दिवाळी खरेदीचा आनंद नागरिकांना लुटता यावा यासाठी पावसानेही रविवारी सुटी घेतली. सगळे नाशिक शहरच जणू खरेदीसाठी रस्त्यांवर उतरले अन् त्यामुळे बाजारपेठेलाही बूस्ट मिळाला.
दिवाळी सण मोठा नाही आनंदाला तोटा असे म्हटले जाते. हा आनंद द्विगुणीत करायचा तर नवनवीन कपडे, फटाके, मिठाई यांची खरेदी हवीच. त्यासाठी नाशिककरांनी जणू रविवारची सुटी राखूनच ठेवली होती. धाकधुक होती ती पावसाची. परंतु पाऊसही आज नाशिककरांवर मेहेरबान झाला. दिवाळीच्या उत्साहात आपले विघ्न नको म्हणून त्यानेही रविवारी फुल डे सुटी घेतली. सकाळपासूनच आकाश निरभ्र राहिल्याने नाशिककरांना खरेदीचे वेध लागले. खरेदीच्या माध्यमातून आनंदाची लयलूट करण्यासाठी अबालवृध्दांची पाऊले घरांबाहेर पडली. शहराच्या उपनगरांमधील बाजारपेठा असोत किंवा मध्यवर्ती भागातील मुख्य बाजारपेठा सर्वत्र उत्साहाला भरते आले. सोमवारी वसुबारस असून दिवाळीचा हा पहिला दिवस. दिवाळी उद्यावर येऊनही बहुतांश नागरिक सणासाठी आवश्यक खरेदी करू शकले नाहीत. रविवारी खरेदीएवढेच महत्वाचे काम शिल्लक ठेवणारे शहरवासी कुटुंबासह बाजारपेठांमध्ये दाखल झाले. त्यामुळे रविवार कारंजा, मेनरोड, एमजी रोड, शालिमार, कॉलेजरोड, गंगापूर रोड, शरणपूर रोड, तिबेटियन मार्केट यांसारख्या बाजारपेठा गर्दीने ओसंडल्या. विशेषत: कपड्यांच्या दुकानांमध्ये अधिक गर्दी असल्याचे पहावयास मिळाले. लहानगे, तरुणाई, महिला खरेदीसाठी अधिक उत्सुक असल्याचे दिसून आले. वसुबारसला संध्याकाळी गाईची पाडसासह पूजा केली जाते. ह्या दिवसापासूनच अंगणात रांगोळी काढण्यास सुरुवात होते. त्यामुळे अंगणाची शोभा वाढविणाऱ्या विविधरंगी रांगोळ्यांपासून डोळ्यांचे पारणे फेडणाऱ्या आकाशकंदीलांपर्यंत आवश्यक त्या सर्वच वस्तुंची खरेदी करण्यास पसंती देण्यात आली. शिरई, पणत्या, लाह्या बत्तासे, लक्ष्मी पूजनाचे साहित्य अशा छोट्या-मोठ्या वस्तूंसह इमिटेशन ज्वेलरी, पर्सेस, पादत्राणे यांसारख्या अनेक वस्तू खरेदीकडे नागरिकांचा कल असल्याचे पहावयास मिळाले. फराळाचे सर्वच तयार पदार्थ बाजारपेठेत मिळत असले तरी त्यापैकी काही निवडक पदार्थच खरेदी करण्यास नागरिकांकडून पसंती दिली जात आहे.
ऑनलाइन शॉपिंग तेजीत
बाजारपेठांमध्ये जाऊन हव्या त्या वस्तू खरेदीकडे नागरिकांचा कल असला तरी ऑनलाइन मार्केटलाही भरभरून प्रतिसाद मिळू लागला आहे. विविध ऑनलाइन शॉपिंग कंपन्यांनी अनेक ऑफर्स उपलब्ध करून दिल्या आहेत. त्यामुळे ऑनलाइन बुकिंग करून थेट घरपोच वस्तू मागविण्यावरही तरुणाईने भर दिला आहे. मोबाइल व तत्सम गॅझेट्स, इलेक्ट्रॉनिक्स वस्तू, कुकिंग वेअर्स यांसारख्या वस्तूंना विशेष मागणी आहे. कॅशबॅक ऑफरमुळेही ऑनलाइन खरेदीकडे ग्राहकांचा कल वाढतो आहे.
वाहतुकीचा फज्जा अन् रस्ते बंद
खासगी वाहनांसह नागरिक बाजारपेठांमध्ये दाखल होत असल्याने शहरातील मुख्य व उपनगरांमधील बाजारपेठांमध्ये वाहतुकीची कोंडी झाली. गर्दीमुळे लोकांना पायी चालणे मुश्किल होत असताना वाहनांमुळे गोंधळात अधिकच भर पडली. रविवार कांरजा, मेनरोड, दहीपूल, एमजी रोड या परिसरात वाहतूक कोंडीच्या समस्येने नागरिक आणि पोलिसांची डोकेदुखी वाढली. त्यामुळे पोलिसांनी काही रस्त्यांवर वाहनांना मज्जाव केला. रेडक्रॉस सिग्नल ते मेनरोड, नेहरू गार्डन ते शालिमार, रविवार कारंजा ते सराफ बाजार असे अनेक रस्ते दुपारनंतर वाहतुकीसाठी बंद ठेवण्यात आले. तसेच खरेदीसाठी पायीच जाण्याच्या सूचना पोलिसांकडून करण्यात आल्या.
मोबाइल अॅप डाउनलोड करा आणि राहा अपडेट