दुधाची वाढती आवक आणि मागणी कमी असल्याचे सांगत सहकारी दूध संघांनी दुधाच्या दरात प्रतिलिटर एक रुपया कपात केली आहे. यामुळे जोडधंदा म्हणून हा व्यवसाय करणारे शेतकरी संतापले आहेत.
येवला कृषी उत्पन्न बाजार समितीचे संचालक मकरंद सोनवणे यांनी दुधास ठरवून दिलेला २७ रुपये हाच दर उत्पादकांना देण्यात यावा, अशी मागणी केली आहे. सोनवणे यांनी दुग्धविकास व पशुसंवर्धन मंत्री महादेव जानकर यांना याबाबत निवेदन पाठवले आहे. राज्य शासनाने २१ जूनपासून दुधाची फॅट ३.५ व एसएनएफ ८.५ असलेल्या दुग्ध उत्पादकांच्या दुधास प्रतिलिटर २४ रुपयांवरून २७ रुपये दर देण्याचा निर्णय घेतला होता. मात्र, सध्यस्थितीत दुधाची वाढती आवक आणि मागणी कमी असल्याचे कारण देत सहकारी दूध संघांनी १६ सप्टेंबरपासून दरात एक रुपयांची कपात केल्याने दुग्ध उत्पादकांना प्रतिलिटर २६ रुपये मिळत आहेत. सहकारी दूध संघांनी एक रुपयाने दरात कपात केल्याने दुग्धउत्पादक अडचणीत आलेला असतानाच, खाजगी व प्रमुख ब्रँड असलेल्या दुध व्यावसायिकांनी तर दुधाचा दर प्रतिलिटर २३ देण्याचे ठरविले असल्याची देखील बोलले जात आहे.
बेरोजगारी वाढण्याची भीती
गेल्या काही वर्षात शेतकऱ्यांची तरुण मुले या दुग्ध व्यवसायात मोठ्या प्रमाणात उतरली आहेत. शेतीला जोड धंदा म्हणून ग्रामीण भागात हा व्यवसाय पाय रोवत आहे. अशातच दुधाचे दर कमी होताना या व्यवसायात मंदी आली तर बेरोजगारी वाढणार आहे, असे मकरंद सोनवणे यांनी निवेदनात म्हटले आहे.
मोबाइल अॅप डाउनलोड करा आणि राहा अपडेट
