शहरातील पवारवाडी भागातील एका शाळकरी मुलाला भूतबाधा झाल्याचे सांगून तंत्रमंत्र करीत अमानुष मारहाण केल्याचे प्रकरण उघडकीस आले आहे. या प्रकरणी पवारवाडी पोलिसांनी शनिवारी दुपारी रफिकबाबा उर्फ सांडू नामक बाबाला ताब्यात घेतले. अंधश्रद्धेतून गुप्तधन काढण्यासाठीच आपल्या मुलाचा बळी देण्यासाठी संबंधितांनी अघोरी पूजा चालविल्याचा संशय पीडित मुलाच्या वडिलांनी पत्रकारांशी बोलताना व्यक्त केला. दरम्यान, या प्रकरणी रात्री उशिरापर्यंत गुन्हा दाखल करण्याची कार्यवाही सुरू होती.
काही दिवसांपासून हा प्रकार सुरू होता. मात्र, मुलाचे जायखेडा येथील मामाला याबाबत माहिती मिळताच त्यांनी शनिवारी मालेगाव येथे धाव घेतली. त्या वेळी हा प्रकार उघडकीस आला. याबाबत मुलाचे वडील शेख ऐनुद्दीन यांनी दिलेल्या माहितीनुसार, त्यांचा मुलगा अजहरुद्दीन ऐनुद्दीन शेख (वय १८) गेल्या दोन वर्षांपासून त्याचे मामा मसूद लियाकत पठाण यांच्याकडे जायखेडा येथे कामकाजानिमित्त राहत होता. मोहरमनिमित्त तो २८ सप्टेंबर रोजी मालेगावकडे निघाला. मात्र, थेट घरी न जाता तो काका शहाबुद्दीन शेख ऊर्फ अलाउन्सर यांच्याकडे आला. त्या वेळी तेथे असलेल्या रफिकबाबाने त्याच्यावर भूतबाधा झाली असल्याची बतावणी करत उपचारासाठी म्हाळदे शिवारातील हाज्जीन सुलेमानी मशीनजवळील आपल्या पत्र्याच्या घरात नेले. ही माहिती शहाबुद्दीनने ऐनुद्दीन यांना दिली. ऐनुद्दीन मुलाला पाहण्यासाठी दोन-तीन दिवसांनंतर गेले असता, बेशुद्धावस्थेतील मुलाला अमानुषपणे बांधून ठेवल्याचे निदर्शनास आले. मुलाला मारहाण झाल्याचे स्पष्ट दिसल्याने त्यांनी मुलाला तातडीने सटाणा रोडवरील द्वारकामणी दवाखान्यात दाखल केले. या घटनेविषयी मुलाच्या मामाला माहिती मिळाल्यानंतर त्यांनी मालेगाव गाठत पाहणी केली. भयभीत अवस्थेतील अजहरुद्दीनने शुद्धीवर आल्यानंतर आपल्यावर झालेल्या अत्याचाराची पुसटशी कल्पना दिली. विचित्र वास असलेले औषध पाजून मारहाण करण्यात आल्याने त्यानी सांगितले. तत्काळ पालकांनी पवारवाडी पोलिस ठाणे गाठत तक्रार दिली. त्याप्रमाणे सहाय्यक पोलिस निरीक्षक युवराज चव्हाण यांच्या पथकाने रफिकबाबाच्या घरात छापा टाकून त्याला पत्नीसह ताब्यात घेतले. घरातील संशयास्पद साहित्यदेखील जप्त करण्यात आले. दुपारी दोन वाजेच्या सुमारास ही कारवाई पूर्ण झाल्यानंतरही रात्री साडेसात वाजेपर्यंत गुन्हा दाखल करण्याची कार्यवाही झालेली नव्हती.
मोबाइल अॅप डाउनलोड करा आणि राहा अपडेट