टीम मटा
दत्त दिगंबरा या हो.. स्वामी मला भेट द्या हो… अशा आर्ततने दत्तचरणी लीन होत आणि श्रीपाद वल्लभ दिगंबराच्या नामघोषात शहर, परिसरात अवधूत चिंतन श्री गुरुदेव दत्तांची जयंती रविवारी भक्तिभावाने साजरी करण्यात आली. विविध धार्मिक कार्यक्रम, सामाजिक उपक्रम आणि महाप्रसादाच्या आस्वादाने भाविक कृतार्थ झाले. विविध मंदिरांत पहाटेपासूनच लागलेल्या रांगा रात्रीपर्यंत कायम असल्याचे दिसून आले.
---
एकमुखी दत्त मंदिरात रांगा
गोदाकाठावरील एकमुखी दत्त मंदिरात सकाळपासूनच दर्शनासाठी भाविकांच्या रांगा लागल्या होत्या. यावेळी सुवासिक फुलांची आकर्षक सजावट भाविकांचे लक्ष वेधून घेत होती. भाविकांना यावेळी लाडूच्या प्रसादाचे वाटप करण्यात आले. सायंकाळी सव्वासहाला मंदिरांमध्ये दत्तजन्माचा सोहळा पार पडला. एकमुखी दत्त मंदिरात १६ डिसेंबरपर्यंत धार्मिक कार्यक्रम सुरूच राहणार आहेत. त्यामध्ये दत्तयाग, श्री दत्त पूर्णाहुती, सत्यदत्त महापूजा व गोपालकाला यांसारखे कार्यक्रम होणार आहेत.
--
ठिकठिकाणच्या मंदिरांत चैतन्य
मार्गशीर्ष पौर्णिमेच्या दिवशी मृग नक्षत्रावर सायंकाळी दत्तांचा जन्म झाला म्हणून या दिवशी दत्तांचा जन्मोत्सव सर्वत्र साजरा करण्यात येतो. यंदाही दत्त जयंतीनिमित्त शहरातील विविध भागांमधील मंदिरांत धार्मिक कार्यक्रमांचे आयोजन करण्यात आले होते. त्यामुळे दत्त मंदिरांचा परिसर भक्तिरसाने भारून गेला होता. दत्त जयंतीपूर्वी सात दिवसांपासूनच अनेक ठिकाणी भाविकांनी गुरुचरित्राचे पारायण सुरू केले होते. पूर्ण आठवडा गुरुचरित्र सप्ताह म्हणून साजरा करण्यात आला. घरोघरी आणि मंदिरांमध्येदेखील गुरुचरित्राचे पारायण सुरू होते. या पारायणाची रविवारी सांगता झाली. विविध मंदिरात भजन, कीर्तन, अभिषेक, अभंगवाणी यांसारखे कार्यक्रम सुरू होते. ठिकठिकाणच्या दत्त मंदिरांमध्ये भाविकांना सुंठवड्याच्या प्रसादाचे वाटप करण्यात आले.
--
मैफल अन् रक्तदान शिबिर
इंदिरानगर परिसरातील जिल्हा परिषद कॉलनीतील दत्त मंदिरात श्रीपाद वल्लभ दिगंबरा या मैफलीचे आयोजन करण्यात आले होते. जास्वंदी ग्रुप आणि बागेश्री वाद्यवृंदातर्फे हा कार्यक्रम सादर करण्यात आला. पूजा घ्या आपुल्या चरणावर या श्री दत्तवंदनेने मैफलीला सुरुवात झाली. त्यानंतर गायिका मंजुळा ग्रामोपाध्याय, नीलिमा जोशी, मीना गटणे यांनी दत्त भजने सादर केली. येतील गुरुराजे, दत्ता श्री अवधुता, दत्त दिगंबर दैवत माझे, गुरुदत्त पाहिले कृष्णातीरी, आली हो पालखी स्वामींची अशी भावमधुर गीते यावेळी सादर करण्यात आली. दरम्यान, सिडकोतील त्रिमूर्ती चौकाजवळील दत्त मंदिर परिसरात नंदकिशोर शैक्षणिक ट्रस्ट आणि अर्पण रक्तपेढीतर्फे रक्तदान शिबिराचे आयोजन करण्यात आले होते.
---
नाशिकरोडला दत्तनामाचा जयघोष
नाशिकरोड ः परिसरात दत्तनामाच्या जयघोषात पालखी मिरवणुकीसह विविध कार्यक्रमांद्वारे भक्तिमय वातावारणात दत्त जयंती सोहळा पार पडला.
नाशिक-पुणे महामार्गावरील दत्त मंदिर चौकातील मंदिराबाहेर सकाळपासूनच भाविकांच्या रांगा लागल्या होत्या. येथे विविध धार्मिक विधी झाल्यानंतर दत्त जन्मोत्सव सोहळा साजरा झाला. मुक्तिधाममधील मंदिरातही दत्त जन्मोत्सव सोहळा झाला. मुक्तिधामच्या प्रवेशद्वाशेजारील दत्त मंदिरात व्यापारी बांधवांनी महाप्रसादाचे वाटप केले. जगताप मळ्यात एकमुखी दत्त मंदिरातही विविध कार्यक्रम झाले. सिन्नर फाटा, जेलरोड, मोटवानीरोड, पंचक येथील मंदिर, उपनगरची पाण्याची टाकी येथील दत्त मंदिरांतही भजन, कीर्तन, प्रसादवाटप व अन्य कार्यक्रम झाले.
--
देवळालीगावात महाप्रसाद
देवळालीगावातील सोमवार पेठ येथून ढोल-ताशाच्या गजरात पालखी मिरवणूक काढण्यात आली. परिसरातील मुख्य रस्त्यांवरून मिरवणूक नेण्यात आली. सायंकाळी दत्त जन्मोत्सव साजरा करण्यात आला. महाप्रसाद वाटप झाले. विजयनाथ भोई, उषामाई चव्हाण, आमदार योगेश घोलप, माजी महापौर नयना घोलप, नगरसेविका सत्यभामा गाडेकर, सूर्यकांत लवटे, शांतारामबापू कदम, रुंजा पाटोळे, प्रदीप देशमुख, बाळनाथ सरोदे आदी उपस्थित होते. राजेंद्र चव्हाण, रवींद्र चौधरी, संदीप आहेर, हेमंत चौधरी, दीपक बोराडे, मयूर चौधरी आदींनी संयोजन केले. देवळालीगावातील अवधून चिंतन समितीतर्फे सात दिवसांपासून हरिनाम सप्ताह सुरू होता. त्याअंतर्गत गुरुचरित्र पारायण, ज्ञानेश्वरी पारायण झाले.
--
नवग्रह मंदिरात दत्तयाग
विहितगाव परिसरातील श्री अण्णा गणपती नवग्रह मंदिरात अण्णा गुरुजी यांच्या हस्ते पूजाविधी झाले. दुपारी बाराला महाभिषेकानंतर भाविकांना प्रसादवाटप, तर दुपारी तीननंतर दत्तयाग व भजनाचा कार्यक्रम झाला. सायंकाळी सहाला गुरुदत्त जन्म सोहळा साजरा झाला. शिक्षणाधिकारी दिलीप गोविंद, रवींद्र सुर्वे, आशुतोष घाडगे, पंकज कवळी, अशोक वर्मा, सुधीर अंबावणे, विनय जोशी, अविनाश त्रिपाठी, नितीन भोजने, शेखर नायडू आदी उपस्थित होते.
--
कॅम्प, भगूरला पारायण
देवळाली कॅम्प ः देवळाली कॅम्प, भगूर परिसरातील दत्त मंदिरांत पूजा, अभिषेक करीत दत्त जन्मोत्सव साजरा करण्यात आला. दत्तनामाच्या जयघोषात ठिकठिकाणी प्रसाद व महाप्रसादाचे वाटप करण्यात आले. येथील खंडोबा टेकडीवर दत्त मंदिरात अण्णाज् टेंपल हिल ग्रुपतर्फे महाआरती, प्रसादवाटप करण्यात आले. येथील पोलिस ठाणे, भगूरची पोलिस चौकी व भगूर येथील दत्त मंदिरात गुरुचरित्र पठण व पारायण आणि सायंकाळी महाप्रसाद वाटप करण्यात आल्याची माहिती नगरसेवक मोहन करंजकर यांनी दिली. मशीद स्ट्रीटवरील दत्त मंदिरात देवराज गुप्ता यांच्या हस्ते महाआरती व महाप्रसाद वाटप करण्यात आले. गवळीवाडा येथील दत्त मंदिर, मोरे बंगला, मेढे मळा, पाटील सदन, मेनरोड हनुमान मंदिरासमोर दत्त मंदिरात पूजा, अभिषेक, महाप्रसाद वाटप करण्यात आले.
शिगवे बहुला येथे श्री स्वामी समर्थ केंद्रातर्फे दत्त पालखी व जयंती सप्ताह सोहळा झाला. त्यात येथील रहिवाशांनी मोठ्या संख्येने सहभाग घेतला. रविवारी गावातून टाळ-मुदंगांच्या गजरात श्री दत्त महाराजांची पालखी काढण्यात आली. दुपारी आरती करून श्री दत्त जयंती जन्मोत्सव उत्साहात साजरा करण्यात आला.
--
पंचवटीत पालखी मिरवणूक
पंचवटी ः नांदूर येथे श्री दत्तांची पालखी मिरवणूक काढण्यात आली. जयंत दिंडे, नगरसेवक उद्धव निमसे, सुरेश खेताडे, शीतल माळोदे, पूनम सोनवणे आदी उपस्थित होते. बाजीराव दिंडे, राजेंद्र दिंडे, भारत दिंडे यांनी आयोजन केले. पंचवटीतील एरंडवाडी, पेठरोड, म्हसरूळ, हिरावाडी आदी भागात गुरुदेव दत्तांची पालखी मिरवणूक काढण्यात आली. गोदाघाटावरील एकमुखी दत्त मंदिरात जन्मोत्सव सोहळा सुरू असून, त्याअंतर्गत रविवारी अभिषेक करण्यात आला. मंदिराला आकर्षक सजावट करण्यात आली आहे. लघुरुद्राभिषेक, गुरुचरित्र पारायण, दत्त महिला भजनी मंडळाच्या दत्त कवण, भजन व भक्तिगीतांचे सादरीकरण करण्यात आले. पेठ फाट्यावरील एरंडवाडी येथील दत्त सेवक मित्रमंडळातर्फे ढोल-ताशांच्या गजरात पालखी मिरवणूक काढण्यात आली. परिसरातील मंदिरांमध्ये भाविकांच्या दर्शनासाठी रांगा लागल्या होत्या.
--
सातपूरला विधिवत पूजन
सातपूर ः परिसरातील मंदिरांमध्ये दिवसभर विविध धार्मिक कार्यक्रमांचे आयोजन करण्यात आले होते. अतिक्रमण निर्मूलन मोहिमेत काही वृक्षांखालील दत्त मंदिरे महापालिकेने नुकतीच हटविली. अशा ठिकाणी दत्तांच्या प्रतिमेते पूजन करण्यात आले. परिसरात पालखी सोहळ्याचेही आयोजन करण्यात आले होते. लहान मुलींसह महिला व टाळ-मृदंगांच्या गजरात वारकऱ्यांनी पालखी सोहळ्यात सहभाग नोंदवला. त्यामुळे परिसरात चैतन्य पसरले होते. दिवसभर मंदिरांमध्ये गर्दी दिसून आली.
--
इंदिरानगरला सांस्कृतिक कार्यक्रम
इंदिरानगर ः येथील राजीव टाऊनशिप परिसरात दत्त देवस्थानतर्फे दत्तगुरूंच्या पादुकांची पालखी काढण्यात आली. द्वारकामाई साईबाबा मंदिरातर्फे सांस्कृतिक कार्यक्रमांचे आयोजन करण्यात आले होते. दत्त देवस्थानतर्फे येथे विशेष सप्ताहाचे आयोजन करण्यात आले होते. दत्त जयंतीच्या पूर्वसंध्येला परिसरातून दत्तमूर्ती व पादुकांची पालखी काढण्यात आली होती. रविवारी मंदिरात दत्तयागाचे आयोजन करण्यात आले होते. भाविकांना महाप्रसादाचे वाटपही करण्यात आले. श्री साईबाबा मंदिरातही धार्मिक कार्यक्रम झाले. बच्चेकंपनीने येथे सांस्कृतिक कार्यक्रम सादर केले. आत्महत्या केलेल्या शेतकऱ्यांच्या मुलांना मदत म्हणून विविध वस्तूंचे संकलन मंडळातर्फे करण्यात आले. मंडळाचे संस्थापक अध्यक्ष संतोष कमोद यांच्या मार्गदर्शनाखाली हे कार्यक्रम झाले.
मोबाइल अॅप डाउनलोड करा आणि राहा अपडेट
