शाश्वत सिंचन सुविधा निर्माण करण्यास प्रोत्साहन मिळावे यासाठी राज्य शासनाने २०१६ मध्ये मागेल त्याला शेततळे ही योजना सुरू केली. तालुक्यात गेल्या वर्षभरात ९८४ शेतकरी यासाठी पात्र ठरले असून, २६० हून अधिक शेतकऱ्यांचे शेततळे पूर्ण झाले आहे. यामुळे शेती सिंचनाचा प्रश्न मार्गी लागला आहे.
शेततळे करण्यासाठी रोजगार हमीद्वारे शेततळे, एनएचएम योजनेद्वारे शेततळे व मागेल त्याला शेततळे अशा योजना आहेत. यातील मागेल त्याला शेततळे योजनेचा तालुक्यातील अल्पभूधारक शेतकऱ्यांना लाभ होत आहे. तालुक्यातील १ हजार ४०१ शेतकऱ्यांनी या योजनेअंतर्गत आपले सरकार पोर्टलद्वारे शेततळ्यांसाठी नोंदणी केली होती. यानंतर कृषी विभागाकडून सर्वेक्षण करण्यात आले. मागेल त्याला शेततळे योजनेमुळे शेतकऱ्यांना खरीप हंगामासोबत रब्बी व उन्हाळी पिके घेणे देखील शक्य झाले आहे. तालुक्यातील शेतकऱ्यांना या योजनेचा लाभ मिळवून देण्यासाठी कृषी विभागाकडून प्रयत्न केले जात आहे.
सातमानेत ३६ शेततळे
मागेल त्याला शेततळे योजनेचा सर्वाधिक लाभ सातमाने गावातील शेतकऱ्यांनी घेतला आहे. या गावात एकूण ३६ शेतकऱ्यांना शेततळ्यांचा लाभ झाला असून, यामुळे गावातील शेतकरी समाधानी आहेत. सातमाने गावात झालेल्या ३६ शेततळ्यांमुळे भविष्यात शेतीचे उत्पादन वाढण्यास मदत होणार असून, शेतीसाठी पाण्याचा प्रश्न यामुळे बऱ्याच प्रमाणात मार्गी लागला आहे. त्यामुळे उत्पन्नातही वाढ झाली आहे.
अनुदान पडतेय कमी
मागेल त्याला शेततळे ही योजना अल्पभूधारक शेतकऱ्यांसाठी लाभदायक असली, तरी एका शेततळ्यासाठी दोन ते अडीच लाख इतका खर्च येत असताना शासनाकडून केवळ ५० हजार रुपये इतके अनुदान मिळते. त्यामुळे पदराचे काही पैसे यात ओतावे लागतात. प्रसंगी कर्जही काढावे लागते. हे अनुदान वाढून मिळाल्यास शेतकऱ्यांना त्याचा लाभ होईल, अशी मागणी शेतकरी करीत आहेत.
शेतीसाठी संरक्षित पाणी मिळावे यासाठी शेतकऱ्यांनी शेततळे करावे. पावसाची अनिश्च‌ितता दिवसेंदिवस वाढत असल्याने शाश्वत सिंचनाचा पर्याय म्हणून मागेल त्याला शेततळे या योजनेचा लाभ घ्यावा. पाण्याची उपलब्धता झाल्याने रब्बी, उन्हाळी पिकास मदत होईल.
- गोकुळ आहिरे,
तालुका कृषी अधिकारी, मालेगाव
मोबाइल अॅप डाउनलोड करा आणि राहा अपडेट
