म. टा. खास प्रतिनिधी, नाशिक
प्रत्येक कलावंतातील कुतूहल त्याला कलाकार बनवत असते. एकदा की हे कुतूहल चाळवले की पुढील क्रिया आपोआपच व्हायला लागतात. सतत, निरंतर काम करत राहणे ही ऊर्जा प्रत्येकाच्या मनातल्या कुतूहलाचा निकाल असते, असे प्रतिपादन अखिल भारतीय मराठी नाट्य परिषदेच्या मध्यवर्ती शाखेचे प्रमुख कार्यवाह व सिनेअभिनेते दीपक करंजीकर यांनी केले.
अखिल भारतीय मराठी नाट्य परिषदेच्या नाशिक शाखेतर्फे दरवर्षी देण्यात येणाऱ्या पुरस्कारांचे वितरण करंजीकर यांच्या हस्ते रंगभूमीदिनानिमित्त करण्यात आले. याप्रसंगी आयोजित कार्यक्रमात करंजीकर बोलत होते. सावानाच्या मु. शं. औरंगाबादकर सभागृहात हा कार्यक्रम झाला. करंजीकर पुढे म्हणाले, की रंगभूमीसाठी १७४ वर्षे एखादा दिन साजरा करणारा भारत हा एकमेव देश आहे. असे काम करणारी शाखा महाराष्ट्रात दुसरी नाही अशी कौतुकाची पावतीही करंजीकर यांनी दिली.
यावेळी व्यासपीठावर अखिल भारतीय मराठी नाट्य परिषदेच्या नाशिक शाखेचे अध्यक्ष प्रा. रवींद्र कदम, उपाध्यक्ष शाहू खैरे, प्रमुख कार्यवाह सुनील ढगे, डॉ. अनिरुध्द धर्माधिकारी यांची उपस्थिती होती. नाट्य परिषदेतर्फे काही विशेष योगदान पुरस्कारही देण्यात आले. यात संजीवनी कुलकर्णी, रेखा नाडगौडा, विद्या देशपांडे व मीरा धानू यांचा समावेश होता. संजीवनी कुलकर्णी यांच्या वतीने सुमुखी अथनी यांनी पुरस्कार स्वीकारला. तसेच यावेळी दिवंगत रंगकर्मींच्या वारसांचा सन्मान करण्यात आला. त्यात प्रसाद रहाणे, मयुरी सिन्नरकर, पूजा साळवे, वैष्णवी भडकमकर, अक्षय तिवारी, विकास दातार, शुभदा भडकमकर यांचा समावेश होता. याप्रसंगी ज्येष्ठ रंगकर्मी नेताजी भोईर यांचा राज्य नाट्य स्पर्धेतल्या सुवर्णमहोत्सवी नाटकाबद्दल विशेष सत्कार करण्यात आला. त्यांचा पुरस्कार त्यांच्या कन्या नंदा रायते यांनी स्वीकारला. तसेच संगीत देवबाभळी या नाटकातील कलावंत रसिका नातू व शुभांगी सदावर्ते, विजय साळवे व महेश डोकफोडे यांचा सत्कारही यावेळी करण्यात आला.
सुनील ढगे यांनी प्रास्ताविक केले. अदिती मोराणकर यांनी सूत्रसंचालन केले. पुरस्कारमूर्तींच्या वतीने बबनराव घोलप व सदानंद जोशी यांनी मनोगत व्यक्त केले. यावेळी संगीत देवबाभळी या नाटकातील काही गीतांचे सादरीकरण झाले.
हे आहेत पुरस्कारार्थी
दत्ता भट स्मृती पुरस्कार अभिनय पुरूष ज्येष्ठ रंगकर्मी सदानंद जोशी, शांता जोग स्मृती पुरस्कार अभिनय स्त्री ज्येष्ठ रंगकर्मी नीता कोठेकर, प्रभाकर पाटणकर स्मृती पुरस्कार दिग्दर्शन अतुल पेठेकर यांच्या वतीने राहुल डबीर यांनी, गिरीधर मोरे स्मृती पुरस्कार प्रकाशयोजनेसाठी ज्येष्ठ रंगकर्मी सतीश सामंत, जयंत वैशंपायन स्मृती पुरस्कार सांस्कृतिक पत्रकारिता नंदकुमार टेणी, रामदास बरकले स्मृती पुरस्कार लोककला बबनराव घोलप यांना, वा. श्री. पुरोहित स्मृती पुरस्कार शीला सामंत यांना तर रावसाहेब अंधारे स्मृती पुरस्कार नेपथ्यासाठी आनंद ढाकिफळे यांना मान्यवरांच्या हस्ते प्रदान करण्यात आला.
मोबाइल अॅप डाउनलोड करा आणि राहा अपडेट
