येथील उड्डाणपुलाखालील नवले चाळीत विषारी साप व नागांची घुसखोरी सुरू झाल्यामुळे नागरिक भयभीत झाले आहेत. गेल्या आठ दिवसांत सर्पमित्रांच्या मदतीने येथून सुमारे दहा साप पकडून निसर्गात सोडून देण्यात आले आहेत. परिसरातील गवत साफ करून सापांचा बंदोबस्त करण्याची मागणी नागरिकांनी केली आहे.
प्रेस मेनगटजवळील प्रेसच्या मालकीच्या साडेतीन एकर जागेवर गवताचे साम्राज्य पसरले आहे. त्यामुळेच सापांचा वावर वाढल्याची रहिवाशांची तक्रार आहे. नाशिक-पुणे मार्गावर प्रेस मेनगेटवर पूर्वी प्रेस कामगारांसाठी चाळी होत्या. नेहरूनगरला वसाहत झाल्यानंतर या चाळी हटविण्यात आल्या. प्रेसचे महामंडळात रुपांतर झाल्यानंतर येथे मैदान तयार करण्यात आले. या मैदानावर २०११ पर्यंत प्रेसच्या खेळाडूंसाठी इनडोअर स्टेडियम तयार करण्याचे नियोजन होते. महामंडळाचे तत्कालीन अध्यक्ष एस. एस. राणा यांच्या हस्ते भूमिपूजनही झाले. त्यानंतर मैदानाकडे दुर्लक्ष करण्यात आले. प्रेस कामगारांतर्फे गणेशोत्सव, सभा, संमेलन व करमणूक कार्यक्रम नाशिकरोड पोलिस ठाण्याशेजारील मैदानात साजरे केले जातात.
पूर्वेकडील नवले चाळीकडील भागात आता पाच-सहा फूट उंचीचे गवत व काटेरी झुडपे उगवली आहेत. येथे अस्वच्छताही पसरली असून, त्यामुळे सापांचा वावर वाढला आहे. हे साप नवले चाळीतील नागरिकांच्या घरात घुसखोरी करत आहेत. जवळच पोलिस लाइन, शासकीय चतुर्थ श्रेणी कर्मचाऱ्यांची वसाहत आहे. त्यांच्याही घरात सापांचा शिरकाव वाढला आहे.
--
मैदानाची करावी स्वच्छता
या मैदानातील काटेरी झुडपे, गवत काढून साफसफाई करावी, कचरा हटवावा व मैदान स्वच्छ ठेवावे, अशी मागणी नागरिकांनी प्रेसकडे केली आहे. परंतु, कार्यवाही झालेली नाही. प्रेस प्रशासनाच्या दुर्लक्षामुळेच सापांची समस्या निर्माण झाल्याची त्यांची तक्रार आहे. प्रेसने या मैदानाची साफसफाई करून स्टेडियम उभारावे, अशी मागणी गवळी समाजाचे अध्यक्ष जगन गवळी, दीपक नागमोती, महेश कोळसे पाटील, प्रकाश सानप, अशोक नेहे आदी रहिवाशांनी केली आहे.
--
नाशिकरोड प्रेस व्यवस्थापनाने नवले चाळीशेजारील आपल्या मालकीच्या साडेतीन एकर जमिनीची स्वच्छता करावी, गवत व काटेरी झुडपे काढावीत. विषारी सापांचा नवले चाळीतील रहिवाशांना दंश होण्याआधीच ही कार्यवाही त्वरित करावी. अन्यथा आंदोलन छेडण्यात येईल.
-जगन गवळी, स्थानिक रहिवासी
मोबाइल अॅप डाउनलोड करा आणि राहा अपडेट
