सध्याची आर्थिक स्थिती लक्षात घेता मनपाने महसूल वाढीसाठी विविध उपाययोजना हाती घेतल्या असून, थकबाकी वसुलीसाठी आता थेट पाणीपुरवठा खंड‌ित करण्याची कारवाई सुरू केली आहे. मालमत्ता थकबाकीदारावर कारवाई केल्यानंतर पाणीपट्टी थकवणाऱ्यांकडे कारवाईचा मोर्चा पालिकेने वळवला आहे. सूचनापत्र व अंतिम नोटिसा देऊनही थकबाकी न भरणाऱ्या १३१ जणांचे नळकनेक्शन बंद करण्यात आले आहेत. ही कारवाई आता सुरूच राहणार असल्याने थकबाकीदारांचे धाबे दणाणले आहे.
शहराची स्मार्ट सिटीकडे वाटचाल सुरू असल्याने या योजनेच्या कामांसह शहरातील विविध विकासकामे, मनपाचा प्रशासकीय खर्च भागविण्यासाठी निधीची चणचण भासत आहे. राज्य सरकारकडून मिळणारा निधी आणि मालमत्ता कर आणि पाणीपट्टीतूनच महापालिकेला मोठा निधी मिळत आहे. यामुळे आता प्रशासनाने पाणीपट्टी व मालमत्ताकरावरच्या वसुलीवर भर देण्याचे प्रयत्न सुरू केले आहेत. महापालिकेने मालमत्ता कर वसुली पाठोपाठ पाणीपट्टीपोटी थकबाकीदार असलेल्या ६५ हजार मालमत्ताधारकांचे नळकनेक्शन तोडण्यासाठी मोहीम हाती घेतली आहे. या थकबाकीदारांकडे जवळपास १४ कोटींची थकबाकी आहे. या थकबाकीदारांना नोटीस दिल्यानंतर त्यातील २५ हजार थकबाकीदारांकडून साडेसात कोटींची वसुली मनपाने केली आहे. गेल्या महिन्यापासून यासंदर्भातील कारवाई केली जात आहे. त्यात आतापर्यंत २५ हजार नळकनेक्शनधारकांनी मनपाच्या कारवाईच्या भीतीपोटी थकबाकी भरली असून, ही रक्कम सात ८० लाखांच्या वर गेली आहे. तीन दिवसांपासून या थकबाकीदारांचे नळकनेक्शन तोडण्याची कारवाई सुरू केली आहे. त्याअंतर्गत तीन दिवसांत शहरातील १३१ पाणीपट्टी थकबाकीदारांचे नळकनेक्शन तोडण्यात आले आहे. पालिकेने सुरू केलेल्या या कारवाईने थकबाकीदारांचे धाबे दणाणले आहे.
मोबाइल अॅप डाउनलोड करा आणि राहा अपडेट
