्छता मोहिमेच्या शुभारंभासाठी पालकमंत्री महाजन सकाळी साडेआठ वाजता येणार असल्याने सर्व नगरसेवक आवर्जून उपस्थित होते. मात्र, दहा वाजून गेल्यावरही पालकमंत्री न आल्याने शिवसेनेच्या नगरसेवकांनी नारळ फोडून मोहिमेस सुरुवात केली. पालकमंत्री आल्यानंतर या मोहिमेचा शुभारंभ करण्यात आला असला तरी यावेळी शिवसेना पदाधिकारी व नगरसेवक उपस्थित नसल्याचे दिसून आले. याचवेळी प्रत्येक प्रभागात ही मोहिम असल्याचे सांगून नगरसेवक निघून गेल्याचे समजते. मात्र, एकाच मोहिमेचे दोनदा नारळ फोडल्याने नागरिकांनी आश्चर्य व्यक्त केले आहे.

सिडकोतील मोहिमेच आमदार सीमा हिरे यांच्यासह विद्यार्थी, प्रभागातील नागरिक, विविध सामाजिक संस्थां सहभागी झाल्या. यावेळी महाजन यांनी सांगितले की, प्रशासनाने परिसराची स्वच्छता केलीच पाहिजे. पण नागरिकांनीही स्वच्छता कायम राहिल यासाठी प्रयत्न करण्याचे गरज आहे. आमदार सीमा हिरे यांनी स्वच्छतेविषयी जनजागृती करत नागरिकांना स्वच्छतेचे विषयी प्रबोधन केले. त्‍याचबरोबर संभाजी स्टेडियमच्या स्वच्छतेसाठी तसेच येथील शौचालय, पिण्याची पाण्याची व्यवस्था व वृक्षांच्या जाळ्यांसाठी शहरातील एका कंपनीकडून १० लाख रुपये मंजूर करण्यात आले आहे, असे हिरे यांनी सांगितले. किरण गाडे यांनी सूत्रसंचालन केले. यावेळी आमदार देवयानी फरांदे, उपमहापौर प्रथमेश गिते, सिडको प्रभाग सभापती सुदाम डेमसे, महेश हिरे, रत्नमाला राणे, भगवान दोंदे आदी उपस्थित होते.

मोबाइल अॅप डाउनलोड करा आणि राहा अपडेट

विखेपाटील मेमोरियल स्कूलचा अमेरिकेत गौरव

0
0

ग्लोबल ग्रीन स्कूल स्टूअर्डशीप पुरस्कार प्रदान

म.टा.प्रतिनिधी,शिर्डी

गुणवत्ता व पर्यावरण संवर्धन यांच्या जोरावर पुणे शहरातील एक नामांकित शाळा अशी ओळख असणाऱ्या ‘विखे पाटील मेमोरियल स्कूलला ‘ ग्लोबल ग्रीन स्कूल स्टुअर्डशीप’ या पुरस्काराने शुक्रवारी अमेरिकेत गौरविण्यात आले.हा सोहळा शुक्रवारी ( २२ सप्टेंबर ) न्यूयार्क मध्ये संपन्न झाला. पर्यावरण संवर्धन मध्ये परदेशात सन्मानित होणारी पुणे शहरातील ही एकमेव शाळा आहे.

न्यूयार्क स्थित असलेल्या ‘ग्रीन स्कूल संस्था’ तर्फे अमेरिका,भारत, अरब अमिराती या देशातील शाळांना पर्यावरण संवर्धनासाठी प्रोत्साहन देण्याचे कार्य करते. यासाठी ‘पर्यावरणसंबंधी प्रात्यक्षीकाद्वारे जागरूकता’ अशी मोहीम राबविण्यास शाळांना प्रोत्साहित करते. वर्षभराची कामगिरी तपासून ‘ ग्लोबल ग्रीन स्कूल स्टुअर्डशीप अवार्ड साठी निवड करतात. यंदा हा पुरस्कार पुणे शहरातील पत्रकारनगर परिसरातील ‘विखे पाटील मेमोरियल स्कूल’ या शाळेला मिळाला आहे. या शाळेने पर्यवरण संवर्धनासाठी विद्यार्थ्यामध्ये जागरूकता आणली. मुख्याध्यपिका सौ मृणालिनी भोसले ,सायन्स शाखेच्या शिक्षिका सौ निधी जैन यांच्या मार्गदर्शनाखाली पर्यावरण संवर्धन उपक्रम राबविण्यात आले. शुक्रवारी न्यूयार्क मध्ये पुरस्काराचे वितरण होऊन विखे पाटील मेमोरियल स्कूलचा सन्मान करण्यात आला.

विद्यार्थी एकात्मिक विकासावर फोकस

शाळेच्या या यशाविषयी बोलतांना विखे पाटील फौंडेशनचे चेअरमन डॉ अशोक विखे पाटील म्हणाले, मुलांचे ज्ञान ,व्यक्तिमत्व विकास हा शाळेतल्या वर्गापेक्षा बाहेर घडत असतो.विखे पाटील मेमोरियल स्कूल मध्ये शिकणाऱ्या विद्यार्थ्यांना के.जी.च्या वर्गापासूनच शिक्षण,ज्ञान यांचेशी निगडीत ५० प्रकारचे विविध उपक्रम राबवून एकात्मिक विकासावर प्रामुख्याने फोकस केला जातो. परीक्षा व होमवर्क यावर कमी भर दिला जातो. या वेगळेपणामुळेच येथे शिकलेले बहुसंख्य विद्यार्थी जगभर विविध क्षेत्रात स्थिरावली आहेत. अमेरिकेत झालेल्या सन्मानाने आमच्या शाळेला आणखी काम करण्यास बळ मिळाले आहे असे डॉ. अशोक विखे पाटील म्हणाले.
फोटो... शुक्रवारी न्यूयार्क मध्ये पुणे शहरातील विखे पाटील मेमोरियल स्कूलचा ‘ ग्लोबल ग्रीन स्कूल स्टुअर्डशीप’ हा पर्यावरण संवर्धन मधील मानाचा पुरस्कार देण्यात आला. पुरस्कार प्राप्त शाळेचा हा परिसर.

मोबाइल अॅप डाउनलोड करा आणि राहा अपडेट

महास्वच्छता अभियान विद्यार्थ्यांच्या भरवशावर

0
0

म. टा. वृत्तसेवा, सातपूर
महास्वच्छता अभियानाच्या सातपूरमधील कार्यक्रमास विभागीय कार्यालयाबाहेर नगरसेवकांसह महापालिकेच्या सर्वच विभागातील अधिकारी व कर्मचाऱ्यांनी हजेरी लावली. अभियानास प्रारंभ झाल्यानंतर ही मंडळी गायब झाली आणि शालेय विद्यार्थ्यांनीच खऱ्या अर्थाने परिसराची स्वच्छता केली.
सातपूरला सभापती माधुरी बोलकर यांच्या उपस्थितीत अभियानास प्रारंभ करण्यात आला. यावेळी विभागीय अधिकारी निर्मला गायकवाड, शिवसेना गटनेते विलास शिंदे, मनसे गटनेते सलिम शेख, आरोग्य उपसभापती योगेश शेवरे, नगरसेविका पल्लवी पाटील, अलका आहिरे, हर्षदा गायकर यांच्यासह बांधकाम, नगररचना, ड्रेनेज, भुयारी गटार, वीज, आरोग्य, विविध कर या विभागातील अधिकारी, कर्मचारी उपस्थित होते. नंतर मात्र ही सर्व मंडळी गायब झाली. विद्यार्थ्यांसह स्वच्छताप्रेमी नागरिकांनी अभियानात हिरीरीने सहभाग घेतला. कामगारनगर, स्वारबाबानगर, खुटवडनगर, सातपूरगाव, महादेववाडी, संतोषी मातानगर, सीपीटूल (प्रबुद्धनगर), सातपूर कॉलनी, अंबडलिंकरोड, चुंचाळे शिवार, जाधव टाउनशिप, जाधव संकुल, अशोकनगर, नीळकंठेश्वरनगर, सावरकरनगर, राज्य कर्मचारी वसाहत, विश्वासनगर, वास्तूनगर, पवार संकुल, राधाकृष्णनगर, श्रमिकनगर, शिवाजीनगर, धर्माजी कॉलनी, ध्रुवनगर, गंगापूरगाव, सोमेश्वर मंदिर परिसर, गंगापूररोड व आनंदवली गावात स्वच्छता करण्यात आली. दरम्यान, शिवाजीनगरच्या ब्रिटिशकालीन बंधाऱ्यात टाकण्यात आलेला कचरा परिसरातील नागरिकांनी स्वच्छ केला. आरोग्य विभागाने किमान आठवड्यातून एकदा तरी बंधाऱ्याच्या कडेला स्वच्छता करावी, अशी अपेक्षा नागरिकांनी व्यक्त केली.

कचरा संकलन पिशव्याच कुचकामी
कचरा संकलन करण्यासाठी वाटप झालेल्या पिशव्याच कुचकामी होत्या. कचरा टाकल्यावर या पिशव्या फाटल्याचे शिक्षक व विद्यार्थ्यांचे म्हणणे होते. पर्यायी व्यवस्थाच नसल्याने संकलित केलेला कचरा रस्त्याच्या बाजूला टाकण्याची वेळ विद्यार्थ्यांवर आली.

मोबाइल अॅप डाउनलोड करा आणि राहा अपडेट

कुपोषितांना ‘कांगारू मदर केअर’ची ऊब

0
0

पंकज काकुळीद, धुळे

आदिवासी जिल्हा असलेल्या नंदुरबारमधून कुपोषणाची समस्या उखडून काढण्यासाठी ‘कांगारू मदर केअर’ या उपक्रमाला लक्षण‌ीय यश मिळाले आहे. हा उपक्रम यशस्वीपणे राबविल्यामुळे गेल्या काही महिन्यांत जिल्ह्यातील कमी वजनाचे बाळांचे जन्माचे प्रमाण २० टक्क्यांपर्यंत कमी झाल्याचे निदर्शनास आले आहे. ‘कांगारू मदर केअर’च्या प्रयत्नांमुळे येत्या काळात नंदूरबार जिल्ह्यातील कुपोषणाचे प्रमाण कमी होण्यास मदत होणार आहे.

नंदुरबार जिल्ह्यातील कुपोषणाच्या वाढत्या समस्यामुळे गेल्या काही वर्षांत शेकडो बालकांना आपला जीव गमवावा लागला आहे. त्यामुळे या समस्येवर उपाय म्हणून जागतिक आरोग्य संघटना, टाटा ट्रस्ट व युनिसेफकडून ‘कांगारू मदर केअर’(KMC) हा उपक्रम हाती घेण्यात आला आहे. या उपक्रमांतर्गत जन्मतः कमी वजानाच्या बालकांच्या प्रकृतीत सुधारणा करण्यात ‘कांगारू मदर केअर’ला यश आले आहे.

‘कांगारू मदर केअर’बाबत माहिती जाणून घेण्यासाठी महाराष्ट्र टाइम्सच्या प्रतिनिधीने याबाबत सविस्तर आढावा घेतला. नंदुरबार जिल्ह्यातील सहा तालुक्यांपैकी धडगाव व अक्कलकुवा तालुक्यात मोठ्या प्रमाणावर कमी वजनाचे बालक जन्माला येत असल्याचे आरोग्य विभागाच्या निदर्शनास आले आहे. त्यामुळे युन‌िसेफच्या माध्यमातून अशा बालकांची प्रकृती सुधारण्यासाठी ‘कांगारु मदर केअर’ हा उपक्रम हाती घेण्यात आला. त्याद्वारे जिल्ह्यातील गाव पातळीवर अंगणवाडी सेविकांसह आरोग्य विभागातील अधिकारी व कर्मचाऱ्यांना प्रशिक्षण देवून जिल्ह्यातील शेकडो बालक व माता यांच्या प्रकृतीत सुधारणा करण्यासाठी एक उपक्रम हाती घेण्यात आला.

आदिवासी भागातील महिला प्रसृती झाल्यानंतर जन्मलेल्या बाळाचे वजन कमी भरते. कारण गरोदरपणात मातेला आवश्यक पौष्ट‌िक अन्न आहारातून मिळत नाही. तसेच काही वेळा कमी वयात लग्न होणे, दोन मुलामंधील अंतर कमी असणे, यासह अन्य कारणांमुळे मुलांचे वजन कमी भरते. मात्र आता शासनासह जागतिक आरोग्य संघटनांनी याकडे लक्ष वेधून पुढाकार घेत प्रयत्न सुरू केले आहेत. आणि त्यात बरेच यश हाती येत असल्याचा दावाही युनिसेफकडून करण्यात आला आहे.

मोबाइल अॅप डाउनलोड करा आणि राहा अपडेट

‘अंगात येणं’ समजून घेताना...

0
0

सौरभ बेंडाळे, कॉलेज क्लब रिपोर्टर

श्रावणमास सरत नाही तोच गणपतीबाप्पांचे आगमन होते. बाप्पांना निरोप देऊन अवघा पंधरवडा सरतो अन् नवरात्रीचे चैतन्यपर्व अवतरते! नवरात्रोत्सवात आदिशक्तीच्या पूजाविधीसोबत व्रतवैकल्ये, हळदी-कुंकू, लक्ष्मीचे उपवास, नवस, गरबा, दांडिया असे कार्यक्रम जोरात सुरू होतात. अशा भक्तिमय वातावरणातच एक सामान्य, पण काहीसा वेगळा प्रकारही दिसतो तो म्हणजे अंगात येणं. हा नेमका काय प्रकार आहे, हे उलगडण्याचा हा प्रयत्न...

--

स्त्रियांच्याच अंगात देवी येते असा समज समाजात दृढ आहे. मात्र, अंगात येणं ही स्थिती पुरुषांमध्येही अनेकदा जाणवते. घटस्थापनेदिवशी ग्रामदेवीच्या मंदिरात पहाटेच्या काकड आरतीवेळी घडलेली घटना याचे जिवंत उदाहरण बनते. पहाटे देवीची आरती सुरू झाल्यावर मंदिराच्या आवारात चाळिशीत स्त्री हळूहळू घुमत अनेकांचे लक्ष वेधून घेत होती. केस मोकळे सोडून जोरजोरात घुमत अस्पष्ट भाषेत हुंकार देत ती बोलत होती. अंगात देवी आली म्हणत प्रचंड गर्दी तिला वाट देत होती. इतर स्त्रिया तिच्या ओटीत फुलं वाहत कपाळी हळद-कुंकू लावत तिला नमस्कार करत होत्या. ही स्त्री मंदिराच्या सभामंडपात आली तेव्हा पंचवीस वर्षे वय असलेला मुलगा तिला पाहून चक्कर येत खाली बसला. तो बसल्यानंतर रांगत्या बाळाप्रमाणे चालू लागला. हळूहळू तोही मान हलवू लागला. अस्पष्ट हुंकारात वाघाची डरकाळी फोडत तो त्या स्त्रीमागून जात होता. या दोघांना पाहून सर्वच त्यांना नमस्कार करीत होते. तेवढ्यात आरती संपली पुजाऱ्यांनी यांना प्रसाद दिल्यावर ही दोघेही शांत झाली. मात्र, त्यांना मागील दहा मिनिटांत काय झालं याची पुसटशीही कल्पना नव्हती.

--

मनाच्या अवस्थेचे प्रतिबिंब

अंगात येणे याबाबत समाजात धार्मिक भावभावना, परंपरा दिसतात. मात्र, अंगात येणे ही मनाची विशिष्ट अवस्था असते. हा एक आजार असल्याचे सिद्ध झाले आहे. अशिक्षित, कौटुंबिक समस्या असलेल्या किंवा समाजात न मिसळणाऱ्या एकलकोंड्या व्यक्तींमध्ये अंगात येण्याचे प्रमाण अधिक जाणवते. स्वतःकडे इतरांचे लक्ष वेधून घेण्यासाठी त्यांची बुद्धी हे कृत्य करायला भाग पाडते. हा आजार पझेशन सिंड्रोम प्रकारात मोडतो. पझेशन सिंड्रोम म्हणजे मनाचे खेळ. यात अशिक्षित मनुष्याच्या मनात मानसिक भावनेशी संबंध असलेले खेळ अधिक रंगतात. पझेशन सिंड्रोममध्ये गुरफटलेल्या व्यक्ती त्यांच्या मनातील खळबळ कोणाकडे व्यक्त करू शकत नाहीत. कोंडमारा सहन करण्याची त्यांची इच्छा संपल्यावर त्यांच्या अबोध मनाची अवस्था या क्रियेचा (अंगात येणे) शस्त्र म्हणून वापर करते. पझेशन सिंड्रोम असलेला व्यक्ती अधूनमधून एखाद्या वेगळ्याच चरित्रासोबत जोडला जातो. या चरित्रासंबंधित वर्तनही करीत आपल्या इच्छा व्यक्त करतो. काही काळात तो पूर्ववत होतो, पण मधील काळातील वर्तन व त्याच्या स्थितीबद्दल तो अनभिज्ञ असतो.

--

मानसिक भ्रमातून इच्छापूर्ती

अंगात येण्याच्या घटना अशिक्षित, समाजविरहित राहणाऱ्या स्त्रिया किंवा पुरुष यांच्याबाबतीत घडतात. या व्यक्ती सतत एकच विचार करीत असतात. यामुळे भावनिक व अंधश्रद्धाळू विचार त्यांच्या मनात येतात. पारंपरिक मतांचा, संस्कारांचा बडगा याला कारण असतो. ज्या व्यक्तींच्या अंगात येते त्यांना विशेषत: स्वयंभू देवळे, देवीची आरती, लखलखाट, धूप, पालखी, नवरात्रीचा मंडप, लालभडक कुंकू, हिरवा शालू, त्रिशूळ, समोरच्याच्या अंगात येणे अशी परिस्थिती कारणीभूत ठरताना दिसते. काही वेळा व्यक्ती भ्रमिष्ट होते, बेताल होते, याला मनोरुग्ण अवस्था म्हणतात. हा सौम्य प्रकार नसून, याला न्यूरॉसिस संबोधले जाते. अनेकदा अंगात आलेल्या व्यक्तींची ओटी भरली किंवा प्रसाद देत कपाळी कुंकू लावल्यास ते नॉर्मल होतात. हा सर्व प्रकार त्यांच्या मानसिक भ्रमामुळे घडतो. अंगात आलेली व्यक्ती हव्या असणाऱ्या वस्तू किंवा इतर गोष्टींची जी मागणी करेल ती पुरविली जाते. यातून पझेशन सिंड्रोम असलेली व्यक्ती नकळतपणे मनातील इच्छा पूर्ण करून घेते. हा प्रकार ग्रामीण भागात बुवाबाजीच्या आहारी गेलेल्यांमध्ये बघायला मिळतो.

--

योग्य उपायांनी नियंत्रण शक्य

अंगात येणे या समस्येवर योग्य उपचार करून मात करणे शक्य आहे. सायकोथेरेपीअंतर्गत अंगात येणाऱ्या व्यक्तीला समविचारी व्यक्तींपासून दूर ठेवायला हवे. त्या व्यक्तीची कौटुंबिक बाजू विचारत घ्यावी. संमोहनाद्वारे मनपरिवर्तनाचा प्रयत्न करावा. मनात येणारे विचार व वर्तणूक हे सर्व भ्रमाचे प्रकार असल्याचे समजून सांगावे. साध्या डॉक्टरकडे यावरचे उपचार नाहीत. त्यामुळे पुन्हा मांत्रिक-तांत्रिकचे पेच समोर उभे राहतात. म्हणून अशा समस्येप्रसंगी मानसोपचारतज्ज्ञांचा सल्ला घ्यावा. मेडिटेशनचाही प्रभावी वापर करता येतो. अंगात येणे हा प्रकार सर्रास होत असल्याने अंधश्रद्धेला वाव मिळत आहे. यात अशिक्षितांसोबत मध्यमवर्गीय स्त्री-पुरुषदेखील गुंतत असल्याने यावर समाजप्रबोधन होणे गरजेचे आहे.

मोबाइल अॅप डाउनलोड करा आणि राहा अपडेट


भाविकांनी फुलली कालिका यात्रा!

0
0

म. टा. प्रतिनिधी, नाशिक

शहराचे ग्रामदैवत असणाऱ्या मुंबई नाका ‌परिसरातील श्री कालिका देवीच्या दर्शनासाठी शनिवारी भाविकांनी गर्दी केली. पहाटेपासूनच भाविकांच्या गर्दीचा ओघ वाढल्याचे दिसून आले. शनिवारी संध्याकाळी दर्शनासाठी लांबच लांब रांगा लागल्या होत्या.

कालिका देवी मंदिराच्या नवरात्रोत्सवास पुरातन परंपरा आहे. शनिवारी तिसरी माळ असल्याने दर्शन, धार्मिक विधींसोबतच यात्रा परिसरही भाविकांच्या गर्दीने चांगलाच बहरला आहे. शनिवार आणि रविवारी आलेल्या सुटीमुळे भाविकांच्या गर्दीमध्ये वाढ होण्याची शक्यता लक्षात घेत पोलिसांनीही सुरक्षा व्यवस्था कडक केली आहे. याशिवाय शहरातील विविध सामाजिक संस्थांचे कार्यकर्ते आणि महाविद्यालयीन विद्यार्थीही स्वयंसेवक म्हणून गर्दीच्या नियोजनासाठी योगदान देत आहेत. यात्रोत्सव काळात या मंदिरात दिवसाकाठी सुमारे दोन लाखांवर भाविक दर्शन घेऊन जातात. शहरासोबतच उत्तर महाराष्ट्रातून या मंदिरात उत्सव काळात येणाऱ्या भाविकांची संख्या जास्त आहे. हे लक्षात घेऊन मंदिर समितीनेही नियोजन केले आहे. मंदिराच्या आवारात भाविकांसाठी पादत्राणांसह मंडप व्यवस्था करण्यात आली आहे. सुरक्षेसाठी येथे पुरेशे सुरक्षा रक्षक आणि पोलिस कर्मचारीही तैनात असून, वाढत्या गर्दीवर सुमारे ३२ सीसीटीव्ही कॅमेरे वॉच ठेवून आहेत. येथे येणाऱ्या भाविकांमध्ये महिलांची संख्या मोठी आहे.

यात्रेत विविध प्रकारचे स्टॉल्स लागले असून, अबालवृध्दांची यात्रेत उपस्थिती आहे. दूरहून दिसणाऱ्या रहाट पाळण्यांसह खेळण्या, विविध गृहपोयोगी वस्तू, कौशल्यपूर्ण खेळ, खाद्यपदार्थ आदींची रेलचेल आहे. यात्रामार्गावर वाहनांना बंदी करण्यात आली असून, सुरक्षेच्या दृष्टीने काळजी घेतली जात आहे.

मोबाइल अॅप डाउनलोड करा आणि राहा अपडेट

शौचालय अळ्यांचे केंद्र

0
0

भैरवनाथ नगरातील सार्वजनिक शौचालयांची दुरवस्था; आरोग्य धोक्यात

म. टा. वृत्तसेवा, सिन्नर फाटा

नाशिक शहराच्या मुकुटात केंद्र सरकारने हागणदारी मुक्तीचा मानाचा तुरा खोवला असला तरी शहरातील सार्वजनिक शौचालयांच्या देखभालीकडे पालिका प्रशासन डोळेझाक करीत असल्याचे चित्र सध्या दिसून येत आहे. पंचकच्या भैरवनाथ नगरातील सार्वजनिक शौचालयातील सर्व युनिटमध्ये पाणी तुंबल्याने या शौचालयाची अवस्था अक्षरशः ओकारी आणणारी झाली आहे. या शौचालयाच्या पाण्याच्या टाकीत डेंग्यूच्या अळ्यांनी थैमान घातले असल्याचा दावाही या भागातील योगेश मुळाणे, गणेश बोराडे, तानाजी सातपुते या स्थानिक नागरिकांनी केला आहे.

नाशिक शहर नुकतेच केंद्र सरकारने 'हागणदारी मुक्त' घोषित केले आहे. परंतु, शहराच्या विविध भागात मात्र 'मुक्त हागणदारी' सुरू असल्याचे चित्र दिसत आहे. प्रभाग क्रमांक १८ मधील पंचक परिसरातील भैरवनाथ नगरातील सार्वजनिक शौचालय देखभालीअभावी अक्षरशः खराब पाण्याने तुंबले असून, नागरिक मुख्य रस्त्यावरच शौचविधी आटोपत आहेत. या शौचालयाच्या पाण्याच्या टाकीतही डेंग्यूच्या अळ्या निर्माण झाल्या असल्याचा दावा स्थानिक नागरिकांनी केला आहे.

शौचालयात तुंबले पाणी

या सार्वजनिक शौचालयातील तुंबलेले पाणी गेल्या काही दिवसांपासून मुख्य रस्त्यावर आले असल्याने या भागातील नागरिक उग्र दुर्गंधीने त्रस्त झाले आहेत. या सार्वजनिक शौचालयाच्या दुरवस्थेस पालिकेचा आरोग्य व स्वच्छता विभागाचे दुर्लक्षच जबाबदार असल्याचा आरोप नगरातील स्थानिक नागरिकांनी केला आहे. या दुर्गंधीकडे तातडीने लक्ष देत याठिकाणाची स्वच्छता करीत येत्याकाळात याठिकाणी मनपा प्रशासनाने उपाययोजना करावी, अशी मागणी नागरिकांनी केली आहे.

अस्वच्छतेचे ग्रहण कायम

शुक्रवारी, शहरात पालिका प्रशासनाने महास्वच्छता अभियान राबविले. परंतु, दुसरीकडे शहरातील बहुतेक सार्वजनिक शौचालयांच्या देखभालीकडे पालिका प्रशासन डोळेझाक करित आहे. त्यामुळे या परिसरातील नागरिक रस्त्यावरच शौचविधी उरकत असल्याचे चित्र काल पंचक परिसरात बघायला मिळाले. भैरवनाथ नगरातील सार्वजनिक शौचालयाची दुरावस्था झाल्याने सर्व युनिट तुंबलेले असल्याने या भागात मोठ्या प्रमाणात दुर्गंधी पसरली आहे.

सार्वजनिक शौचालयाच्या देखभालीकडे पालिकेच्या आरोग्य व स्वच्छता विभागाकडून साफ दुर्लक्ष होत आहे. बाहेरील पाण्याच्या टाकीतही डेंगुच्या अळ्या झाल्या आहेत. तुंबलेले पाणी रस्त्यावर वाहत असून, नागरिकांना त्रास होत आहे.

-गणेश बोराडे, स्थानिक नागरिक

मोबाइल अॅप डाउनलोड करा आणि राहा अपडेट

एमआयडीसीचे अधिकारी रडारवर

0
0

म. टा. खास प्रतिनिधी, नाशिक

एमआयडीसी फाइल गहाळ प्रकरणात उद्योजक इंद्रपालसिंग सहाणी यांना पोलिसांनी अटक केल्यानंतर एमआयडीसीच्या अनेक तत्कालिन अधिकाऱ्यांचे धाबे दणाणले आहे. तब्बल १० महिन्यांनंतर या प्रकरणात पोलिसांनी तपास करून कारवाई केली. त्यामुळे त्यातील अनेक धागेदोरे पोलिसांच्या हाती लागले असून, त्यांनी कडक कारवाईच्या दिशेने पाऊल टाकले आहे.

औद्योगिक वापरासाठी असलेल्या भूखंडावर व्यापारी वापर करणाऱ्या सहाणी यांना एमआडीसीने १ कोटी ४५ लाख ७१ हजार ६२८ रुपये भरण्याचे आदेश ५ डिसेंबर २०१६ ला दिले होते. शासकीय ऑड‌िट झाल्यानंतर ही रक्कम काढण्यात आली होती. पण ही कारवाई होण्याची कुणकुण लागताच त्याअगोदर ही फाइल गहाळ करून हे प्रकरण मिटवण्याचे उद्योग कर्मचाऱ्यांमार्फत करण्यात आले होते. त्यातून पुढे पोलिस तक्रार झाली.

सखोल चौकशीची गरज

या प्रकरणात एमआयडीने एका भूमापकला अगोदरच निलंबीत केले आहे. तर एकाची बदली केली आहे. त्यामुळे या प्रकरणात सखोल चौकशी केल्यानंतर अनेक धागेदोरे पोलिसांच्या हाती लागणार आहे. फाईल गहाळ करण्याच्या प्रकरणाबरोबरच अनेक कागदपत्र एमआयडीसीतून अशाच पध्दतीने गहाळ झाल्याचे बोलले जात आहे. त्याची चौकशी केल्यास त्यातून अनेक प्रकारही उघडकीस येणार आहेत.

मोबाइल अॅप डाउनलोड करा आणि राहा अपडेट

सप्तशृंगीचा जयघोष

0
0

म. टा. वृत्तसेवा, कळवण

उदे गं अंबे उदे, जय माता दी, सप्तशृंगमाता की जय... या जयघोषात सप्तशृंगगडावर शनिवारी तिसऱ्या माळेला हजारो भाविकांनी भगवतीचे मनोभावे दर्शन घेतले. शनिवार व रविवार या सुटीच्या दिवसांचे औचित्य साधून भाविकांची मांदियाळी गडावर दिसून येत आहे.

शनिवारी पहाटेपासूनच उत्तर महाराष्ट्रासह राज्यभरातील, तसेच अन्य राज्यांतील भाविकांची दर्शनासाठी गर्दी झाली होती. उच्च न्यायालयाचे न्यायमूर्ती रणजित मोरे यांच्या हस्ते सकाळी ७ वाजता सपत्निक पूजा झाली. जिल्हा न्यायाधीश ट्रस्टच्या अध्यक्षा श्रीमती नंदेश्वर, न्यायाधीश बोधनकर, देशमुख, बुक्के आदींनीही महापूजा केली. देवस्थानचे विश्वस्त डॉ. रावसाहेब शिंदे, व्यवस्थापक सुदर्शन दहातोंडे, भगवान नेरकर आदींनी मान्यवरांचे स्वागत केले.

निसर्गाच्या सान्निध्यात असलेल्या सप्तशृंगगडाला यात्रेचे स्वरूप प्राप्त झाले आहे. प्रशासनाने घेतलेल्या प्लास्टिकमुक्तीच्या निर्णयाच्या अंमलबजावणीसाठी देवस्थान ट्रस्ट, ग्रामपंचायत सदस्य, ग्रामसेवक, कर्मचारी, तसेच ग्रामस्थ पुढाकार घेताना दिसून येत आहेत. त्यात गिरीश गवळी, राजेश गवळी, संदीप बेनके आदींचा समावेश आहे. कळवणचे पोलिस उपअधीक्षक देवीदास पाटील, निरीक्षक सुजय घाडगे यांच्या मार्गदर्शनाखाली बंदोबस्त तैनात करण्यात आला आहे.

---

जगदंबेच्या दर्शनासाठी रांगा

येवला ः येवला तालुक्यातील श्रीक्षेत्र कोटमगावात शनिवारी तिसऱ्या माळेला हजारो भाविकांनी आई जगदंबेचे दर्शन घेतले. सकाळी दर्शनासाठी रांगा लागल्या होत्या. येवला शहरापासून अवघ्या तीन किलोमीटर अंतरावर नाशिक-औरंगाबाद राज्य महामार्गालगत नारंदी नदीच्या तीरावर वसलेल्या श्रीक्षेत्र कोटमगावात नवरात्रोत्सवात भरणारी यात्रादेखील अनेकांच्या आकर्षणाचा विषय ठरत असून, शनिवारी मोठ्या संख्येने भाविकांनी यात्रेचाही आनंद लुटला. रविवारी सुटीमुळे गर्दी आणखी वाढण्याची चिन्हे आहेत.

--

भाविकांनी फुलले चांदवड

मनमाड ः चांदवड निवासिनी, राजराजेश्वरी, कुलस्वामिनी अशा विविध नावाने ओळखल्या जाणाऱ्या चांदवड येथील रेणुकामातेच्या नवरात्रोत्सवाने परिसरात चैतन्य अवतरले आहे. राज्यभरातील हजारो भाविकांच्या गर्दीने चांदवड शहर व देवी मंदिर परिसर फुलून गेला असून, शनिवारी तिसऱ्या माळेला हजारो भाविकांनी मनोभावे देवीचे दर्शन घेतले.

दररोज देवीची पालखी, महाभिषेक, आरती आदी उपक्रम होत आहेत. यंदा देवी मंदिरात हजाराहून अधिक महिला घटी बसल्या आहेत. चार प्रशस्त हॉल त्यासाठी उपलब्ध अाहेत. नवरात्रोत्सवास येणाऱ्या भाविकांसाठी संस्थानतर्फे पिण्याचे पाणी, दर्शनरांगेदरम्यान बेंचेस, सीसीटीव्ही यंत्रणा, दर्शनासाठी दोन स्वतंत्र जिने आदी सुविधा उपलब्ध करण्यात आल्या असून, यात्रोत्सवादरम्यान विविध खेळणी, वस्तूंच्या दुकानांचे शिस्तबद्ध नियोजन करण्यात आले आहे. यात्रोत्सव काळात मंदिर परिसरात पोलिस निरीक्षक अनंत मोहिते, उपनिरीक्षक कैलास चौधरी यांच्या मार्गदर्शनाखाली सुरक्षा यंत्रणा कार्यरत आहे. पोलिस कर्मचारी, गृहरक्षक दलाचे जवान, पी. डी. सुराणा कॉलेजचे स्वयंसेवक भाविकांना सहकार्य करीत आहेत.

व्यवस्थापक मधुकर पवार यांच्या मार्गदर्शनाखाली मंदिराचे सहाय्यक व्यवस्थापक सुभाष पवार, मुख्य पुजारी तानाजी अहिरराव, पुरोहित प्रकाश वैद्य, हरेंद्र वैद्य, नंदकुमार वैद्य, विजय जोशी, नारायण कुमावत, दीपक कुमावत, खंडू आहेर, हरिभाऊ कासव, काळू पवार आदी प्रयत्नशील आहेत.

मोबाइल अॅप डाउनलोड करा आणि राहा अपडेट

ग्लॅमरस माहोलमध्ये ठेका...

0
0

लखन सावंत, कॉलेज क्लब रिपोर्टर

नवरात्री म्हटली, की रात्री उशिरापर्यंत चालणारा दांडिया रास, गरबा आणि या सर्वांवर ताल धरणारी तरुणाई, असे चित्र डोळ्यासमोर येते. शहरातील विविध भागात मोकळ्या मैदानात किंवा चौकाचौकांत अशा प्रकारच्या दांडिया रासचे आयोजन विविध मंडळांकडून केले जाते. मात्र, आता दांडिया रासला ग्लॅमरस लूक प्राप्त होत असून, तो मोकळ्या मैदानात न भरविता बंदिस्त लॉन्समध्ये भरविला जात आहे. त्याचे पासेस अनेकांना न परवडणारे असले, तरी अशा ग्लॅमरस माहोलमध्ये मोठ्या प्रमाणावर तरुणाई ठेका धरताना दिसून येत आहे.

दांडियाला अलीकडे मोठ्या प्रमाणात इव्हेंटचे स्वरूप प्राप्त झाले आहे. परिणामी पारंपरिक दांडियाला कुठेतरी ब्रेक लागल्याची भावना असंख्य दांडियाप्रेमींकडून व्यक्त होत आहे. पारंपरिक दांडिया मोकळ्या पटांगणात किंवा चौकात न भरविण्याची अनेक कारणे आहेत. यातील मुख्य मुद्दा म्हणजे सुरक्षाव्यवस्था. दांडिया खेळण्यासाठी तरुणी व महिला मोठ्या संख्येने येत असतात. मोकळ्या पटांगणात या सर्वांना सुरक्षा पुरविणे अवघड होते. त्यातून छेडछाड, चेनस्नॅचिंगसारखे प्रकार घडतात. त्याचप्रमाणे नोंदणीकृत मंडळांनाच कार्यक्रमासाठी मिळणारी परवानगी, डीजेवर आलेली बंदी अन् ऑर्केस्टाचा न परवडणारा खर्च आदी बाबीही त्यासाठी कारणीभूत ठरत आहेत.

सार्वजनिक दांडिया रासचे आयोजन करणाऱ्या अनेकांनी पारंपरिक दांडियाला छेद देत व्यावहारिक दृष्टिकोन ठेवत बंदिस्त दांडियाला पसंती दिली आहे. यामध्ये दांडियाचे पासेस विक्री केले जातात. जमा होणाऱ्या पैशातून दांडियासाठी लागणारा सर्व खर्च भागतो अन् आयोजकांनादेखील चांगले पैसे मिळतात. त्याचबरोबर लॉन्समध्ये किंवा बंदिस्त जागेत बाउन्सर नेमलेले असल्याने सुरक्षेचा प्रश्नदेखील सुटतो.

--

सुरक्षा आणि व्यावहारिक दृष्टिकोन ठेवून आम्ही बंदिस्त जागेत दांडिया रासचे आयोजन केले आहे. त्यामुळे रात्री उशिरापर्यंत चालणारा दांडिया रास सुरक्षित ठरत आहे. दांडियाप्रेमींना विविध सुविधा पुरविणेदेखील त्यामुळे शक्य होत आहे.

-शुभांगी कछवा, अायोजक

---

शहरासह उपनगरांत धमाल

शहरातील गंगापूररोड, पंचवटी, सिडको, नाशिकरोड, देवळाली कॅम्प, सातपूर परिसरात आयोजित दांडिया रास अन् गरब्यामुळे नवरात्रोत्सवाची रंगत वाढत असल्याचे दिसून येत आहे. रविवारच्या सुटीच्या पार्श्वभूमीवर शनिवारी रात्री सर्वच ठिकाणचे दांडिया रास हाऊसफुल्ल असल्याचे दिसून आले. मैदाने व चौकांत भरणाऱ्या दांडिया रासचे प्रमाण यंदा काहीसे घटले असून, विविध लॉन्स, तसेच अन्य बंदिस्त ठिकाणी आयोजित करण्यात आलेल्या दांडिया रास अन् गरब्यात तरुणाई विविध पारंपरिक गीतांच्या तालावर ठेका धरताना दिसून येत आहे. विशेष म्हणजे तरुणाईसोबतच मध्यमवयीन स्त्री-पुरुषही त्यात आघाडीवर अाहेत.

मोबाइल अॅप डाउनलोड करा आणि राहा अपडेट

स्वातंत्र्यवीरांचा प्रेरणास्रोत भगूरची रेणुका देवी

0
0

विजय गोळेसर

--

देवीच्या साडेतीन पीठांमध्ये रेणुका देवीचे स्थान महत्त्वाचे मानले जाते. रेणुका देवीची अनेक मंदिरे महाराष्ट्रात आहेत. त्यापैकी नाशिकजवळच्या भगूर येथील देवी मंदिर रेणुका देवीचे मंदिर म्हणूनच ओळखले जाते. या मंदिराचे वैशिष्ट्य म्हणजे या मंदिरासमोर असलेली बारव किंवा विहीर. या बारवेत स्नान केल्यावर त्वचाविकार बरे होतात, अशी भाविकांची श्रद्धा आहे. भगूरच्या पंचक्रोशीतील भाविक तर यासाठी भगूरला येतातच, परंतु मुंबई-पुण्याकडचे भाविकही येथे येतात. भगूर हे गाव स्वातंत्र्यवीर सावरकर यांचे जन्मगाव म्हणून देशभर प्रसिद्ध आहे. देश पारतंत्र्यात असताना ‘जयोस्तुते श्रीमहन्मंगले शिवास्पदे शुभदे!’ हे अजरामर स्फूर्तिगीत लिहिणाऱ्या सावरकरांच्या भगूरची देवी आजही तेवढीच प्रेरणादायी आहे.

--

नवरात्रोत्सवात पहिल्या माळेपासूनच भगूरच्या देवीला भाविकांची मोठी गर्दी होते. पुरातन काळात दंडकारण्याच्या या भागात भृगू ऋषींचा आश्रम होता. त्यावरूनच या भागाला ‘भगूर’ हे नाव पडले आहे, असे म्हणतात. राम, लक्ष्मण, सीता वनवासात असताना येथे आले होते. रामाने या देवीची पूजा केली होती, असे म्हणतात. अलीकडच्या काळात एका भाविक महिलेला दृष्टांत झाल्यावर जमिनीतून स्वयंभू अष्टभुजा देवी निघाली तीच ही रेणुका देवी.

नाशिक-भगूर रस्त्यावरच देवीचे प्रशस्त मंदिर आहे. २०१२ मध्ये या मंदिराचा जीर्णोद्धार करण्यात आला आहे. देवीचे मूळ मंदिर दीडशे-दोनशे वर्षांचे असावे. धटिंगण नावाच्या दानशूर व्यापाऱ्याने हे मंदिर बांधले असल्याचा उल्लेख मंदिराच्या भिंतीवरील कोनशिलेवर केलेला आहे. मंदिर संगमरवरी असून, स्वच्छ व प्रशस्त आहे. इतर मंदिरांत देवाचा गाभारा वेगळा व लहान असतो. येथे मात्र मोठ्या सभामंडपातच देवीची स्थापना केलेली आहे. त्यामुळे भाविकांची संख्या कितीही वाढली, तरी गर्दी जाणवत नाही. मंदिरात प्रवेश केल्याबरोबर देवीची प्रसन्न मूर्ती नजरेस पडते.

मंदिराच्या आसपास व रस्त्याच्या दुतर्फा फुले, माळा, नारळ, कुंकू, ओटीचे साहित्य, हिरव्या साड्या, बांगड्या, चांदीचे पत्रे आदींची अनेक दुकाने आहेत.

--

नवसाला पावणारी देवी

भगूरची देवी नवसाला पावते अशी अनेकांची दृढ श्रद्धा आहे. मुला-मुलींचे विवाह जुळणे, मूलबाळ होणे, आजार दूर होणे, कटकटी, भांडणे मिटणे, कोर्ट-कचेऱ्यांतील कामे सुरळीत होणे, शेती पिकणे, भरपूर उत्पन्न मिळणे अशा असंख्य मागण्या भाविक देवीपुढे मांडतात आणि त्या पूर्ण झाल्यावर येथे नवस फेडायला येतात. नवरात्रात घटी बसणाऱ्या स्त्री-पुरुषांची संख्याही येथे लक्षणीय असते. नवरात्रात पहिल्या माळेला पहाटे ५ वाजता घटस्थापना केली जाते. यावर्षी चंद्रकांत बाळकृष्ण चिंगरे यांचे हस्ते घटस्थापना करण्यात आली. अष्टमीला होमहवन केले जाते. नवमीला कुळधर्म करतात. दसऱ्याच्या दिवशी सीमोल्लंघनाचा कार्यक्रम होतो. नवरात्रीनंतर कोजागरी पौर्णिमा उत्साहात साजरी केली जाते.

--

यात्रोत्सवात मोठी आर्थिक उलाढाल

दर वर्षी नवरात्रात भगूरच्या देवीची मोठी यात्रा भरते. भगूरच्या पंचक्रोशीत देवीची ही यात्रा प्रसिद्ध आहे. वर्षभर लोक या यात्रेची वाट पाहतात. मंदिराच्या समोर व आसपास मोकळे पटांगण आहे. त्यावर अनेक प्रकारची खाण्या-पिण्याची, घरगुती वस्तू, साहित्य, लहान मुलांसाठी खेळणी व खाऊची दुकाने लागलेली असतात. मोठाले रहाटपाळणे, टोराटोरा, जायंट व्हील, मौतका कुँअा, हास्यदरबार, तसेच चिनी मातीच्या कपबशा, डिश, स्टीलची भांडी, महिलांची सौंदर्यप्रसाधने, कपडे, पर्स, बांगड्या, बेल्ट, पाकीट, किचेन्स अशा नानाविध वस्तूंची दुकाने या ठिकाणी दर वर्षी लागतात. त्यामुळे या यात्रेत मोठी आर्थिक उलाढाल होते. यात्रेत देवळाली कॅम्प परिसरात रहाणारे मिलिटरीतील विविध जातिधर्मांचे अधिकारी, कर्मचारी, फौजी, जवान सहकुटुंब फिरताना दिसतात. त्यांच्यामुळेही यात्रेतील अर्थचक्राला बऱ्यापैकी गती मिळते.

--

त्वचाविकार बरे करणारी बारव!

मंदिराच्या समोरच ४०-५० फूट अंतरावर देवीची दगडी पायऱ्यांची बारव (विहीर) आहे. बरेच भाविक या बारवेत स्नान करूनच देवीच्या दर्शनाला जातात. या बारवेचे वैशिष्ट्य म्हणजे पाण्याचा जिवंत झरा येथे आहे. त्यामुळे मोटारीने पाणी उपसल्याबरोबर नवीन ताज्या पाण्याने बारव त्वरित भरते. पाणी बऱ्यापैकी स्वच्छ दिसते. बारवेतील या पाण्यात स्नान केल्यास त्वचारोग बरे होतात अशी श्रद्धा आहे. त्यामुळे धुळे, जळगाव, नंदुरबार, अहमदनगरपासून नागपूर, वर्धा, सातारा, कोल्हापूरसह पुणे, मुंबईपर्यंतचे भाविक येथे स्नानासाठी येतात. देवीपुढील दिव्यातील तेलही त्वचारोगावरील औषध म्हणून भाविक श्रद्धेने लावतात, असे सांगितले जाते. त्वचारोग, त्वचाविकार बरे व्हावेत यासाठी भाविक देवीला नवस करतात आणि ते बरे झाल्यावर येथे नवस फेडायला येतात. यावेळी चांदीचा पत्रा देवीला वाहण्याची प्रथा येथे आहे.

--

देवीची वैशिष्ट्ये...

भगूरच्या रेणुका देवीची मूर्ती पूर्णाकृती अष्टभुजाधारी आहे. पुराणानुसार भृगू ऋषींनी दारणा नदीकाठी रेणुकामाता मंदिराची स्थापना केली. त्यावेळी तिला तपोवनाची देवी म्हणत असत. देवीसमोर सिंह आणि कासव यांच्या प्रतिमा आहेत. मंदिरासमोर बारव आणि भुयारी मार्ग आहे.

--

१९४१ मध्ये जीर्णोद्धार

सन १९४१मध्ये कपडा व्यापारी धटिंगण यांच्या पूर्वजांनी मंदिराचा जीर्णोद्धार केला. लष्कराच्या हद्दीत हे मंदिर आहे. पूर्वीचे कौलारू मंदिर खूपच लहान होते. भाविकांच्या आर्थिक मदतीने मंदिर समितीने २००२ मध्ये मंदिराचे नूतनीकरण केले. २०१२ साली मंदिराचे कलशपूजन, वास्तूपूजन व शतचंडी महायाग करण्यात आला. मंदिरात देवीसमोर अखंड नंदादीप तेवत असतो. नंदादीपातील तेलाचा त्वचारोग बरे होण्यास उपयोग होतो, मंदिरासमोरील बारवेच्या पाण्याने स्नान केल्यास त्वचाविकार बरे होतात, अशी श्रद्धा आहे. देवीदास चिंगरे, दामोदर चिंगरे व चंद्रकांत चिंगरे हे देवीचे पुजारी आहेत.

--

श्री रेणुका (भगवती) देवी मंदिर ट्रस्ट

ट्रस्टी : पां. भा. करंजकर, प्रभाकर ओझरकर, देवीदास चिंगरे, जीर्णोद्धार समिती : श्रीनिवास लोया (अध्यक्ष), नंदकिशोर कासट (खजिनदार), रमेश शर्मा (सेक्रेटरी), नंदलाल लाहोटी (सहसेक्रेटरी), सदस्य : रामेश्वर मालाणी, मदनलाल झंवर, उत्तमराव कासार, किरण पाळदे, वासूशेठ श्रॉफ, बळवंत गोडसे, दिलीप संकलेचा, रमेश इंदाणी, दामोदर चिंगरे, चंद्रकांत चिंगरे. सहकार्य : आर्किटेकट दत्ता नाथे, प्रशांत नाथे, सुप्रिया नाथे, कायदेविषयक सल्लागार : अॅड. रमेश मालपाणी, अॅड. अशोक खुटाडे.

मोबाइल अॅप डाउनलोड करा आणि राहा अपडेट

‘बीएचआर’च्या ठेवीदारांना दिलासा

0
0

म. टा. खास प्रतिनिधी, नाशिक

महाराष्ट्रासह बहूराज्यात शाखा असलेल्या व २०१४ पासून गैरव्यवहारामुळे अडचणीत आलेल्या भाईचंद हिराचंद रायसोनी (बीएचआर) मल्टिस्टेट सहकारी पतसंस्थेच्या सुमारे १५० कोटींच्या ठेवीदारांना लवकरच दिलासा मिळणार आहे. राज्यातील व जळगाव जिल्ह्यातील मालमत्ता विक्रीसाठी केंद्रीय स्तरावर मुंबई शहर जिल्हाधिकारी कार्यालयातील उपजिल्हाधिकारी दर्जाचे अधिकारी यांना सक्षम अधिकारी म्हणून प्राधिकृत करण्याचे आदेश गृह खात्याचे उपसचिव यांच्यावतीने जारी करण्यात आल्याची माहिती ठेवेदार संघटनेचे विवेक ठाकरे यांनी दिली.

पुण्यातील घोले रोड शाखेत १६०० कोटींच्या बेनामी ठेवीच्या मुद्द्यावरून अडचणीत आलेल्या बीएचआर मल्टिस्टेट पतसंस्थेच्या १३ संचालकांवर राज्यभरातील विविध ५४ पोलिसांमध्ये एमपीआयडी कायदयातंर्गत गुन्हे दाखल असून सर्व १३ संशयीत आरोपी संचालक फेब्रुवारी २०१५ पासून पोल‌सि कोठडीत आहेत.

एमपीआयडी कायद्याप्रमाणे या मालमत्ताची अनुसूची जाहीर करणे व लिलावातून विक्री करण्याचे अधिकार त्या-त्या जिल्ह्याच्या प्राधिकृत अधिकाऱ्यांना होते मात्र एकापेक्षा जास्त गुन्हे असल्याने गुंतागुंत समोर आली होती. त्यामुळे केंद्रीय पद्धतीने एकच सक्षम अधिकारी प्राधिकृत करण्याचा आदेश निर्गमित करण्यात येऊन एमपीआयडी कायद्याच्या अंमलबजावणीसाठी यापुढे मुंबई शहर जिल्हाधिकारी त्यांच्या अधिनस्त उपजिल्हाधिकारी यांना कारवाईचे आदेश देण्यात आले आहे. त्यामुळे आता प्राधिकृत होणारे उपजिल्हाधिकारी हे पोलीस व सीआयडी मालमत्तांची लिलाव करून ठेवी परत करण्यात येणार आहेत.

मोबाइल अॅप डाउनलोड करा आणि राहा अपडेट


सोनेचोरीचा २४ तासांत छडा

0
0

म. टा. वृत्तसेवा, पिंपळगाव बसंवत

पिंपळगाव येथील सराफी दुकानातील चोरी गेलेल्या चार कोटी रुपयांच्या दागिन्यांचा ग्रामीण पोलिसांनी अवघ्या २४ तासांत छडा लावला. संशयितांकडून तीन कोटी रुपयांचे दागिने हस्तगत करण्यात आलेे. विशेष म्हणजे गोतेखोराने ३५ फुट पाण्यात उतरून सोने शोधले.

संजय देवराम वाघ (वय ३२, रा. परसूल, ता. चांदवड), गोपीनाथ दत्तु बरकरे (परसुल, ता. चांदवड) आणि एका अल्पवयीन संशयितास या गुन्ह्यात अटक करण्यात आली आहे. चोरीची घटना २१ सप्टेंबर रोजी पिंपळगाव बसवंत येथील अशोक चोपडा यांच्या मालकीच्या श्रीनिवास ज्वेलर्स येथे घडली होती. चोपडा यांचा मोठा वाडा असून, त्यातच दुकान आणि राहण्याची सोय करण्यात आली आहे. दरम्यान, संशयित संजय वाघ हा स्ट्राँग रूम उघडण्याचे व बंद करण्याचे काम करीत असे. मालकाचे आजारपण आणि त्यातून होणाऱ्या दुर्लक्षामुळे दुकानात नक्की किती सोने होते याचा मागमुसही चोपडा यांना नव्हता. चोपडा कुटुंबियाकडून होणाऱ्या दुर्लक्षामुळे वाघने बरकलेसह दुकानात साफसफाई करणाऱ्या अल्पवयीन मुलाला मदतीला घेत चोरीचा प्लॅन आखला. तिघांनी मिळून तब्बल १० किलो ४७५ग्रॅम वजनाचे आणि तीन कोटी १६ लाख, ५० हजार रुपयांचे दागिने चोरून नेले. विशेष म्हणजे संशयितांनी सीसीटीव्ही फुटेजचे डीव्हीआर सोबत घेतले त्यानंतर हा सर्व मुद्देमाल परसूल येथील गोपीनाथ बरकले यांच्या मदतीने एका विहीरीत तसेच विहीरीजवळ लपवला. घटनेचे गांर्भीय ओळखून पोलिस अधीक्षक संजय दराडे, अपर पोलिस अधीक्षक विशाल गायकवाड, सहायक पोलिस अधीक्षक अतुल झेंडे, स्थानिक गुन्हे शाखेचे पोलिस निरीक्षक अशोक कर्पे व पथकाने तपास सुरू केला. त्यात, चोरीच्या घटनेनंतर दुसऱ्या दिवशी कामावर आलेल्या अल्पवयीन मुलाने उडावाउडवीची उत्तरे दिली आणि गुन्हा उघडकीस आला. ३५ फुट पाणी असलेल्या विह‌रिीत टाकलेले दागिने गोतेखोराच्या मदतीने बाहेर काढण्यात आले. दोन कोटी २० लाख रुपयांचे आणि ७ किलो २१ ग्रॅम सोन्याचे दागिने हस्तगत करण्यात आले आहे.

कुलूप लावलेच नाही…

संजय अनेक दिवसांपासून श्रीनिवास ज्वेलर्समध्ये काम करत होता. गुरुवारी सांयकाळी दुकानाचे काम आटोपल्यानंतर शटर, दरवाजे कुलूप न लावता तसेच ठेवले तर लॉकरची चावी जमा न करता स्वःतकडे ठेवली. पूर्व नियोजनानूसार चोपडा परिवार झोपेत असतांना घरात प्रवेश करून सोने चोरून पोबार केला.

तपास पथकाने सर्व कौशल्य लावून गुन्ह्याचा छडा लावला. यामुळे तपास पथकाला १५ हजार रूपयांचे बक्षीस जाहीर करण्यात येत आहे. तपासात आणखी काही बाबी स्पष्ट होणार आहे.

- संजय दराडे, पोलिस अधीक्षक

मोबाइल अॅप डाउनलोड करा आणि राहा अपडेट

२७ लाखांचे स्पिरिट जप्त

0
0

म. टा. वृत्तसेवा, धुळे

राज्यात दारूबंदी असताना पश्चिम बंगालमधून आलेल्या टँकरमधून छोट्या मालवाहू गाडीत स्पिरिट काढले जात असताना राज्य उत्पादन शुल्क विभागाच्या गस्ती पथकाला मिळालेल्या गुप्त माहितीनुसार शनिवारी (दि. २३) कारवाई करण्यात आली. या कारवाईत एकूण २७ लाख रुपयांचा मुद्देमाल पथकाने हस्तगत केला असून, तीन जणांना ताब्यात घेण्यात आले आहे.

राज्य उत्पादन शुल्क विभागाने गेल्या अनेक महिन्यांपासून केलेल्या कारवाईपैकी ही मोठी कामगिरी असल्याचे सांगण्यात येत आहे. एकीकडे राज्यात दारूबंदी असताना दारूसह त्यासाठी लागणाऱ्या स्पिरिटची नेहमीच महाराष्ट्र व मध्यप्रदेश सीमारेषेवरील धुळे जिल्ह्यातील हाडाखेड चेक पोस्ट जवळून होते. दरम्यान, शनिवारी राज्य उत्पादन शुल्क विभागाचे पथकाची गस्त राष्ट्रीय महामार्ग क्रमांक सहावर होती. यादरम्यान त्यांना हाडाखेड परिसरातील हॉटेल जय माता दी जवळील मोकळ्या जागेत स्पिरिट उतरवत असल्याची माहिती मिळाली. त्यावेळी पथकाने तत्काळ त्याठिकाणी जावून छापा मारून टँकर क्रमांक (पीबी ०६ एके ८६२६) यामधून स्पिरिट महिन्द्रा मॅक्स मिनी (एमएच १८ डब्लू ६२१६) व्हॅनमध्ये उतरविण्यात येत होते. पथकाने यावेळी मुद्देमाल हस्तगत करीत टँकरचालक सरवनसिंग स्वर्णसिंग सखू (रा. चंबाखुर्दे, पंजाब) आणि विजय लालसिंग पावरा व त्याचा साथीदार (दोन्ही रा. सुळे ता. शिरपूर) या तिघांना ताब्यात घेतले. ही कारवाई राज्य उत्पादन शुल्क विभाग धुळे जिल्हा अधीक्षक मनोहर अंचुळे, निरीक्षक व्ही. बी. पवार, अनिल बिडकर, डी. एम. चकोर, शांतीलाल देवरे, के. एम. गोसावी, गिरीष पाटील, गोरख पाटील, प्रमोद भडागे, प्रशांत बोरसे, अमोल धनगर या पथकाने केली आहे.

वनरक्षकाचा मृत्यू

जळगाव : यावल तालुक्यातील सातपुडा पर्वतरांगांवरील लंगडा आंबा (ता. यावल) येथील वन्यजीव विभागाच्या फिरत्या गस्तीवर पथकातील वनरक्षक विनोद गणेश कांबळे (वय २८, मूळ रा. बिलोली, जि. नांदेड) यांचा शासकीय कर्तव्यावर असताना ट्रॅक्टर दरीत कोसळून झालेल्या अपघातात मृत्यू झाला. याबाबत राजू तडवी यांनी रावेर पोलिस ठाण्यात आकस्मिक मृत्यूची नोंद केली आहे.

तरुणाची गळफास घेऊन आत्महत्या

आयटीआय उत्तीर्ण झाल्यानंतरही नोकरी लागत नसल्याने शिक्षणासाठी वडिलांनी घेतलेल्या कर्जामुळे नैराश्यातून तालुक्यातील पळसोद येथील युवकाने शनिवारी (दि. २३) शेतात गळफास घेवून आपली जीवनयात्रा संपविली. ही घटना शनिवारी घडली. दिगंबर भगवान पाटील (वय २१) असे मृत तरुणाचे नाव आहे. दिगंबर शनिवारी, आजीसोबत शेतात कापूस वेचण्याचे काम करत होता. आयटीआयच्या त्याच्या शिक्षणासाठी त्याचे वडील भगवान पाटील यांनी खासगी कर्ज घेतले होते. ते अद्याप फिटलेले नव्हते. दुसरीकडे आयटीआय उत्तीर्ण होवूनही त्याला रोजगाराची संधी मिळाली नव्हती. त्यातच आपल्या शिक्षणासाठी वडिलांनी घेतलेले कर्ज फिटत नसल्याच्या वैफल्याने तो मानसिकरित्या हतबल झाला होता.

मोबाइल अॅप डाउनलोड करा आणि राहा अपडेट

आजची कविता रटाळ, निरस अन् कोरडी

0
0

म. टा. खास प्रतिनिधी, नाशिक

आजची कविता रटाळ, कोरडी व निरस वाटते. निर्मिती करता येते, त्यांनीच कविता करावी. आजची कविता ही मुक्तछंदाची असते. त्याला माझा विरोध नाही. पण त्यात प्रतिमा, लय, ताल, यमक दिसत नाही. ज्याला चांगली कविता लिहता येते, तोच मुक्तछंदातही कविता लिहू शकतो असे सांगत ज्येष्ठ कवी विठ्ठल वाघ यांनी नवकवींचे कान टोचले.

‘कविता काल आज उद्या’ या विषयावरील परिसंवादात नियोजित अध्यक्ष वसंत डहाके आजारी असल्यामुळे विठ्ठल वाघ यांनी ऐनवेळी कमान सांभाळत एकतर्फी कवितेचे ऑपरेशन केले. त्यामुळे या विषयावरील परिसंवाद झालाच नाही. कवितेवर मार्मिक भाष्य करताना विठ्ठल वाघ यांनी संतांच्या कवितेपासून आजच्या कवितेचा प्रवास उलगडत रसिकांना मंत्रमुग्ध केले. जो कविता लिहतो त्यालाच कविता कळत नाही. वाड्मयमध्ये लेखन प्रकार आहे. पण, कविता यात वेगळी ठरते. विशेष गोष्ट असल्याशिवाय कविता होऊच शकत नाही. कविता हा नाटकाचा उतारा किंवा प्रवासवर्णन नाही असे सांगत त्यांनी कविता कशी रटाळ असते यासाठी काही नवकवीच्या कविताही सादर केल्या.

आमटेंची आठवण

कवितेत स्थानिक प्रतिमा येत असतात. पण, एकदा मी प्रकाश आमटेंकडे गेलो व तेथे मुलांसमोर प्राध्यापकी थाटात कष्टाचे महत्त्व सांगतांना बहिणाबाईंच्या कविता सांगितल्या. त्यात भाकर, जातं असे वर्णन येत होते. पण, येथील लहान मुले मख्ख बसले त्यांनी मला दादही दिली नाही. त्यामुळे प्रकाशला विचारले, की यांना कळाले नाही का? त्यावर आमटे बोलले त्यांना भाकरच माहित नाही. त्यांच्याकडे मातीच्या भांड्यावर स्वयंपाक करतात व त्यात तांदूळच असतो.

मोबाइल अॅप डाउनलोड करा आणि राहा अपडेट

सावाना ग्रंथदिंडीने झाले वातावरण मंगलमय

0
0

म. टा. खास प्रतिनिधी, नाशिक

लेझिम झांजांचा आवाज, बोल बजरंग बली की जयचा जयघोष, उंच दिमाखात फडकणारे ध्वज आणि वेगवेगळ्या चित्ररथातून देण्यात आलेले विविध संदेश असा उत्साही माहोल जमून आला होता सावाना ग्रंथदिंडीत.

सार्वजनिक वाचनालयाच्या वतीने आयोजित सुवर्णमहोत्सवी जिल्हा साहित्यिक मेळाव्यानिमित्ताने कुसुमाग्रजांच्या निवासस्थानापूसन सावानाच्या बालभवनातर्फे भव्य ग्रंथदिंडी काढण्यात आली. आमदार देवयानी फरांदे यांच्या हस्ते या ग्रंथदिंडीचा प्रारंभ झाला. या ग्रंथदिंडीतील पालखीत धर्मसिंधू, तुकाराम महाराजांची गाथा, नामदेव महाराजांची गाथा, ज्ञानेश्वरी, कुसुमाग्रजांचे विशाखा, विंदा करंदीकरांचे कवितासंग्रह ठेवण्यात आले होते. पेठे हायस्कूल, माध्यमिक विद्यालय, उंटवाडी, मराठा हायस्कूल, ज्योती विद्यालय, छत्रपती हायस्कूल, न्यू मराठा हायस्कूल, बिटको बॉईज हायस्कूल, व्ही. एन. नाईक संस्था या शाळांमधील चित्ररथ, लेझिम पथक, ढोलपथक, ध्वजपथक, कीर्तनकार, समूहगान, बेटी बचाव, पाणी बचाव याबाबत संदेश देणाऱ्या फलकांचा दिंडीत समावेश होता. कुसुमाग्रज निवासस्थान ते टिळकवाडी, सीबीएस, शिवाजी रोड, शालीमारमार्गे, धुमाळ पॉईंट, महात्मा गांधी रोड सिग्नलमार्गे सार्वजनिक वाचनालय येथे ग्रंथदिंडीचा समारोप झाला. नाशिक शहरातील विविध मान्यवर व साहित्यिक या ग्रंथदिंडीमध्ये सहभागी झाले होते. दिंडीमध्ये सावाना जिल्हा मेळाव्याचे अध्यक्ष दत्ता पाटील, ज्येष्ठ कवी विठ्ठल वाघ यांचा समावेश होता.

मोबाइल अॅप डाउनलोड करा आणि राहा अपडेट

निसर्गवेड्यांचा कळसूबाई शिखरावर देवीचा जागर

0
0

विजय बारगजे, घोटी

इगतपुरी तालुक्यातील घोटीतील कळसूबाई मित्रमंडळाच्या सदस्यांनी गेल्या २१ वर्षांपासून नवरात्रोत्सवात कळसूबाईच्या शिखरावर अखंडितपणे जाण्याचा शिरस्ता यंदाही कायम ठेवला. नवरात्रोत्सवाबरोबरच इतर प्रासंगिक कारणांमुळेही २१ वर्षांत आजपर्यंत २५१ वेळा कळसूबाईच्या शिखरावर जाण्याचा विक्रम भगीरथ मराडे यांच्या नेतृत्वाखाली या तरुणांनी केला आहे.

महाराष्ट्रातलाच नव्हे, तर देशातील हा पहिलाच विक्रम ठरावा असे म्हटले, तर वावगे ठरणार नाही. शरीराची साथ, देवीचा आशीर्वाद व सकारात्मक साथ हा त्रिवेणी संगम कायम राहिला तर हा शिरस्ता पुढेही कायम राहील, असा निर्धार या तरुणांनी व्यक्त केला आहे.

--

१९९७मध्ये झाला श्रीगणेशा

गडकिल्ल्यांच्या संवर्धनाचा वसा घेऊन गेली २१ वर्षे या कार्यात झोकून देणाऱ्या तरुणांच्या आगळ्यावेगळ्या छंदाची ख्याती राज्यभर पसरली आहे. पर्यावरण, आरोग्य, स्वच्छता, वृक्षारोपणासह एकात्मतेचा संदेश देणारे हे तरुण तालुकाभर कौतुकास्पद कामगिरी करीत आहेत. १९९७ मध्ये घोटी (ता. इगतपुरी) येथील गडकिल्ल्यांची स्वतः चढाई करून सफरीचा आनंद घेणारे ध्येयवेडे युवक भागीरथ मराडे आणि अन्य दोघे युवक सतत सर्वांत उंच असणाऱ्या कळसूबाई शिखरावर जायचे. चढाई करताना ते डोंगरावर असणारी अस्वच्छता दूर करीत उपयुक्त झाडांची लागवड करायचे. यासह त्या-त्या ठिकाणी काहींनी केलेले विद्रुपीकरण दूर करीत शक्य तेवढे निर्मळ करायचे. मराडे यांचा आदर्श घेत ३५ युवक या कार्यात सहभाग घ्यायला लागले. त्याच वर्षी या ध्येयवेड्या युवकांनी कळसूबाई मित्रमंडळाची स्थापना केली. घोटी या बाजारपेठेत दर सोमवारी सुटी घेतली जाते. सुटीचा फायदा घेऊन या मंडळाचे सर्व युवक दर सोमवारी कुठल्या तरी गडकिल्ल्यावर चढाई करतात. स्वखर्चाने करीत असलेल्या या उपक्रमातून ते वृक्षारोपण करून त्यांचे जतनही करीत आहेत. गड-किल्ले आणि डोंगरावर वाढलेले घाणीचे साम्राज्य, पाण्याच्या रिकाम्या बाटल्या, प्लास्टिकचा कचरा स्वयंप्रेरणेने दूर करीत स्वच्छतेचा संदेश ते देत आहेत.

--

सूर्योदयापूर्वीच मंदिरात सेवा

गेल्या अठरा वर्षांपासून दर वर्षी नवरात्रीमध्ये हे युवक रोजच कळसूबाई शिखरावर निसर्गाची तमा न बाळगता चढाई करीत आहेत. कुठल्याही गड-किल्ल्यावर चढण्याची सुरुवात करण्याअगोदर विधिपूर्वक पूजन करण्यात येते. विशेष उल्लेखनीय बाब म्हणजे सर्वांत उंच असणाऱ्या कळसूबाई शिखरावर एकदा कोणी गेला तर आजारी पडल्याशिवाय राहत नाही अन् हे युवक नवरात्रीत सलग नऊ दिवस चढाई करून आपला उपक्रम मोठ्या उत्साहात पार पाडतात. त्यामुळे त्यांचा हा उपक्रम सर्वदूर कौतुकाचा विषय ठरला आहे. तालुक्यातील अनेक युवक-युवती यात सहभागी होत असतात. नवरात्रोत्सव काळात सुरू केलेली पर्यावरणरक्षणाची परंपरा या युवकांनी आजही जपली असून, हे युवक नित्यनियमाने यावर्षीही कळसूबाई शिखरावर जाऊन मंदिर व शिखर परिसराची स्वच्छता करून पर्यावरणाचा होणारा ऱ्हास रोखण्याची धडपड करीत अाहेत. हे ध्येयवेडे युवक आपला संकल्प पूर्ण करण्यासाठी नवरात्रीतील नऊ दिवस उपवास करून भल्या पहाटेच १६४६ मीटर उंचीच्या अंतराचे हे शिखर मोठ्या उत्साहाने पादाक्रांत करतात. सूर्योदय होण्यापूर्वी मंदिराजवळ पोहोचून सूर्याची पहिली किरणे मंदिरावर पडताच कळसूबाई मातेची आरती घेऊन मातेच्या चरणी नतमस्तक होत पुन्हा त्याच उत्साहाने खाली उतरतात. हा क्रम नऊ दिवस तितक्याच उत्साहाने होतो. यंदादेखील गुरुवारी (दि. २१) सकाळी शिखरावर घटस्थापना करून पहिल्या माळेला सुरुवात केली.

--

या ध्येयवेड्यांचा सहभाग

या उपक्रमात घोटी कळसूबाई मित्रमंडळाचे अध्यक्ष भगीरथ मराडे, सोमनाथ भगत, अशोक हेमके, बाळू आरोटे, प्रशांत जाधव, गजानन चव्हाण, नीलेश आंबेकर, बालाजी तुंबारे, प्रवीण भटाटे, शिवा जाधव, देवीदास पाखरे, किसन दराने, उमेश रावळ, पंढरीनाथ दुर्गुडे, ज्ञानेश्वर मांडे, संतोष म्हसणे, रमेश हेमके, नितीन भागवत, सोनू गिते, श्रवण सोपे, गोरख लगडे, जालिंदर घाणे, निवृत्ती खाडे, कैलास धिंडळे, चेतन छत्रे, शिवदास जोशी, भगवान तोकडे, किसन दराने आदींचा नित्यनेमाने सहभाग राहतो. पाच वर्षांपासून हे युवक नववर्षाच्या पहिल्या दिवशी १ जानेवारीला आणि गुढीपाडव्याच्या दिवशीही या शिखरावर जातात.

--

राज्यातील सर्वांत उंच शिखर असलेल्या कळसूबाई मातेच्या भक्तीच्या ओढीमुळे नवरात्रात शिखर सर करण्याचा पायंडा आम्ही पाडला आहे. या उपक्रमात मंदिर परिसर व शिखराचे पावित्र्य राखण्याच्या उद्देशाने सुरू केलेल्या स्वच्छता मोहिमेस यावर्षीही युवकांनी उत्स्फूर्त प्रतिसाद दिला असून, यापुढेही हा उपक्रम सुरू राहील.

-भगीरथ मराडे, अध्यक्ष, कळसूबाई मित्रमंडळ

मोबाइल अॅप डाउनलोड करा आणि राहा अपडेट

Viewing all 49119 articles
Browse latest View live




Latest Images