Maharashtra Times

नांदुरी बसस्टँड

म. टा. वृत्तसेवा, कळवण
कळवण तालुक्यातील नांदुरी हे गाव श्री सप्तशृंग देवस्थानच्या पायथ्याशी वसलेले आहे. गडावर जाताना अथवा सापुतारा या गुजरात सीमेवरील पर्यटनस्थळी जाताना अनेक पर्यटक व भाविक नांदुरीला उतरतातच. त्यानंतर गडाकडे जाण्यासाठी सुरुवात होते. या गावातील बस स्टँड शोभेचे बाहुले आहे, तर येथील स्वछतागृह निर्जन ठिकाणी बांधण्यात आले आहे. आजुबाजूला वाढलेले गवत व बिकट बनलेली वाट पुरुषांना अडचणीची ठरते, तेव्हा महिलावर्गाचे विचारणेच अवघड. नांदुरी बस स्टँड कळवण परिवहन आगाराच्या हद्दीत आहे. ना बस स्टँड थांबा किंवा विसावा म्हणून सोयीचे आहे, ना स्वच्छता गृह.
कुठल्याही प्रवाशांसाठी ही जागा उपयुक्त नाही. महिलांचे व विशेषतः बालकांचे हाल मोठ्या प्रमाणात होत असतात. बसस्थानकाच्या भविष्यातील प्रगतीच्या दृष्टीने येथील स्वछतागृह बाजूला बांधण्यात आल्याचे सांगितले जाते. मात्र, ते इतक्या बाजूला व न‌र्जिन ठिकाणी आहे, की तिथे कुठल्याही प्रकारची सुरक्षितता नाही. पाण्याचे दुर्भिक्ष्य आहे. जवळ असलेल्या टाकीची अवस्था बिकट आहे. या टाकीत घाणीचे प्रमाण जास्त व पाणी कमी आहे. बसस्थानकात शौचालयाची, पाण्याची, विजेची कुठलीच सोय उपलब्ध नाही.

सप्तशृंग गडाच्या पायथ्याशी असलेल्या नांदुरी गावाची प्रगती अपेक्षित झाली नाही. नावाला असलेल्या स्वछतागृहांची अवस्था बिकट आहे.महिला सबलीकरण कसे होणार?
- पूनम आहिरे, नांदुरी

बसस्थानकाच्या अवस्थेमुळे गावाची बदनामी होते. महिलांना न्याय मिळावा म्हणून या ठिकाणी सुधारणा होणे गरजेचे आहे. ग्रामपंचायतमार्फत याबाबत पाठपुरावा करू.
- जिजाबाई गावित, सरपंच, नांदुरी

Latest Images