फेसबुकवरून मैत्री करीत कॅन्सरविरोधी तसेच इतर आजारांवर उपयुक्त असलेल्या औषधी बियांची ऑनलाइन विक्री करणाऱ्या नायजेरियन तरुणाच्या सायबर पोलिसांनी मुसक्या आवळल्या आहेत. या भामट्याने लाखो रुपये उकळले असून, यामुळे अनेक गुन्हे उघडकीस येण्याची शक्यता आहे.
निल्स हॅम्पे (३०, नवी मुंबई, मुळ देश नायजेरिया) असे संशयित आरोपीचे नाव आहे. सायबर पोलिसांनी सापळा रचून नवी मुंबई येथे हॅम्पेला जेरबंद केले. सायबर पोलिस स्टेशनमध्ये २२ जुलै रोजी फसवणुकीचा गुन्हा दाखल झाला होता. यात संशयित आरोपीने औषधी बिया पुरवण्याचे आश्वासन देत तीन लाख रुपयांची फसवणूक केली होती. या गुन्ह्याचा तपास करीत पोलिसांनी निल्स हॅम्पेला जेरबंद केले. पोलिसांनी दिलेल्या माहितीनुसार संशयिताची एक तरुण मैत्रिणीने तक्रारदाराशी फेसबुकवरून ओळख वाढवून अडचणीत असल्याचे भासवले. आमची कंपनी वेबसाइटवरून ५ लाख पौंडाला औषधे खरेदी करते. परंतु, भारतातून यापूर्वी पुरवठा करणाऱ्यांनी तो अचानक बंद केला आहे. यामुळे आपलीही नोकरी धोक्यात आहे. जर त्या औषधी बिया तुम्ही भारतातून आम्हाला पुरवल्या तर आपली नोकरी वाचेल. तसेच, तुम्हालाही चांगला फायदा होईल. या बिया भारतात अवघ्या ५० हजार ते १ लाख रुपयांत मिळतात. तर यासाठी आमची कंपनी ५ लाख रुपये मोजते. अशी माहिती देऊन ही औषधे खरेदी करून आमच्या कंपनीस पुरवण्याची गळ घातली होती. फिर्यादीने एक किलो औषधी बियांची मागणी केली होती. नवी मुंबई येथे ही औषधे घेण्यासाठी गेल्यानंतर त्यांनी पैसे देऊन औषधी बिया विकत घेतल्या. मात्र, औषधांच्या नावाखाली त्या केवळ करंज झाडाच्या बिया फिर्यादीस सोपवण्यात आल्या. गुन्हा दाखल होताच पोलिसांनी तपास करून मुंबई येथून एका नायजेरीयन संशयितास ताब्यात घेतले. सायबर पोलिस स्टेशनचे पोलिस निरीक्षक देवराज बोरसे, जयश्री मूर्ती, किरण जाधव, मंगेश काकुळते, शेखर बडगुजर आदींनी ही कामगिरी केली.
मोबाइल अॅप डाउनलोड करा आणि राहा अपडेट
