नाशिक ः शीख धर्माचे संस्थापक गुरू नानक देवजी यांच्या जयंतीनिमित्त ‘सतगुरू नानक प्रगटिया, मिटी धुन्ध जग चानण होया…’ या व अन्य भजनांचे स्वर शनिवारी शहर परिसरात गुंजले. शीख समाजबांधवांकडून त्यांचे तन्मयतेने श्रवण केले गेले. शहरासह पंचवटी, नाशिकरोड, देवळाली कॅम्प आदी उपनगरांतील श्री गुरुद्वारांमध्ये गुरू नानक यांच्या ५४८ व्या जयंतीनिमित्त गुरू ग्रंथ साहिबचे पारायण करण्यात आले. विविध धार्मिक, सामाजिक उपक्रमांसह पंजाबी बांधवांच्या वतीने ठिकठिकाणी लंगर (भोजन)चेदेखील आयोजन करण्यात आले होते.
---
देवळाली कॅम्पमध्ये विशेष अरदास
म. टा. वृत्तसेवा, देवळाली कॅम्प
सर्वधर्मीय एकोप्याने नांदणाऱ्या देवळाली कॅम्पमधील वडनेररोडवर असणाऱ्या श्री गुरुद्वारामध्ये गुरू ग्रंथ साहिबचे अखंड पारायण करण्यासह विविध उपक्रम झाले. येथे भव्य लंगर (भोजन)चेदेखील आयोजन करण्यात आले होते. दिल्लीचे गायक भाई बलजितसिंग यांनी विशेष अरदास सादर करीत भाविकांना मंत्रमुग्ध केले.
कार्तिक पौर्णिमेला श्री गुरू नानक देवजी यांचा जन्मदिन प्रकाश पूरब दिन म्हणून साजरा केला जातो. येथील गुरुद्वारात पहाटेपासून विविध धार्मिक कार्यक्रम सुरू होते. पोथी पूजन, आसा की वार कीर्तन, अखंड पाठ का भोग, लहान मुलांसाठी विशेष कीर्तन आदींबरोबरच मुख्य असलेले ग्रंथी ग्यानी सुरेंद्रसिंग यांनी ग्रंथ साहिबचे पाठ केले. गुरुद्वारा कमिटीचे अध्यक्ष कर्नल जसवंतसिंग लबाना, सुरेंद्रसिंग अहलुवालिया, पी. एस. चढ्ढा, परमजितसिंग कोचर, प्रदीप गुरव आदी उपस्थित होते. गुरुद्वारा कमिटीचे पदाधिकारी व सर्व सदस्य कार्यक्रमाच्या यशस्वितेसाठी प्रयत्नशील होते. दुपारपासून सुरू असलेल्या लंगरचा सुमारे तीन हजारांहून अधिक सर्वधर्मीयांनी लाभ घेतला.
--
बाबा जोधासिंग दरबार
येथील प्रसिद्ध बाबा जोधासिंग दरबार (सिंधी गुरुद्वारा) येथे मंडळाने विशषे कार्यक्रमांचे आयोजन केले होते. सिंधी बांधवांच्या वतीने या गुरुद्वारामध्ये गेल्या चाळीस वर्षांपासून विविध धार्मिक कार्यक्रमांचे आयोजन केले जाते. यात महिलांचा मोठा सहभाग असतो. अंकिता कटारिया यांच्या मार्गदर्शनाखाली मोनिका कटारिया, साक्षी नागदेव, लता चावला, आरती निहलानी, वर्षा चावला, सोनिया भागचंदानी,रचना कारडा, हर्षा चावला, रोशनी नागपाल आदींनी संयोजन केले. या कार्यक्रमास नगरसेवक भगवान कटारिया यांनी भेट दिली.
---
नाशिकरोडला सर्वधर्मीयांचा सहभाग
म. टा. वृत्तसेवा, नाशिकरोड
नाशिकरोड येथील गुरुद्वारात गुरू ग्रंथ साहिबच्या पठणासह विविध धार्मिक, सामाजिक कार्यक्रम झाले. दुपारनंतर लंगरचे आयोजन करण्यात आले होते. त्याचा सर्वधर्मीयांनी लाभ घेतला.
येथील गुरुद्वारात शीखबांधवांची सकाळपासूनच गर्दी झाली होती. गुरू नानक जयंतीच्या पार्श्वभूमीवर दि. ३० ऑक्टोबरपासून परिसरात रोज सकाळी प्रभात फेरी काढण्यात आली. शीखबांधव भजन, कीर्तन सादर करीत त्यात सहभागी झाले. ही फेरी दत्त मंदिर, मोटवानीरोड, कोठारी कन्या शाळामार्गे तेथील झुलेलाल मंदिरात गेली. धन धन बाबा दीपसिंग सोशल ग्रुपतर्फे जेलरोडच्या सिंधी कॉलनीतील गुरुद्वारात शनिवारपासून सकाळी साडेदहा व सायंकाळी साडेसात वाजता बीबी परमजित कौर यांचे कीर्तन सुरू झाले आहे.
--
कारागृहात प्रतिमापूजन
नाशिकरोड मध्यवर्ती कारागृहातदेखील विविध कार्यक्रम झाले. कारागृहातील सांस्कृतिक सभागृहात झालेल्या कार्यक्रमास अधीक्षक राजकुमार साळी, वरिष्ठ तुरुंगाधिकारी एस. बी. कोकणे, एस. पी. सरपाते, बी. एन. मुलानी, पी. आर. पाटील आदींची प्रमुख उपस्थिती होती. अधीक्षक साळी यांनी प्रतिमापूजन करून मार्गदर्शन केले. यावेळी बंदिवानदेखील उपस्थित होते.
---
पंचवटीत विविध कार्यक्रम
म. टा. वृत्तसेवा, पंचवटी
पंचवटीतील गुरुद्वारात विविध धार्मिक कार्यक्रम घेण्यात आले. कीर्तन, भजन, प्रवचन आणि लंगर आदी कार्यक्रमांत शीख बांधवांनी सहभाग घेतला. या जयंती उत्सवासाठी गुरुद्वाराची सजावट करण्यासह रोषणाईदेखील करण्यात आली होती. विविध सामाजिक उपक्रमांसह रक्तदान शिबिरदेखील घेण्यात आले. त्यात सर्वधर्मीयांनी उत्स्फूर्तपणे सहभाग नोंदवला.
---
भक्ती अन् मानवतेचा मार्ग अनुसरण्याचा संदेश
म. टा. प्रतिनिधी, नाशिक
शहरातील शिंगाडा तलाव परिसरातील गुरुद्वारामध्ये शनिवारी गुरू नानक जयंतीनिमित्त झालेल्या कीर्तनाद्वारे गुरू नानक देवांनी सांगितलेल्या भक्तीच्या आणि मानवतेच्या मार्गावर चालण्याचे आवाहन समाजबांधवांना करण्यात आले. येथे दिवसभर विविध धार्मिक कार्यक्रमांचेही आयोजन करण्यात आले होते.
गुरुवारपासून सुरू असलेल्या गुरू ग्रंथ साहिब अखंड पाठाची शनिवारी सकाळी नऊ वाजता समाप्ती झाली. त्यानंतर दिवसभरात देशाच्या विविध भागांतून आलेल्या मान्यवरांच्या कीर्तनाचा लाभ भाविकांना मिळाला. हरदीपसिंगजी, तसेच लुधियाना येथील गुरुचरणसिंगजी रसिया, फरिदकोट येथील गुरुमत विचार ग्यानी लखवीरसिंगजी यांच्या कीर्तनात भाविक तल्लीन झाले होते. दुपारी, तसेच रात्री गुरुका लंगरचा लाभ भाविकांनी घेतला. दि. ३१ ऑक्टोबर आणि त्याआधी चिमुकल्यांसाठी गुरुबानी पाठांतर स्पर्धा घेण्यात आली. या स्पर्धेतील विजेत्या स्पर्धकांना पारितोषिके देऊन गौरविण्यात आल्याची माहिती कुलवंतसिंग बग्गा यांनी दिली. या कार्यक्रमाच्या न‌िमित्ताने समाजातील सर्व स्तरांतील बांधव एकत्र येतात. भजन-कीर्तनात दंग होतात, तसेच लंगरचा आस्वाद घेतात, अशी माहितीही त्यांनी यावेळी दिली. मध्यरात्री बाराच्या सुमारास येथील कार्यक्रमांची सांगता झाली.
मोबाइल अॅप डाउनलोड करा आणि राहा अपडेट
