म. टा. प्रतिनिधी, नाशिक
महात्मा गांधी व लाल बहादूर शास्त्री यांची जयंती शहर परिसरात उत्साहात साजरी करण्यात आली. त्यांचे विचार विद्यार्थ्यांपर्यंत, समाजापर्यंत पोहोचवण्याचे कार्य यावेळी शहरातील शाळांमध्ये, सामाजिक संस्था, विद्यापीठे येथे केले गेले.
आरोग्य विज्ञान विद्यापीठ
महाराष्ट्र आरोग्य विज्ञान विद्यापीठात महात्मा गांधी व लाल बहादूर शास्त्री जयंती उत्साहात साजरी करण्यात आली. विद्यापीठाचे प्रतिकुलगुरू डॉ. मोहन खामगावकर यांनी महात्मा गांधी व लालबहादूर शास्त्री यांच्या प्रतिमांचे पूजन करुन सर्वांना शुभेच्छा दिल्या. याप्रसंगी संदीप कुलकर्णी, प्रकाश पाटील, डॉ. पायल बन्सल, रत्नाकर काळे, रंजिता देशमुख आदी उपस्थित होते. जनसंपर्क अधिकारी डॉ. स्वप्नील तोरणे यांनी कार्यक्रमाचे समन्वयन केले.
स्मॉल बर्डस शाळा
मखमलाबाद-म्हसरूळ लिंक रोडवरील स्मॉल बर्डस शाळेत गांधी जयंती साजरी करण्यात आली. शाळेच्या संचालिका अश्विनी ओसवाल यांनी गांधीजींच्या कार्याबद्दल विद्यार्थ्यांना माहिती दिली. गांधी जयंतीनिमित्त फेरीचे आयोजन करण्यात आले होते. विद्यार्थ्यांनी देशभक्तीपर घोषणा दिल्या. यावेळी शाळेतील शिक्षिका चारुशिला साळवे, पूजा म्हैसकर, मनीषा गावित, सोनाली येसनकार आदी उपस्थित होते.
मराठा हायस्कूल
मराठा विद्या प्रसारक समाज संस्थेच्या मराठा हायस्कूलमध्ये महात्मा गांधी व लाल बहादूर शास्त्री यांची जयंती साजरी करण्यात आली. कार्यक्रमाच्या अध्यक्षस्थानी विद्यालयाचे मुख्याध्यापक अरुण पिंगळे होते. व्यासपीठावर उपमुख्याध्यापक सोपान येवले, पर्यवेक्षक अरुण पवार उपस्थित होते. कार्यक्रमाची सुरुवात प्रतिमा पूजनाने करण्यात आली. महात्मा गांधी व लाल बहादूर शास्त्री यांच्या प्रतिमेचे पूजन व्यासपीठावरील मान्यवरांच्या हस्ते करण्यात आले. त्यानंतर सुनिल बस्ते यांनी महात्मा गांधी व लाल बहादूर शास्त्री यांच्या कार्याचा परिचय करून दिला. अध्यक्षीय भाषणात मुख्याध्यापक पिंगळे यांनी महात्मा गांधी व लाल बहादूर शास्त्री यांच्याविषयी विचार व्यक्त केले. कार्यक्रमाचे सूत्रसंचालन विजय म्हस्के यांनी केले तर आभार प्रदर्शन पर्यवेक्षक अरुण पवार यांनी केले. कार्यक्रमास सर्व शिक्षक वृंद, शिक्षकेतर कर्मचारी व विद्यार्थी मोठ्या संख्येने उपस्थित होते.
पंचवटी सार्वजनिक वाचनालय
अॅड. उत्तमराव नथुजी ढिकले, पंचवटी सार्वजनिक वाचनालयात महात्मा गांधी व भारताचे माजी पंतप्रदान लालबहादूर शास्त्री जयंती कार्यक्रमाचे आयोजन करण्यात आले होते. वाचनालयाचे कोषाध्यक्ष डॉ. शांताराम रायते यांच्या अध्यक्षतेखाली व माधवराव भणगे यांच्या प्रमुख उपस्थितीत हा कार्यक्रम पार पडला. शास्त्री व गांधी यांच्या जीवनातील ठळक प्रसंगांना उजाळा देऊन दोघांच्याही स्मृतींना उजाळा देण्यात आला. कार्यक्रमाचे सूत्रसंचालन हिरालाल परदेशी यांनी केले. तर आभार नगरसेवक उल्हास धनवटे यांनी मानले. यावेळी वाचनालयाचे कार्यवाह ग्रंथमित्र नथुजी देवरे, सुभाष पाटील, ग्रंथपाल योगिता भामरे, सोमनाथ बोबडे आदी उपस्थित होते.
जैन जॉगर्स ग्रुप
गांधी जयंती आणि लालबहादूर शास्त्री जयंतीनिमित्त ‘स्वच्छता हीच सेवा’ हा संकल्प पूर्ण करण्यासाठी जैन जॉगर्स ग्रुपकडून गोल्फ क्लब ग्राऊंडवर दोन कचरापेट्या बसविण्यात आल्या. तसेच जैन जॉगर्स ग्रुपचे अध्यक्ष अरुण कोठारी आणि त्यांच्या सहकाऱ्यांनी मैदानावर साफसफाई केली. यावेळी नाशिक मनपा स्थायी समिती अध्यक्ष शिवाजी गांगुर्डे, नगरसेवक जायभावे यांची यावेळी उपस्थिती होती.
चित्रकलेतून सत्य-अहिंसेचा संदेश
मानवधन सामाजिक व शैक्षणिक विकास संस्था पाथर्डी फाटा येथे चित्रकला स्पर्धेच्या माध्यमातून राष्ट्रपिता महात्मा गांधी यांना जयंतीनिमित्त अभिवादन करण्यात आले. ‘व्हिजन २०२०’ कार्यपूर्तीसाठी संस्थेतर्फे भव्य चित्रकला स्पर्धेचे आयोजन करण्यात येते. गांधीजींच्या मूल्यांची जोपासना करणे आदर्श नागरिक व आदर्श भारत निर्मितीसाठी या मूल्याचे बीजारोपण जनमानसात रुजवण्यासाठी कलेच्या माध्यम असावे, या हेतूने ही स्पर्धा संस्थेत आयोजित करण्यात आली होती. विद्यार्थ्यांनी विविध सामाजिक विषयांचे चित्र यावेळी रेखाटले. स्पर्धेचे परीक्षक म्हणून मनीष देवघरे, योगेश आघाडे यांनी केले. यावेळी संस्थेचे संस्थापक प्रकाश कोल्हे, सचिव ज्योती कोल्हे, सॅमसोनाईट कंपनीचे डायरेक्टर मिलिंद वैद्य, भारतीय शिक्षण परिषद सचिव अश्विनीकुमार भारतद्वाज, लीड इंडिया सेक्रेटरी मनीष मंजुळ आदी उपस्थित होते. या स्पर्धेत जिल्हाभरातील विविध शाळांमधील सुमारे दोन हजारांहून अधिक विद्यार्थ्यांनी सहभाग घेतला होता. यामध्ये चिराग पवार, अनुष्का निकाळजे, लक्ष्मी रमेश प्रसाद, विक्रांत बागूल, दुर्वा गोकुळ राव, हर्षाली शेवाळे, भूषण गायकवाड, पूनम गुंजाळ व मानसी भांडारकर, शिवानी श्रीवास्तव या विद्यार्थ्यांनी यश मिळवले.
मोबाइल अॅप डाउनलोड करा आणि राहा अपडेट