वाट स्वच्छ आरोग्याची
मटा मालिका भाग ८
ठिकाण ः बिटको कॉलेज
--
अपुऱ्या स्वच्छतागृहांची दयनीय अवस्था
टीम मटा
नाशिकरोड परिसरातील गोखले एज्युकेशन सोसायटीच्या बिटको कॉलेज कॅम्पसमध्ये स्वच्छतागृहे व प्रसाधनगृहांची अवस्था बिकट आहे. स्वच्छतागृहे विद्यार्थिनींच्या संख्येच्या तुलनेत पुरेशी नाहीत. त्यामुळे विद्यार्थ्यांच्या आरोग्याचा प्रश्न निर्माण झाला आहे. त्याशिवाय नियमित स्वच्छता आणि सॅनिटरी नॅपकिन वेंडिंग मशिनचीही येथे वानवा आहे.
--
नाशिकरोड येथे चांडक-बिटको कॉलेज हे नाशिकरोडचे सर्वांत मोठे कॉलेज आहे. गोखले एज्युकेशन सोसायटीचे हे कॉलेज असून, ज्युनिअर कॉलेजमध्ये तीन हजार, तर सीनिअर कॉलेजमध्ये साडेचार हजार असे सुमारे साडेसात हजार विद्यार्थी येथे आहेत. यात विद्यार्थिनींची संख्या निम्म्याहून अधिक आहे. याच संस्थेचे शेजारी कोठारी मॅनेजमेंट इन्स्टिट्यूट व एम. एस. गोसावी पॉलिटेक्निक कॉलेज आहे.
--
पुरेशा स्वच्छतेचा अभाव
बिटको कॉलेजात नाशिकरोड, विहितगाव उपनगर, जेलरोड, दसक, सामनगाव, एकलहरे, देवळाली कॅम्प परिसराबरोबरच शिंदे, पळसे, भगूर, लहवित, सिन्नर असे शहरी व ग्रामीण भागातील विद्यार्थी शिक्षण घेतात. येथे विद्यार्थी व विद्यार्थिनींसाठी स्वच्छतागृहे असली, तरी त्यांची संख्या विद्यार्थ्यांच्या मानाने अपुरी असल्याचे विद्यार्थ्यांचे म्हणणे आहे. विद्यार्थिनींशी संवाद साधला असता स्वच्छतागृहांची दुरवस्था झाल्याचे त्यांनी सांगितले. मुलींसाठी एक टायलेट रूम आहे. स्वच्छतागृहांची नियमित स्वच्छता केली जात नाही. काही वेळा येथे पाणी असते, तर काही वेळा नसते. अस्वच्छ स्वच्छतागृहांमुळे विद्यार्थिनींचे आरोग्य धोक्यात आले आहे. कोठारी मॅनेजमेंट, गोसावी पॉलिटेक्निक, बीबीए इमारतीत स्वतंत्र स्वच्छतागृहे आहेत. मात्र, त्यांची अवस्था फारशी समाधानकारक नसल्याचे विद्यार्थिनींचे म्हणणे आहे. ‘नॅक’च्या पार्श्वमूमीवर बिटकोमध्ये नवीन स्वच्छतागृह बांधावे, अशी अपेक्षा त्यांनी व्यक्त केली आहे.
--
महिला कॉलेजात कमोडच नाही
नाशिकरोडला फक्त महिलांसाठी असलेले एकमेव कॉलेज म्हणजे बिंदू रामराव देशमुख महिला कॉलेज होय. येथे कनिष्ठ आरंभ कॉलेज, तर वरिष्ठ महिला कॉलेज अशी स्वतंत्र कॉलेजेस आहेत. अकरावी-बारावीसाठी आरंभ कॉलेज असून, त्यामध्ये मुलींबरोबरच मुलांनाही प्रवेश आहे. महिला कॉलेजमध्ये एफवाय ते पदव्युत्तरपर्यंत शिक्षण दिले जाते. येथे फक्त मुली आहेत. आरंभ कॉलेजमध्ये दोन हजार विद्यार्थी असून, महिला कॉलेजात साडेनऊशे विद्यार्थिनी आहेत. शिंदे, पळसे, लहवित, वडनेर, नायगाव, मनमाड, विंचूर, एकलहरे, देवळाली कॅम्प, चेहेडी, जेलरोड, उपनगर येथून विद्यार्थिनी महिला कॉलेजात शिक्षणासाठी येतात. येथे अपंग विद्यार्थिनींसाठी कमोडची सुविधा नाही
--
जागेची अडचण
महिला कॉलेजात एकच स्वच्छतागृह असून, त्यात पाच भांडी आहेत. त्यांची नियमित स्वच्छता केली जाते, असा व्यवस्थापनाचा दावा आहे. मात्र, विद्यार्थिनींच्या तक्रारी आहेत. स्वच्छतागृहांची निगा नियमित राखावी, पाण्याची पुरेशी व्यवस्था करावी, स्वच्छतागृहांची संख्या वाढवावी, अशी विद्यार्थिनींची मागणी आहे. ठेकेदार स्वच्छतेचे काम व्यवस्थित करत नाही. कॉलेज प्रशासनाचे म्हणणे असे, की मुलींसाठी स्वच्छतागृहांची संख्या वाढविण्याची इच्छा आहे. परंतु, जागेची टंचाई आहे. जागा उपलब्ध झाल्यास स्वच्छतागृहांची संख्या वाढविता येईल.
--
बिटको कॉलेजात चार हजारांवर विद्यार्थी आहेत. त्यामध्ये विद्यार्थिनींचे प्रमाण लक्षणीय आहे. त्यांच्या तुलनेत स्वच्छतागृहे अपुरी पडत आहेत. ही संख्या तातडीने वाढविण्याची गरज आहे. स्वच्छतागृहांची नियमित स्वच्छता करावी.
-ऋतुजा आचार्य, विद्यार्थिनी
--
बिटको कॉलेजमध्ये ग्रामीण भागातून विद्यार्थिनी शिकण्यासाठी येतात. विद्यार्थिनींसाठी नाशिकरोडला सार्वजनिक स्वच्छतागृहे नाहीत. त्यामुळे मुलींची भिस्त कॉलेजातील स्वच्छतागृहांवर आहे. येथे संख्या कमी असल्यामुळे गर्दी होते. तरी स्वच्छतागृहांची संख्या वाढवावी.
-गायत्री शिंदे, विद्यार्थिनी
--
आरंभ कॉलेजमध्ये विद्यार्थिनींसाठी नवीन स्वच्छतागृहांची अत्यंत गरज आहे. सध्याची स्वच्छतागृहे स्वच्छ नाहीत. त्यामुळे आरोग्याचा प्रश्न निर्माण झाला आहे. संस्थेने त्वरित नवीन स्वच्छतागृह बांधावे, जेणेकरून हा प्रश्न निकाली निघेल.
-पूजा शिंदे, विद्यार्थिनी
--
संस्थेचे पदाधिकारी म्हणतात...
गोखले एज्युकेशन सोसायटीच्या पदाधिकाऱ्यांशी संपर्क साधला असता त्यांनी सांगितले, की बिटको कॉलेजमधील विद्यार्थिनींसाठी पुरेशी स्वच्छतागृहे आहेत. त्यांची नियमितपणे स्वच्छता केली जाते. विद्यार्थिनींच्या आरोग्याला बाधा होणार नाही याची काळजी घेतली जाते. काही समस्या असतील तर त्या दूर केल्या जातील. विद्यार्थिनींनी यासंदर्भात प्राचार्यांशी संपर्क साधावा. विद्यार्थिनींच्या आरोग्याला आमचे पहिले प्राधान्य आहे.
मोबाइल अॅप डाउनलोड करा आणि राहा अपडेट
