म. टा. खास प्रतिनिधी, नाशिक
जीवनाच्या वेगवेगळ्या टप्प्यावर यश-अपयश वाट्याला येते. कलाकाराबरोबरच उत्तम माणूस असणे महत्त्वाचे आहे. दैनंदिन जीवनात वावरताना विद्यार्थ्यांनी आपल्या डोळयासमोर विशिष्ट व्यक्तींचा आदर्श ठेवणे तितकेच आवश्यक बनले आहे. अंगात ऊर्जा आणि उत्साह असला तरी कला क्षेत्रात यश मिळवायचे असेल तर कलेची साधना आवश्यक आहे, असे प्रतिपादन अभिनेत्री नेहा जोशी यांनी मंगळवारी बोलताना व्यक्त केले.
यशवंतराव चव्हाण महाराष्ट्र मुक्त विद्यापीठाच्या वतीने आयोजित युवक केंद्रीय महोत्सवाचे उदघाटन अभिनेत्री जोशी यांच्या हस्ते झाले. त्या वेळी त्या बोलत होत्या. व्यासपीठावर विद्यापीठाचे कुलसचिव डॉ. दिनेश भोंडे, वित्त अधिकारी मगन पाटील, कुलगुरू प्रा. ई. वायुनंदन, विद्यापीठाच्या विद्यार्थी कल्याण व बहि:शाल केंद्राच्या प्रमुख डॉ. विजया पाटील होत्या.
विद्यार्थ्यांना मार्गदर्शन करताना नेहा जोशी म्हणाल्या, की नाटक किंवा अभिनय डोक्यात असतो. त्यामुळे आपापल्या कालागुणांवर विश्वास ठेवा. आपल्यातील गुणांचा वापर होणाऱ्या घटकांशी सामावून घेतल्यास यश निश्चित मिळते. क्षेत्र कोणतेही निवडा, त्यात यश मिळवायचे असेल तर कठोर मेहनतीशिवाय पर्याय नाही. अभिनय क्षेत्रही त्याला अपवाद नाही. अभिनयात तुम्ही कसे दिसता यापेक्षा तुम्ही किती कसदार अभिनय करता, याची पारख आधी होत असते. तुम्ही तुमच्या कामातून प्रतिबिंबित व्हा आणि स्वतःची वेगळी ओळख निर्माण करा. आज मला मिळालेले यश हे प्रेक्षकांनी दिलेल्या कौतुकाची पावती आहे. कला क्षेत्रात आज आपण स्थिरावलो असलो तरी मुक्त विद्यापीठानेच आपल्याला प्रथम संधी दिली असून, काही दिवसांपूर्वीच सावित्रीबाई फुले यांचे पात्र साकारल्याने शिक्षण घेण्याची आवड निर्माण झाल्याचे त्यांनी आवर्जून सांगितले.
आपल्या कामावरची निष्ठा आणि श्रद्धा कायम जोपासणे गरजेचे असून, आजकालच्या परिस्थितीत माणसे वाचणे अधिक महत्त्वाचे बनले आहे. जीवनात यशाची शिखरे पादाक्रांत करायची असल्यास योग्य संधी आणि योग्य वेळ मिळून यावी लागते, हे प्रत्येकाने लक्षात घ्यायला हवे. कलाकार आणि खेळाडूंसाठी मुक्त विद्यापीठाच्या विविध संधी उपलब्ध असल्याचे सांगत विद्यार्थ्यांना युवक महोत्सवासाठी शुभेच्छा दिल्या व मुक्त विद्यापीठ समाजातील विविध घटकांसाठी खुल्या केलेल्या शिक्षणाच्या संधींचा जास्तीत जास्त विद्यार्थ्यांनी लाभ घ्यावा, असे आवाहन त्यांनी केले. कलेबरोबरच आज शिक्षणही तेवढेच महत्त्वाचे असल्याचे त्यांनी स्पष्ट केले. कुलगुरू प्रा. वायुनंदन यांनीही या वेळी विद्यार्थ्यांना शुभेच्छा दिल्या.
पुढील वर्षी ‘इंद्रधनुष्य’चे यजमानपद
प्रास्ताविक करताना प्रा. विजया पाटील म्हणाल्या, की शिक्षणाबरोबरच क्रीडा-कला क्षेत्रालाही प्रोत्साहन देणारे हे एकमेव मुक्त विद्यापीठ आहे. दूरःस्थ शिक्षण पद्धतीने शिकणारे या विद्यापीठाचे विद्यार्थी कलेची साधना करीत इथपर्यंत येऊन पोहोचले आहेत. विद्यार्थ्यांनी केवळ इथेच न थांबता आपल्या मुक्त विद्यापीठाचे नाव राष्ट्रीय, आंतरराष्ट्रीय स्तरावरील स्पर्धेत झळकवतील, असा विश्वास व्यक्त केला. दरम्यान, पुढील वर्षी होणाऱ्या इंद्रधनुष्यचे यजमानपद मुक्त विद्यापीठाकडे असल्याने नाशिकमध्येच तो पार पडणार असल्याचे त्यांनी सांगितले. यासाठी सर्व विभागीय केंद्रांनी विद्यार्थ्यांचा सहभाग वाढविण्यावर भर द्यावा, असे त्या म्हणाल्या.
कुलगुरू प्रा. वायुनंदन यांच्या हस्ते विजेत्या स्पर्धकांना पारितोषिके देण्यात आली. प्रारंभी कुलसचिव डॉ. भोंडे यांनी स्वागत केले. विवेक अहिरे यांनी पाहुण्यांचा परिचय करून दिला. श्याम पाडेकर यांनी सूत्रसंचालन केले. डॉ. विजया पाटील यांनी आभार मानले. केंद्रीय युवक महोत्सवात राज्यभरातून विविध विभागीय केंद्रातील १२५ स्पर्धकांनी १७ कला प्रकारांत सहभाग नोंदवला. या महोत्सवांतर्गत एकांकिका स्पर्धा, मूक अभिनय, विडंबन नाट्य, गायन, वादन, चित्रकला, रांगोळी, फोटोग्राफी, वादविवाद, नृत्य, वक्तृत्व, रांगोळी आणि प्रश्नमंजुषा अशा विविध १७ प्रकारच्या स्पर्धा या वेळी झाल्या.
बाळ नगरकर, मिलिंद देशमुख, श्याम पाडेकर, सुनील देशपांडे, मकरंद हिंगणे, शुभांजली पाडेकर, आनंद अत्रे, सुमुखी अथनी, हसन इनामदार, ऋषिकेश अयाचित, अवी जाधव, हर्षद वडजे, रवींद्र राजोरीकर, माणिक कानडे आदी परीक्षक होते. निवड झालेले विद्यार्थी परभणी येथे ५ नोव्हेंबरपासून सुरू होणाऱ्या इंद्रधनुष्य या आंतरविद्यापीठीय स्पर्धेत सहभागी होणार आहेत.
स्पर्धांचा निकाल ः
शास्रीय तालवाद्य ः श्याम तांबे, कोल्हापूर विभागीय केंद्र
भारतीय सुगम संगीत ः चेतन बनसोड, नागपूर विभाग
शास्रीय नृत्य ः श्रावणी शेलार, पुणे विभाग
मिमिक्री ः अनिकेत कोकाटे, औरंगाबाद विभाग
प्रश्नमंजुषा ः श्रुतिका लड्डे, दीपाली माणगावे, कोल्हापूर विभाग
वक्तृत्व ः अंकिता साळुंके, पुणे विभाग
रांगोळी ः पूजा अमझरे, अमरावती विभाग (प्रथम)
पोस्टर ः ज्योती चव्हाण, नाशिक विभाग (प्रथम)
कोलाज ः प्रतीक जाधव, कोल्हापूर विभाग (प्रथम)
स्पॉट पेंटिंग ः आकाश व्हटकर, कोल्हापूर विभाग (प्रथम)
स्पॉट फोटोग्राफी ः प्रसाद पवार, नाशिक विभाग (प्रथम)
मृदू मूर्तिकला ः आकाश कंकाळ, नाशिक विभाग
मोबाइल अॅप डाउनलोड करा आणि राहा अपडेट
