आमदारांचे प्रगतिपुस्तक
--
मतदारसंघ ः बागलाण
--
प्रतिमा कार्यक्षम, विकास मात्र दूरच!
आपल्या तीन वर्षांच्या कार्यकाळात आमदार दीपिका चव्हाण यांनी हक्काच्या आमदारनिधी खर्चात जिल्ह्यात आघाडी घेऊन एक कार्यक्षम आमदार म्हणून ओळख निर्माण केली आहे. मतदारसंघातील प्रश्नांबाबत नेहमीच जागरू राहून शासनदरबारी मतदारसंघाच्या व्यथा त्यांनी मांडल्या. विरोधात राहूनही निधी मिळवून आणला आहे. परंतु, आदिवासीबहुल मतदारसंघातील अनेक प्रश्न मात्र जैसे थेच आहेत. सिंचन, आरोग्य, रोजगार, शिक्षणाच्या प्रश्नांची सोडवणूक करण्यात त्यांना फारसे यश आलेले नाही. त्यामुळे आमदारांची प्रतिमा कार्यक्षम असली, तरी मतदारसंघाचा विकास मात्र अजून दूरच आहे.
विद्यमान सरकारच्या तीन वर्षांच्या कार्यकाळात मतदारसंघातील प्रलंबित कामे व निवडणूक कालावधीत दिलेल्या आश्वासनांची पूर्तता करण्यासाठी तळमळीने शासनदरबारी प्रयत्नशील राहिले, तरीही सत्ताधारी आणि विरोधक यात फरक असतो याची जाणीव अशा मतदारसंघात हटकून येते. असे असले, तरी सातत्याने शासनदरबारी पाठपुरावा, अधिवेशन कालावधीत लक्षवेधी, तारांकित प्रश्नांच्या आयुधांचा वापर करून मतदारसंघातील प्रलंबित तळवाडे भामेर पोहोच कालवा, हरणबारी डावा उजवा कालवा, केळझर चारी क्रमांक आठ कामांसाठी विद्यमान शासनाकडून तब्बल ७५ कोटी रुपयांचा निधी आमदार चव्हाण यांनी मिळवून दिला आहे. सटाणा नगर परिषद कार्यक्षेत्रात सुरू असलेल्या विविध विकासकामांसाठीदेखील तीन कोटी रुपयांहून अधिकचा निधी मिळवून दिल्याने आगामी काळात शहरातही विकासकामांची रेलचेल बघावयास मिळू शकेल.
४५ किलोमीटरचे रस्ते
मतदारसंघातील रस्त्यांची कामे तत्कालीन सार्वजनिक बांधकाममंत्री छगन भुजबळ यांच्या माध्यमातून माजी आमदार संजय चव्हाण यांनी मोठ्या प्रमाणात केली होती. तुलनेने या तीन वर्षांत रस्त्यांची अवस्था बिकट झाली आहे. तरीही आपण ५० कोटी रुपयांची कामे मतदारसंघात केली, असा दावा आमदार चव्हाण यांनी केला आहे. मुख्यमंत्री ग्रामसडक योजनेतून ४५ किलोमीटरचे रस्ते बांधण्यात आले आहेत. आदिवासी मतदारसंघ असल्याने आदिवासी विद्यार्थ्यांचे शैक्षणिक जीवनमान उंचावण्यासाठी मतदारसंघातील सहा आश्रमशाळांच्या बांधकामासाठी आदिवासी विकास विभागातून तब्बल ७५ कोटी रुपयांचा निधी उपलब्ध करून सुसज्ज आश्रमशाळा उभारल्या जात आहेत. अजमीर सौंदाणे येथे एकलव्य इंग्लिश मीडियम रेसिडेन्सी स्कूलकरिता सुमारे २५ कोटी रुपये खर्च करून सुसज्ज निवासी शाळा उभारण्यात येत आहे.
अप्पर पुनंदसाठी पाठपुरावा
बागलाण तालुक्यातील शेती सिंचनाचे प्रश्न मार्गी लावण्यासाठी अप्पर पुनंदसाठी अामदार चव्हाण आग्रही अाहेत. उंबरगव्हाण येथे अप्पर पुनंद बंधारा बांधून बोगद्याद्वारे हे पाणी आरम खोेऱ्यात खेळविण्याचेही त्यांचे ध्येय आहे. अवकाळी पाऊस व नुकसानीपोटी सुमारे ६५ कोटी रुपयांचा प्रलंबित निधी शेतकऱ्यांना प्राप्त करून देण्यातही त्यांना यश आले आहे. सटाणा शहराचा पिण्याच्या पाण्याचा प्रश्न सोडविण्यासाठी कळवण तालुक्यातील पुनंद धरणावर पहिले आरक्षण मंजूर करवून घेत पाण्याचा हक्क अबाधित केला आहे. शहरासाठी थेट धरणातून पाइपलाइनद्वारे पाणी आणण्यासाठीही त्या प्रयत्नशील आहेत. शहरातील बायपासचा प्रश्न परिसरातील शेतकऱ्यांचा विरोध असल्याने प्रलंबित आहे. शहरातून जाणारा महामार्ग आता राज्यऐवजी राष्ट्रीय महामार्ग झाल्याने प्रश्न केंद्र स्तरावर पोहोचला आहे. त्यासाठी केंद्रीय मंत्री नितीन गडकरींकडे पाठपुरावा सुरू आहे.
या प्रश्नांकडे दुर्लक्ष
आदिवासीबहुल मतदारसंघात शिक्षण, आरोग्य, बेरोजगारीचे प्रमाण कायम आहे. उद्योगवाढीसाठी फारसे प्रयत्न झालेले नसल्याने तरुणांच्या हाती काम नाही. सटाणा शहरातील पिण्याच्या पाण्याचा प्रश्न व बायपास या समस्या शहरवासीयांसाठी जैसे थे आहेत. मतदारसंघातील पिण्याच्या पाण्याचा प्रश्न कायम आहे. पाणीपुरवठा योजनांकडे दुर्लक्ष झाल्याने महिलांना पाण्यासाठी वणवण करावी लागते. केळझर पाणी योजना पूर्णत्वास नेण्याची त्यांची इच्छाशक्ती नसल्याने तो प्रश्नही भिजत पडला आहे.
मार्गी लावलेली कामे
--
-सटाण्यातील विकासकामांसाठी ३ कोटी
-अवकाळी पाऊस नुकसानभरपाई ६५ कोटी
-आश्रमशाळांसाठी २५ कोटींचा निधी
-रस्ते डांबरीकरणासाठी ५० कोटी
-सिंचनासाठी ७५ कोटींचा निधी
-बागलाण शहराचा बायपास केला मंजूर
--
विधिमंडळात आवाज
विधानसभा अधिवेशनात जिल्ह्यातून सर्वाधिक तारांकित व लक्षवेधी प्रश्न आपण मांडलेले असल्याचा दावा आमदार दीपिका चव्हाण यांनी केला आहे. एक जागरूक लोकप्रतिनिधी म्हणून आपण नेहमीच जनतेच्या संपर्कात असल्याचा दावादेखील आमदार चव्हाण यांनी केलेला आहे. विधानसभा अध्यक्ष तालिकेवर कामकाजाची संधीही त्यांना मिळाली आहे.
--
आमदार म्हणतात...
--
आश्वासनांची करणार पूर्ती
बागलाण विधानसभा मतदारसंघातील जनतेने प्रथमच आमदाररुपाने महिला लोकप्रतिनिधी म्हणून आपणास बहुमान मिळवून दिला आहे. त्यामुळे त्यांच्या ऋणात राहणे आपणास निश्चितच आवडणार आहे. येत्या दोन वर्षांत निवडणुकीत दिलेल्या आश्वासनांची पूर्ती करण्यासाठी प्रयत्न करणार आहे.
-दीपिका चव्हाण, आमदार, बागलाण
--
विरोधक म्हणतात...
--
मतदारसंघाच्या समस्या कायम
--
बागलाण विधानसभा मतदारसंघात गत तीन वर्षांत कोणत्याही प्रकारची विकासकामे झालेली नाहीत. बागलाण हा आदिवासीबहुल मतदारसंघ आहे. या मतदारसंघात आदिवासी बांधवांसह सर्वसामान्य जनतेचे प्रश्न जैसे थे आहेत. आमदारनिधीतून होणारी कामे सालाबादाप्रमाणे सुरूच असतात. या विकासाची टिमकी आमदार चव्हाण यांनी वाजवू नये. धुळे लोकसभा मतदारसंघाचे खासदार तथा केंद्रीय संरक्षण राज्यमंत्री डॉ. सुभाष भामरे यांच्या प्रतिनिधित्वामुळे बागलाणमधील विकासकामांना भाजपच्या राज्यात विकासची फळे येऊ लागली आहेत, हे सत्य नाकारता येणार नाही. गत दोन वर्षांतील आमदारांच्या निष्क्रिय कारभारामुळे सटाणा नगरपालिका मतदारांनी भाजपच्या ताब्यात दिली आहे. सटाणा शहरातील पिण्याच्या पाण्याचा प्रश्न व बायपास या समस्या शहरवासीयांसाठी आजही जैसे थे आहेत. केळझर पाणी योजना पूर्णत्वास नेण्याची त्यांची इच्छाशक्ती नसल्याने तो प्रश्न त्यांनी भिजत ठेवला होता. मात्र, हे सर्व प्रश्न भाजप सरकारच्या माध्यमातून निश्चितपणे सोडविण्यात येतील. यासाठी केंद्रीय संरक्षण राज्यमंत्री डॉ. सुभाष भामरे यांचे योगदान मोठे असणार आहे.
-साधना वसंत गवळी, जिल्हा परिषद सदस्या, भाजप
--
शब्दांकन ः कैलास येवला
-----------------
मतदारसंघ ः सिन्नर
कामाची तळमळ पण, पाणीप्रश्न जैसे थे
सतत दुष्काळाच्या छायेत असलेल्या सिन्नर विधानसभा मतदारसंघात शिवसेनेचे आमदार राजाभाऊ वाजे यांना पाण्याचा प्रश्न कायमस्वरूपी सोडविता आलेला नसला, तरी तीन वर्षांत टँकरमुक्ती करण्याच्या दिशेने त्यांच्या प्रयत्नांना यश आले आहे. या तीन वर्षांत जलयुक्त शिवार व काही पाण्याच्या योजना मंजूर करून त्यांनी हा प्रश्न मार्गी लावण्याचा प्रयत्न केला आहे. पाण्याबरोबरच या मतदारसंघात रस्त्यांचा प्रश्नही कायम असून, तो सोडविण्यासाठी मात्र त्यांची दमछाक होत आहे. मतदारसंघातील इतर समस्या कायम असल्या, तरी त्यातील काही प्रश्न वाजे यांनी सोडविण्यासाठी प्रामाणिक प्रयत्न केला आहे. उर्वरित दोन वर्षांत त्यांना अधिक काम करावे लागणार आहे.
सन २०१४ मध्ये झालेल्या विधानसभा निवडणुकीत जिल्ह्यात येवल्यापाठापोठ सिन्नरची निवडणूक चुरशीची व लक्षवेधी ठरली. राजकीयदृष्ट्या जागरूक असलेल्या या मतदारसंघात माणिकराव कोकाटे यांचे पक्षांतरही बरेच गाजले. त्यामुळे या निवडणुकीकडे सर्वांचे लक्ष होते. तीनवेळा आमदार झालेल्या कोकाटे यांच्या विरोधात शिवसेनेने पराग ऊर्फ राजाभाऊ वाजे यांना उमेदवारी दिली. कोकाटे यांचा अनुभव व त्यांनी केलेल्या विकासकामांमुळे त्यांचा पराभव सोपा नव्हता. पण, मतदारांनी त्यांना नाकारले व वाजे निवडून आले. आता त्याला तीन वर्षे पूर्ण होत आहेत. या तीन वर्षांत आमदार वाजे यांनी मतदारसंघात विविध कामे केली असली, तरी ती पुरेशी नाहीत.
पाणीप्रश्नाला प्राधान्य
विडी कारखानदारीमुळे सिन्नरचे नाव राज्यभर प्रसिद्ध झाले. त्यानंतर अनेक उद्योगांनी येेथे पाय रोवले. आैद्योगिकदृष्ट्या संपन्न असलेल्या या भागात पाणीप्रश्न मात्र नेहमीच विकासाला अडचणीचा विषय ठरला. आमदार वाजे यांनी तीन वर्षांत कडवा कॅनॉल दुरुस्तीच्या ५३ कोटी ३६ लाखांच्या योजनेला मंजुरी मिळविली. या योजनेतून चाऱ्यांमधून होणारी पाणीगळती थांबली. शेतकऱ्यांना पूर्ण क्षमतेने पाणी मिळू लागले. त्यात ३५ कोटींच्या आसपास काम झाले आहे, तरीसुद्धा या योजनेतून १४ दिवसांनी मिळणारे पाणी आता चार दिवसांत मिळू लागेल आहे. या योजनेबरोबरच जलयुक्त शिवार योजनेत राज्य सरकार, कृषी खाते, युवामित्र, टाटा ट्रस्ट व लोकसहभागातून १३ कोटी ३९ लाखांचे काम करण्यात आले. त्यात ३८ गावांत १०१ बंधारे बांधण्यात आले. त्यामुळे ६४.५८ कोटी लिटर पाणीसाठा वाढला.
२२ गावांत जलयुक्त शिवार
२०१७-१८ मध्ये २२ गावांतील २८२ ठिकाणी जलयुक्त शिवारची कामे होणार आहेत. जलयुक्त शिवाराबरोबरच १५ गावांत १२ लाख ९४ हजार रुपये खर्च करून २३ बंधारे बांधले. त्याचप्रमाणे स्थानिक विकासनिधीमधून बंधारे बांधकामास ६४ लाख ९९ हजार रुपये दिले. मुख्यमंत्री ग्रामीण पेयजल योजनेतून ७ कोटींची कामे व मनेगावसह २२ गाव पाणीपुरवठा योजनेसाठी २० कोटी ३४ लाखांची मंजुरी हीसुद्धा पाणीप्रश्न सोडविण्याच्या दिशेने उपयोगी ठरणार आहे. सिन्नर शहरातील गेल्या पंचवार्षिक योजनेला चालना देण्याचे काम वाजे यांनी केले आहे. त्याचप्रमाणे कोळओहळ नदी पुनरुज्जीवनाच्या कामाला मंजुरी मिळाली आहे. पाणीप्रश्नाबरोबरच विजेचा प्रश्नही या मतदारसंघात मोठा आहे. या मतदारसंघातील शहा येथे २२० केव्ही, १०० एमव्हीए क्षमतेच्या अतिउच्च दाब उपकेंद्राला मंजुरी दिल्यामुळे पूर्व भागात कमी दाबाने मिळणाऱ्या विजेचा प्रश्न सुटणार आहे. नवीन पाच उपकेंद्रांनाही मंजुरी देण्यात आली आहे. हे काम येत्या काही दिवसांत होईल.
या प्रश्नांकडे दुर्लक्ष
परिसरात ३० तलाठी कार्यालये व निवासी इमारत बांधकाम यासाठी ५ कोटी ७९ लाखांच्या निधीस मंजुरी मिळाली आहे. आरोग्य, रस्ते, यांसह या मतदारसंघात कामे आहेत. पण, तरीही अनेक गावे विकासाच्या प्रतीक्षेत आहेत. आगामी दोन वर्षांत विविध कामे करण्याचा आमदार वाजे यांचा संकल्प असला, तरी त्यात पाण्याचा प्रश्न हा मुख्य विषय आहे. त्याचबरोबर रस्ते दुरुस्त करणे या विषयालाही प्राथमिकता देणार आहे. याबरोबरच मूलभूत प्रश्न सोडविण्यावरच भर राहणार आहे.
मार्गी लागलेली विकासकामे
--
-कडवा कॅनॉल दुरुस्तीसाठी ५३ कोटी ३६ लाख निधी
-जलयुक्त शिवार योजनेत १३ कोटी ३९ लाखांची कामे
-१५ गावांतील २३ बंधाऱ्यांसाठी १२ लाख ९४ हजार निधी
-बंधारे बांधकामास ६४ लाख ९९ हजार रुपये निधी
-मुख्यमंत्री ग्रामीण पेयजल योजनेतून ७ कोटींची कामे
-मनेगावसह २२ गाव पाणीपुरवठा योजनेसाठी २० कोटी ३४ लाखांची मंजुरी
--
विधिमंडळात आवाज
विधानसभेमध्ये शंभर टक्के उपस्थिती नोंदणारा आमदार म्हणून राजाभाऊ वाजे यांचा उल्लेख केला जातो. विधानसभेच्या कामकाजात सहभाग घेणे, लक्षवेधी मांडणे, चर्चेत सहभागही ते घेत असतात. सिन्नर मतदारसंघातील विविध विकासकामांप्रश्नी त्यांनी वेळोवेळी पाठपुरावा केलेला असून, त्यामुळे या मतदारसंघातील विकासकामे वेळीच मार्गी लागण्यास मदत झाली आहे.
--
आमदार म्हणतात...
--
महत्त्वाच्या कामांना देणार गती
तीन वर्षांत टँकरमुक्त मतदारसंघ व्हावा यासाठी प्रयत्न केले व त्याला यशही आले. तालुक्यातील पाण्याची समस्या मोठी आहे. त्या दिशेने जलयुक्त शिवारात मोठ्या प्रमाणात कामे घेतली. त्याचप्रमाणे अनेक योजनाही हाती घेतल्या. रस्त्यांचे मोठे जाळे असल्यामुळे शिवार रस्ता हा मोठा प्रश्न आहे. वीज उपकेंद्रांना मान्यता व विविध कामे झाली असली, तरी येत्या दोन वर्षांत महत्त्वाची कामे गतीने करणार आहे. औद्योगिक प्रश्न असो की रस्ते महामार्गाचे प्रश्न, त्यासाठी खासदारांबरोबर प्रयत्न केले व त्याला चालनाही मिळाली.
-राजाभाऊ वाजे, आमदार, सिन्नर
--
विरोधक म्हणतात...
--
लोकाभिमुख कामांची वानवा
--
लोकांमध्ये राहणे म्हणजे लोकाभिमुख कामे केली असे होत नाही. त्यासाठी लोकांची कामे करणे गरजेचे आहे. पिण्याच्या पाण्याची एकही योजना सुरू नाही. जलयुक्त शिवारात जेथे कामे केली तेथे पाऊसच पडला नाही. माझ्या काळात ज्या योजना सुरू केल्या त्यांचा पाठपुरावा करून त्या सुरू करणे आवश्यक होते. त्यातून पाण्याचा प्रश्न सुटला असता. पण, त्याचा पाठपुरावा केला नाही. जलयुक्त शिवारातील कामातही गैरव्यवहार झाला. एकाच कामाचे बिल वेगवेगळ्या ठिकाणी काढल्याची तक्रार मी करणार आहे. पाऊस चांगला झाल्यामुळे टँकरमुक्ती झाली असली, तरी ती तात्पुरती आहे. रस्त्यांच्या प्रश्नांबरोबरच विविध समस्या मतदारसंघात आहे. तीन वर्षांत त्यात काही बदल झाला नाही. सिन्नर नगरपालिकेत शिवसेनेची सत्ता आहे. त्यातही प्रश्न सोडविण्यात अपयश आले. सिन्नर उपजिल्हा रुग्णालयाचे कामही केवळ ठेकेदाराने पाठपुरावा केल्यामुळेच पूर्ण होत आहे.
-माणिकराव कोकाटे, माजी आमदार
---
शब्दांकन ः गौतम संचेती
मोबाइल अॅप डाउनलोड करा आणि राहा अपडेट
