म. टा. वृत्तसेवा, सिन्नर फाटा
रोखीने शालेय फी भरली नाही म्हणून दोन चिमुकल्या विद्यार्थिनींना एका स्वतंत्र वर्गात दिवसभर कोंडून ठेवण्याची शिक्षा करण्याचा प्रकार जेलरोडवरील होली फ्लॉवर इंग्लिश स्कूलमध्ये घडला आहे. या प्रकाराबद्दल वैभव एकनाथ ताकटे (रा.जगतापमळा, नाशिकरोड) या पालकाने उपनगर पोलिस ठाण्यात शाळेविरोधात तक्रारही केली आहे. शाळेच्या अमानवी वागणुकीमुळे संबंधित पालकाच्या मुलींनी आता शाळेत जाण्यासही नकार दिला आहे.
इंग्रजी माध्यमांच्या शाळांकडून विद्यार्थ्यांना फीच्या वसुलीसाठी शारीरिक शिक्षा करण्यासोबतच मानसिक त्रास देण्याचे प्रकार यापूर्वीही शहरात घडले आहेत. त्याचाच कित्ता जेलरोडच्या होली फ्लॉवर इंग्लिश मीडियम स्कूल या शाळेकडूनही गिरवला आहे. पालकाने पोलिसांत तक्रार करून या प्रकाराला वाचा फोडली आहे. इतरही काही विद्यार्थ्यांच्या
बाबतीत हा प्रकार घडला असून, पाल्यांच्या शैक्षणिक भवितव्याच्या दृष्टीने कोणीही पालक या शाळेच्या विरोधात तक्रार करण्यास धजावत नसल्याचीही माहिती पुढे आली आहे. वैभव ताकटे यांनी शाळेची फी चेकद्वारे स्वीकारण्याची विनंती मुख्याध्यापिका सुप्रिया देव यांना केली होती. मात्र, त्यांनी या पालकाला रोख स्वरुपातच फी भरण्यास सांगितले. पालकाने शाळेची ही मागणी मान्य न केल्याने या पालकाच्या दुसरी व चौथीच्या वर्गात शिकणा-या दोन्ही मुलींना रेग्युलर वर्गात बसण्यास मनाई करून त्यांना एका स्वतंत्र वर्गात बसविण्यात आले. या वर्गात मुली पूर्णवेळ एकट्याच्या राहिल्याने त्या घाबरल्या असून, शाळेत जाण्यास नकार देत असल्याचे पालकाचे म्हणणे आहे. मुलींना शाळेत न पाठविण्याचा निरोप या शाळेने वाहनचालकामार्फत पालकांना दिला.
या प्रकाराची अधिकारी व केंद्र प्रमुखांमार्फत तात्काळ चौकशी केली जाईल. संबंधित विद्यार्थी शाळेतील त्यांच्याच वर्गात बसतील. चेकने फी स्वीकारणे कायदेशीरच आहे. संबंधित शाळेच्या मुख्याध्यापकांना कारणे दाखवा नोटीस बजावून त्याचा अहवाल शिक्षण उपसंचालक कार्यालयालाही पाठविला जाईल.
-नितीन उपासणी, शिक्षणाधिकारी, मनपा, नाशिक
रोख फी न भरल्याच्या कारणास्तव ज्या वर्गात शिक्षक नसतात तेथे माझ्या दोन्ही पाल्यांना वेगळ्या रुममध्ये बसवले जात आहे. न्याय मिळण्यासाठी या शाळेच्या गेटवर मी कुटूंबासह धरणे आंदोलन करणार आहे.
-वैभव ताकटे, पालक, होली फ्लॉवर स्कूल,
सध्या अठरा महिन्याची फी बाकी आहे. चेक बाऊन्सच्या कारणास्तव त्यांच्याकडून आता चेकद्वारे फी घेण्यास नकार दिला आहे. मात्र, फीच्या कारणास्तव त्यांच्या पाल्याला कोणत्याही स्वरुपाचा त्रास शाळेकडून दिलेला नाही.
- सुदीप देव, संस्थापक, होली फ्लॉवर स्कूल
मोबाइल अॅप डाउनलोड करा आणि राहा अपडेट
