आमदारांचे प्रगतिपुस्तक
--
मतदारसंघ ः मालेगाव बाह्य
--
स्वच्छ प्रतिमा कायम, मंत्रिपदाचा प्रभाव नाही!
--
राज्य मंत्रिमंडळात नाशिकचे प्रतिनिधीत्व करणारे ग्रामविकासमंत्री दादा भुसे यांना गेल्या तीन वर्षांत मतदारसंघासोबतच जिल्ह्यातही मंत्रिपदाची छाप पाडण्यात अपयश आले आहे. विकासासाठी मतदारांनी सलग तीन वेळा आमदारकीची संधी दिली असली, तरी विकासापासून मतदारसंघ कोसो दूर आहे. स्वतंत्र जिल्हानिर्मितीचे घोंगडे अजूनही भिजत पडले असले, तरी शेती महामंडळाची जमीन उद्योगांसाठी खुली केल्याने रोजगाराला मात्र चालना मिळणार आहे. सोबतच शेतकऱ्यांसाठी आक्रमक व जनसामान्यांचा नेता अशी प्रतिमा मात्र त्यांनी आजही कायम ठेवली असून, भ्रष्टाचाराचा डाग त्यांनी अद्याप लागू दिलेला नाही. त्यामुळे स्वच्छ प्रतिमा आजही कायम आहे. मंत्रिपद मिळाल्यापासून मतदारसंघातील रस्ते, वीज, पाणी, रोजगार, शेती आदी प्रश्न सोडविण्यासाठी सातत्याने प्रयत्नशील असल्याचा दावा भुसेंनी केला आहे. मंत्रिपदाच्या कार्यकाळात मालेगाव शहरासह तालुक्यातील शेती व पिण्याचा पाण्याची तहान मात्र त्यांनी भागवली आहे.
विकासाला प्राधान्याचा निर्धार
मालेगाव तालुक्याच्या राजकीय इतिहासातील हिरे घराण्याची मक्तेदारी मोडीत काढत भुसे यांनी २००४ मध्ये पहिल्यांदा विजय मिळविला. दांडगा जनसंपर्क, कार्यकर्त्यांची फळी, जनतेशी थेट संवाद, मजबूत पक्षबांधणी या त्यांच्या वैशिष्ट्यांमुळे ते लोकप्रिय आमदार म्हणून ओळखले जाऊ लागले. शिवसेनेच्या २० टक्के राजकारण व ८० टक्के समाजकारण तत्त्वानुसार वाटचाल करीत असताना मतदारसंघाच्या विकासाचे प्रश्न सोडवण्याला त्यांनी प्राधान्य दिले आहे. २०१४ च्या मोदी लाटेतसुद्धा त्यांनी मतदारसंघात शिवसेनेला यश मिळवून दिल्याने मतदार आजही त्यांच्या पाठीशी असल्याचे सिद्ध झाले. गेल्या काही निवडणुकांमध्ये शिवसेनेला अपेक्षित यश मिळालेले नसल्याने भुसे यांना धक्का बसला असला, तरी विकासाला प्राधान्य देण्याचा निर्धार त्यांनी केला आहे.
--
रोजगारनिर्मितीसाठी पुढाकार
मालेगाव बाह्य मतदारसंघातील मतदारांनी सलग तीन पंचवार्षिकांत दादा भुसे यांना संधी दिली असून, यावेळी युतीच्या शासनात त्यांना आधी सहकार व आता ग्रामविकास राज्यमंत्रिपद मिळाल्याने मालेगावकरांच्या विकासाच्या अपेक्षांच्या पूर्तीसाठी त्यांनी तीन वर्षे पाठपुरावा केला आहे. त्यांच्या या पाठपुराव्याला मंत्रिपद मिळाल्यापासून मोठ्या प्रमाणत यश आले असून, मतदारसंघातील रस्ते, वीज, पाणी, रोजगार, शेती आदी प्रश्न सोडविण्यासाठी ते सातत्याने प्रयत्नशील आहेत. अगदी अलीकडच्या काळात शेती महामंडळाची ८६३ एकर जमीन औद्यगिक वसाहतीसाठी मिळविण्यात यश आल्याने रोजगारनिर्मितीच्या दृष्टीने मोठे काम सुरू झाले आहे. नर्सिंग कॉलेजच्या भव्य इमारतीचेदेखील उद्घाटन झाले असून, ग्रामीण भागातील विद्यार्थ्यांना शिक्षणाची संधी उपलब्ध झाली आहे.
आरोग्य, रस्ते पाणीप्रश्नाचा पाठपुरावा
महिला व बालकांच्या आरोग्याचा प्रश्न सोडविण्यासाठी सटाणारोडवर रुग्णालयास मंजुरी मिळविण्यातही यश आले आहे. तालुक्यातील गिरणा-मोसम खोऱ्यातील पाण्याचा शेती व पिण्यासाठी उपयोग व्हावा यादृष्टीने गिरणा नदीवर पाच, तर मोसम नदीवर चार कोल्हापूर बंधारे बांधण्यात आले आहेत. शहराला पाणीपुरवठा करणाऱ्या तळवाडे साठवण तलावाच्या रुंदीकरणाचे काम पूर्ण झाल्याने शहरासह दाभाडी गावाचा पिण्याचा पाण्याचा प्रश्न मार्गी लागला आहे. ग्रामीण भागाला शहरासोबत जोडण्याच्या दृष्टीने मुख्यमंत्री ग्रामसडक योजनेद्वारे तालुक्यात १५ कोटींचा निधी मिळवून दिला आहे. मालेगाव बाह्यचे प्रतिनिधीत्व करीत असतानादेखील शहराच्या दृष्टीने हद्दवाढ भागासाठी १५ कोटींच्या निधीस मंजुरी मिळविली आहे. तालुक्यातील गाळणे, रोकडोबा तीर्थक्षेत्रांना ब वर्ग दर्जा प्राप्त करून देत त्यांच्या विकासाठी निधी मिळविण्यात यश आले आहे.
--
या प्रश्नांकडे दुर्लक्ष
तीन वर्षांत मतदारसंघातील विकासकामांसंदर्भात स्थानिकांची अपेक्षापूर्ती करीत असताना आगामी दोन वर्षांत प्रामुख्याने मालेगाव जिल्हानिर्मितीचा प्रश्न मार्गी लावण्यासाठी भुसे यांना कसोशीने प्रयत्न करावे लागणार आहेत. त्यासोबतच पश्चिम भागातील औद्योगिक वसाहतीत उद्योग-व्यवसायांची उभारणी, ग्रामीण भागातील गोरगरीब जनतेची अतिक्रमणे नियमित करणे, कृषी प्रक्रिया उद्योग प्रकल्प उभारणी हे प्रश्न येणाऱ्या काळात सोडविण्यावर त्यांचा भर राहणार आहे.
--
विधिमंडळ कामकाजात सहभाग
राज्यमंत्री भुसे विधिमंडळ कामकाजातदेखील सातत्याने सहभागी होत विकासाचे प्रश्न मार्गी लावण्यासाठी प्रयत्नशील आहेत. मागील दोन पंचवार्षिकांत विरोधी पक्षात असतानादेखील विकासकामांसाठी पाठपुरावा करीत राहिल्याने आता राज्यमंत्रिपदी वर्णी लागल्यापासून भुसे यांनी विकासकामे मार्गी लावण्यास प्राधान्य दिले आहे. आमदारनिधी व्यतिरिक्तदेखील अनेक विकासकामे त्यांनी केली आहेत.
--
मार्गी लावलेली कामे
--
-ग्रामसडक योजनेंतर्गत १५ कोटींचे रस्ते
-मालेगाव शहरासाठी १५ कोटींचा निधी
-शेती महामंडळाची ८६३ एकर जमीन एमआयडीसीसाठी खुली
-नर्सिंग कॉलेजचा प्रारंभ
-गिरणा व मोसम नदीवर केटीवेअर बंधारे
-गाळणे, रोकडोबा तीर्थक्षेत्रांना ब वर्ग दर्जा
-दाभाडीत पिण्याच्या पाण्याचा प्रश्न मार्गी
--
मंत्रिमहोदय म्हणतात...
योजना मंजुरीसाठी पाठपुरावा
गेल्या तीन वर्षांत मतदारसंघातील विकासाची कामे मार्गी लागावीत यासाठी प्रामाणिकपणे प्रयत्न करीत आहे. ग्रामविकास खात्याचा राज्यमंत्री या नात्याने विभागामार्फत विविध योजना मंजूर करण्यासाठी पाठपुरावा सुरू आहे. तालुक्यातील रस्ते, वीज, पाणी, शिक्षणाचे बहुतांश प्रश्न मार्गी लागले आहेत. येणाऱ्या काळात जिल्हानिर्मिती, शेतीच्या पाण्याचा प्रश्न आदी कामांना प्राधान्य असेल.
-दादा भुसे, ग्रामविकास राज्यमंत्री
--
विरोधक म्हणतात...
ठोस विकासकामे नाहीतच
आजवर केवळ हिरे घराण्याविरोधात प्रचार करीत दादा भुसे यांनी राजकारण केले आहे. गेली १५ वर्षे ते परिसराचे लोकप्रतिनिधी आहेत. मात्र, मतदारसंघात ठोस अशी विकासकामे झालेली नाहीत. तालुक्याचा पाणीप्रश्न, जिल्हानिर्मितीचा प्रश्न, प्रत्यक्ष रोजगारनिर्मितीचा प्रश्न आदी अद्यापदेखील प्रलंबित आहेत. तालुक्यातील पाणीपुरवठा योजनांची कामे केंद्राच्या योजनेतून झाली आहेत. त्यामुळे केवळ जनतेची सहानुभूती मिळवून विकास होत नाही, हे आता सिद्ध झाले आहे.
-पवन ठाकरे, पदाधिकारी, भाजप
--
शब्दांकन ः तुषार देसले
०००
मतदारसंघ ः देवळाली
--
रस्तेकामात फर्स्टक्लास, तरीही काठावरच पास!
--
माजी मंत्री बबनराव घोलप यांचा राजकीय वारसा लाभलेल्या आमदार योगेश घोलप यांना तीन वर्षांत सत्तेत असूनही फार काही छाप पाडता आलेली नाही. राजकारणाचे बाळकडू घरातच मिळाल्याने, तसेच पदार्पणातच आमदारकीची संधी लाभल्याने त्यांच्याकडून मोठ्या अपेक्षा होत्या. परंतु, भाजप-शिवसेनेतील सवतासुभ्याचा फटका त्यांनाही बसला असून, निधीसाठी पाठपुरावा करूनही शासनदरबारी त्यांची उपेक्षा झाली आहे. मात्र, असे असले, तरी देवळाली मतदारसंघातील रस्ते, क्रीडांगणे आणि प्राथमिक सुविधांसाठी निधी आणण्यात त्यांना बऱ्यापैकी यश मिळाले आहे. परंतु, शिक्षण, रोजगार, आरोग्याशी निगडित या मतदारसंघातील मुख्य प्रश्न जैसे थे असल्याचे उघड झाले आहे. त्यामुळे विरोधकांनीही आमदार योगेश घोलप यांच्या गुणपत्रकावर काठावर पास असा शिक्का मारला आहे.
देवळाली मतदारसंघावर गेल्या सहा पंचवार्षिकांपासून घोलप कुटुंबीयांचे वर्चस्व आहे. गेल्या वेळच्या निवडणुकीवेळी माजी मंत्री बबनराव घोलप भ्रष्टाचाराच्या प्रकरणात दोषी आढळून आल्यानंतर त्यांना निवडणूक लढविण्यावर बंदी आली. त्यामुळे त्यांनी ऐनवेळी पुत्र योगेश घोलप यांना पक्षप्रमुखांकडून उमेदवारी मिळविली. या खेळीत त्यांना यशही मिळाले. तब्बल ४९ हजार ७५१ इतके मताधिक्य मिळवून योगेश घोलप विधानसभेची निवडणूक जिंकले.
रस्त्यांसह मूलभूत प्रश्नांची सोडवणूक
आमदार योगेश घोलप यांनी विजयानंतर मतदारसंघातील सर्व ६६ गावांतील समस्यांवर लक्ष केंद्रित केले. रस्त्यांची अवस्था बिकट असल्याने त्यांनी गेल्या तीन वर्षांत रस्तेविकासासाठी तब्बल २७ कोटी रुपयांचा निधी खर्च केला. पर्यटन खात्यांतर्गत ३ कोटी, तर व्यायामशाळा, सभामंडप, भूमिगत गटारी, स्मशानभूमी विकासकामांसाठीही त्यांनी सुमारे एक कोटी रुपयांचा निधी वापरला आहे. मतदारसंघातील शहरी भागात स्वखर्चाने सीसीटीव्ही कॅमेरे बसविणे, गिरणारे पाणीपुरवठा योजना मंजुरी आदी कामे त्यांनी मार्गी लावली आहेत.
--
पर्यटन, दलित वस्तीचा विकास
एकलहरे दलित वस्तीचा डॉ. बाबासाहेब आंबेडकरांच्या १२५ व्या जयंतीनिमित्त स्मार्ट दलित वस्ती विकास योजनेत समावेश, सामनगाव व एकलहरे येथे पर्यटन केंद्र विकसित करणे अादी कामे त्यांनी मार्गी लावली आहेत. मात्र, राजकीय वारसा बघता देवळाली मतदारसंघात विकासकामांचा पाऊस पडणे अपेक्षित होते. मात्र, तसे झालेले नाही. अजूनही या मतदारसंघातील दुर्गम भागातील गावे विकासापासून वंचितच आहेत. विकासाची तृष्णा वर्षानुवर्षे वाढतच आहे. देवळाली मतदारसंघ नाशिक शहराला लागून असल्याने या मतदारसंघातील बहुतेक गावे नाशिकमधीलच मूलभूत सोयी-सुविधांवर अवलंबून असतात. त्यामुळे देवळाली मतदारसंघातील समस्या ठळकपणे जाणवत नाहीत.
वीज, विद्यार्थ्यांच्या प्रश्नांवर आंदोलने
गेल्या तीन वर्षांत वीजपुरवठा व शालेय विद्यार्थी बस वाहतूक या मागण्यांसाठी आमदार घोलप रस्त्यावर उतरल्याचे दिसले. मात्र, शेतकरी संपावेळी त्यांनी शेतकऱ्यांच्या प्रश्नांकडे सपशेल पाठ फिरविली. असे असले, तरी लहान मुलांच्या वाढदिवसापासून सुख-दुःखाच्या प्रसंगी आमदार घोलप कार्यकर्त्यांच्या घरी हजेरी लावत असल्याने त्यांनी जनसंपर्क टिकवून ठेवला आहे. एकलहरे येथील प्रस्तावित ६६० मेगावॅटचा वीजनिर्मिती प्रकल्प सुरू करणे, नाशिक-पुणे महामार्ग ते ‘नासाका’दरम्यानच्या रस्त्याचे डांबरीकरण करणे, लोडशेडिंगची वेळ शेतकऱ्यांच्या दृष्टीने अनुकूल करवून घेणे, नासाका सुरू करणे आदी आव्हाने त्यांच्यासमोर येत्या दोन वर्षांत आहेत.
--
या प्रश्नांकडे दुर्लक्ष
देवळाली मतदारसंघातील वालदेवी धरण प्रकल्पग्रस्तांच्या मागण्या अद्यापही पूर्ण झालेल्या नाहीत. एकलहरेतील प्रस्तावित ६६० मेगावॅटच्या वीजनिर्मिती प्रकल्पाला गती मिळालेली नाही. मतदारसंघातील नासाका गेल्या चार वर्षांपासून बंद आहे. नाशिक-पुणे महामार्गाच्या कामाला झालेला विलंब. एकलहरे प्रकल्पग्रस्त व प्रदूषणाने हैराण झालेल्या शेतकऱ्यांचा प्रश्न जैसे थे आहे. आर्टिलरी सेंटरमुळे बांधकामांवर आलेले निर्बंध कायम आहेत. मतदारसंघातील काही गावांतील शेतजमिनी अद्यापही एका देवस्थानाच्या ताब्यात आहेत. त्यामुळे संबंधित शेतकरी त्रस्त झालेले आहेत. मतदारसंघात वीजपुरवठ्याचा प्रश्नही रखडला आहे. या मतदारसंघातील दुर्गम भागात बिबट्याचा मुक्त संचार असून, त्यासंदर्भात उपाययोजनांचा अभाव दिसतो.
--
विधिमंडळ कामकाजात सहभाग
एकलहरेतील प्रस्तावित वीजनिर्मिती प्रकल्प मार्गी लावण्यासाठी आमदार घोलप यांनी विधानसभेत आवाज उठवून ऊर्जामंत्र्यांना शब्द देण्यास भाग पाडले. कळवण तालुक्यातील बनावट सेंद्रिय खतविक्री, महिरावणी आश्रमशाळा मान्यता रद्द, आदिवासी आयुक्तालयाच्या आश्रमशाळांतील विद्यार्थ्यांच्या असुविधा, सिन्नर तालुक्यातील कनकोरी ग्रामपंचायतीतील हरियाली योजनेतील गैरव्यवहार, रुग्णालयाचा गुदाम म्हणून झालेला वापर, जुने नाशिकमधील जुन्या वाड्यांचा प्रश्न, गोदावरी नदी प्रदूषण, धरणांची प्रलंबित कामे यांसारख्या विषयांवर त्यांनी सभागृहाचे लक्ष वेधले आहे.
--
मार्गी लावलेली कामे
-रस्तेकामांसाठी २७ कोटी १६ लाख रुपये खर्च
-पर्यटन विकासासाठी ३ कोटी रुपये निधी
-पायाभूत सुविधांसाठी ८४ लाख रुपये निधी
-स्मार्ट दलित योजनेसाठी प्रयत्न
-गिरणारे पाणीपुरवठा योजनेला मंजुरी
--
आमदार म्हणतात...
विकासकामांबाबत समाधानी
देवळाली मतदारसंघात रस्तेविकासासाठी सर्वांत जास्त निधी मिळविला आहे. या मतदारसंघातील एकलहरे येथील प्रस्तावित ६६० मेगावॅट वीजनिर्मिती प्रकल्पाचे काम मार्गी लावण्यासाठी प्रयत्न सुरू आहेत. परंतु, राज्य सरकार सकारात्मक नाही. नाशिक सहकारी साखर कारखाना माझ्या मतदारसंघात असूनही हा कारखाना सुरू करण्यासाठीच्या नियोजनात मला डावलण्यात आले. कारखाना सुरू करण्याचे श्रेय लाटण्यासाठी राजकारण झाल्याने हा प्रश्न मार्गी लागला नाही. माझ्या दृष्टीने ऊस उत्पादक शेतकरी व कामगारांचे हित महत्त्वाचे आहे. मतदारसंघात झालेल्या विकासकामांबाबत समाधानी असून, उर्वरित काळात जनतेच्या गरजेनुसार विकासकामे सुरूच ठेवणार आहे.
-योगेश घोलप, आमदार, देवळाली
--
विरोधक म्हणतात...
बॅकलॉग भरून काढण्यात अपयश
विधानसभेच्या २०१४ मध्ये झालेल्या निवडणुकीत देवळाली मतदारसंघातील मतदारांना दिलेली आश्वासने पूर्ण करण्यात विद्यमान आमदार सपशेल अपयशी ठरले आहेत. मतदारसंघाच्या विकासासाठी आवश्यक असलेल्या दूरदृष्टीचा त्यांच्याकडे अभाव असल्याने देवळाली मतदारसंघात त्यांच्या कामकाजाबाबत सामान्य जनतेत संताप आहे. देवळाली मतदारसंघातील विकासकामांचा बॅकलॉग भरून काढण्यात आमदारांना अपयश आले असून, त्यांना काठावर पास होण्याइतकेही गुण देता येणार नाहीत.
-रामदास सदाफुले, पदाधिकारी, भाजप
---
शब्दांकन ः नवनाथ वाकचौरे
मोबाइल अॅप डाउनलोड करा आणि राहा अपडेट
